Tikronika Ta Vumbirhi 6:1-42
6 Hi nkarhi wolowo Solomoni a ku: “Yehovha u vule leswaku u ta tshama emunyameni lowukulu.+
2 Ndzi ku akele yindlu leyi tlakukeke, laha u nga ta tshama kona hilaha ku nga heriki.”+
3 Hiloko hosi yi hundzuluka yi sungula ku katekisa vanhu hinkwavo va Israyele naswona vanhu hinkwavo va Israyele a va lo yima.+
4 Yi ku: “A ku dzunisiwe Yehovha Xikwembu xa Israyele, loyi hi nomu wakwe a tshembiseke tata wa mina Davhida kutani a endla leswi a swi tshembiseke hi mavoko yakwe, a ku,
5 ‘Ku sukela siku leri ndzi humeseke vanhu va mina etikweni ra Egipta ha rona, a ndzi hlawulanga muti etinyimbeni hinkwato ta Israyele laha ndzi nga ta akeriwa yindlu leyi nga ta vangamisa vito ra mina+ naswona a ndzi hlawulanga munhu leswaku a rhangela vanhu va mina, ku nga Vaisrayele.
6 Kambe ndzi hlawule muti wa Yerusalema+ leswaku vito ra mina ri vangamisiwa kona naswona ndzi hlawule Davhida leswaku a va murhangeri wa vanhu va mina, ku nga Israyele.’+
7 Mbilu ya Davhida tata wa mina a yi navela ku aka yindlu leyi nga ta vangamisa vito ra Yehovha Xikwembu xa Israyele.+
8 Kambe Yehovha u byele Davhida tata wa mina a ku, ‘Mbilu ya wena a yi navela ku ndzi akela yindlu leyi nga ta vangamisa vito ra mina, u endle kahle ku navela nchumu wo tano.
9 Hambiswiritano, a hi wena u nga ta aka yindlu leyi, kambe n’wana wa wena hi yena a nga ta ndzi akela yindlu leyi nga ta vangamisa vito ra mina.’+
10 Yehovha u endle leswi a swi tshembiseke, hikuva ndzi tlhandlame Davhida tata wa mina naswona ndzi tshame exiluvelweni xa Israyele+ hilaha Yehovha a tshembiseke hakona.+ Ndzi tlhele ndzi aka yindlu leyi nga ta vangamisa vito ra Yehovha Xikwembu xa Israyele
11 naswona ndzi veke Areka leyi nga ni ntwanano+ lowu Yehovha a wu endleke ni Vaisrayele.”
12 Hiloko a yima emahlweni ka altari ya Yehovha emahlweni ka vanhu hinkwavo va Israyele, kutani a tlakusa mavoko.+
13 (Hikuva Solomoni a a endle xiteji xa koporo kutani a xi veka exikarhi ka xivava.*+ A xi lehe 2,2 wa timitara xi anama 2,2 wa timitara* xi tlakuka timitara ta 1,3; a yima eka xona.) Hiloko a khinsama emahlweni ka vanhu hinkwavo va Israyele kutani a tlakusela mavoko yakwe ematilweni,+
14 a ku: “Yehovha Xikwembu xa Israyele, a xi kona Xikwembu lexi fanaka na wena ematilweni kumbe emisaveni, u hlayisa ntwanano naswona u rhandza malandza ya wena lama ku tirhelaka hi timbilu hinkwato.+
15 U endle leswi u tshembiseke nandza wa wena Davhida tata wa mina.+ U vule xitshembiso xexo hi nomu wa wena kutani namuntlha u xi endlile hi voko ra wena.+
16 Yehovha Xikwembu xa Israyele, endla leswi u swi tshembiseke nandza wa wena Davhida tata wa mina loko u ku: ‘Exiluvelweni xa Israyele ku ta tshama ku ri ni munhu loyi a humaka endyangwini wa wena, loko ntsena vana va wena vo tshembeka eka mina va yingisa nawu wa mina+ hilaha na wena u endleke hakona.’+
17 Yehovha Xikwembu xa Israyele, ndzi kombela u endla leswi u swi tshembiseke nandza wa wena Davhida.
18 “Kambe, xana Xikwembu xi nga tshama ni vanhu emisaveni?+ Waswivo! Hambi ku ri matilo, tilo ra matilo a ma ku ringani;+ kutani yindlu leyi ndzi yi akeke i yitsongo swinene!+
19 Hikwalaho yingisa xikhongelo xa nandza wa wena ni leswi a swi kombelaka, Yehovha Xikwembu xanga u tlhela u yingisa xirilo xa nandza wa wena ni xikhongelo lexi a xi endlaka emahlweni ka wena.
20 Onge matihlo ya wena ma nga languta yindlu leyi vusiku ni nhlikanhi, ndhawu leyi u vuleke leswaku u ta vangamisa vito+ ra wena eka yona, leswaku u yingisa xikhongelo lexi nandza wa wena a xi endlaka endhawini leyi.
21 Yingisa loko nandza wa wena a kombela ku pfuniwa ni loko vanhu va wena ku nga Vaisrayele, va khongela va langute laha yindlu leyi yi nga kona,+ onge u nga yingisa u ri endhawini leyi u tshamaka eka yona ematilweni;+ onge u nga yingisa u tlhela u rivalela.+
22 “Loko munhu o dyohela munhu un’wana kutani a hlambanyisiwa ni ku tiboha hi ku ya hi xihlambanyo lexi a xi endleke, kutani loko a ha ri ehansi ka xihlambanyo xexo a ta ealtarini ya wena endlwini leyi,+
23 onge u nga yingisa u ri ematilweni, u avanyisa malandza ya wena hi ku rihisa lowo homboloka, u n’wi xupula hi ku ya hi leswi a swi endleke,+ loyi a lulameke u vula leswaku a nga na nandzu naswona u n’wi hakela hi ku ya hi mitirho ya yena leyinene.+
24 “Nakambe loko vanhu va wena, ku nga Vaisrayele va hluriwa hi valala va vona hikwalaho ka leswi va ku dyoheleke hi ku phindhaphindha,+ kutani va tlhelela eka wena va dzunisa vito ra wena,+ va khongela+ ni ku kombela emahlweni ka wena leswaku u va komba tintswalo va ri endlwini leyi,+
25 onge u nga yingisa u ri ematilweni,+ kutani u rivalela vanhu va wena, ku nga Vaisrayele xidyoho xa vona, u va tlherisela etikweni leri u ri nyikeke vona ni vakokwa wa vona.+
26 “Loko matilo ma pfariwile ku nga ni mpfula+ hikwalaho ka leswi va ku dyoheleke hi ku phindhaphindha,+ kutani va khongela eka wena va langute laha yindlu leyi yi nga kona, va dzunisa vito ra wena, ivi va hundzuka eswidyohweni swa vona hikwalaho ka leswi u va xupuleke,+
27 onge wena u nga yingisa u ri ematilweni, u rivalela malandza ya wena, ku nga Vaisrayele, xidyoho xa vona, hikuva u ta va dyondzisa ndlela leyinene leyi va faneleke va famba ha yona;+ u va nisela mpfula+ etikweni leri u va nyikeke rona leswaku ri va ndzhaka ya vona.
28 “Loko ko va ni ndlala etikweni+ kumbe ntungu,+ dyandza, mfurho,*+ tinjiya leti onhaka,+ kumbe loko valala va vona vo va hlasela emutini wihi ni wihi wa tiko ra vona+ kumbe loko va hlaseriwa hi ntungu wa muxaka wihi ni wihi kumbe ku va ni vuvabyi,+
29 xikhongelo xin’wana ni xin’wana,+ xikombelo xin’wana ni xin’wana xa ku kombela tintswalo+ lexi nga endliwaka hi munhu un’wana ni un’wana kumbe hi vanhu va wena hinkwavo, ku nga Vaisrayele, (hikuva un’wana ni un’wana u tiva leswi n’wi karhataka)+ loko va khongela va langute laha yindlu leyi yi nga kona,+
30 onge u nga yingisa u ri ematilweni, laha u tshamaka kona+ naswona onge u nga rivalela;+ u hakela un’wana ni un’wana hi ku ya hi tindlela takwe hinkwato, hikuva u tiva mbilu yakwe (wena u ri wexe u yi tiva kahle mbilu ya munhu),+
31 leswaku va ta ku chava va famba etindleleni ta wena masiku hinkwawo lawa va nga ta ma hanya etikweni leri u ri nyikeke vakokwa wa hina.
32 “Ni le ka muluveri loyi a nga riki un’wana wa vanhu va wena, ku nga Vaisrayele, loyi a humaka etikweni ra le kule hikwalaho ka vito*+ ra wena lerikulu ni voko ra wena ra matimba ni voko ra wena leri tshambulutiweke, a fika a khongela a langute laha yindlu leyi yi nga kona,+
33 onge wena u nga yingisa u ri ematilweni, laha u tshamaka kona, kutani u endlela muluveri hinkwaswo leswi a swi kombelaka eka wena, leswaku vanhu hinkwavo emisaveni va ta tiva vito+ ra wena va tlhela va ku chava hilaha vanhu va wena, ku nga Vaisrayele, va endlaka hakona, nileswaku va tiva leswaku vito ra wena ri dzunisiwa endlwini leyi ndzi yi akeke.
34 “Loko vanhu va wena va ya enyimpini va ya lwa ni valala va vona ku nga khathariseki leswaku hi le kwihi,+ kutani va khongela+ eka wena va langute emutini lowu, lowu u wu hlawuleke ni laha yindlu leyi ndzi yi akeleke vito ra wena yi nga kona,+
35 yingisa xikhongelo xa vona u ri ematilweni ni xikombelo xa vona xo lava ku kombiwa tintswalo, u va lamulela.+
36 “Loko vo ku dyohela (hikuva a nga kona munhu la nga dyohiki),+ kutani u va hlundzukela, u va nyiketa eka valala va vona, va va khoma va va yisa evuhlongeni etikweni ra le kule kumbe ekusuhi,+
37 ivi va tianakanya kahle va ri etikweni leri va yisiweke evuhlongeni eka rona kutani va tlhelela eka wena va kombela ku rivaleriwa va ri etikweni leri va nga mahlonga eka rona, va ku, ‘Hi dyohile naswona hi endle xihoxo; hi ni nandzu,’+
38 kutani va tlhelela eka wena hi timbilu ta vona+ hinkwato ni hi vutomi* bya vona hinkwabyo va ri etikweni leri va nga mahlonga eka rona,+ va khongela eka wena va langute etikweni leri u ri nyikeke vakokwa wa vona ni le mutini lowu u wu hlawuleke+ ni le ndlwini leyi ndzi yi akeke leswaku ku vangamisiwa vito ra wena,
39 yingisa xikhongelo xa vona u ri ematilweni, laha u tshamaka kona ni xikombelo xa vona xo kombiwa tintswalo, u va lamulela,+ u rivalela vanhu va wena lava ku dyoheleke.
40 “Xikwembu xanga, onge matihlo ya wena ma nga languta naswona tindleve ta wena ti yingisa swikhongelo leswi endliwaka endhawini leyi.+
41 Wena Yehovha Xikwembu ni Areka ya wena leyi kombisaka matimba ya wena, nghenani endhawini leyi yo wisa.+ Yehovha Xikwembu, vaprista va wena a va swi kombise leswaku hi wena u kotaka ku ponisa naswona vanhu va wena vo tshembeka a va tsake hikwalaho ka vunene bya wena.+
42 Yehovha Xikwembu, u nga fularheli muhlawuriwa wa wena.+ Tsundzuka rirhandzu leri u ri kombiseke nandza wa wena Davhida.”+
Tinhlamuselo ta le hansi
^ Vona Tinhlamuselo.
^ Xisungunu a xi ringana na 44,5 wa tisentimitara. Vona Xiengetelo B14.
^ I vuvabyi lebyi hlaselaka swimilana ni swilo swin’wana.
^ Kumbe “ndhuma.”
^ Hi Xiheveru, neʹphesh. Vona Tinhlamuselo.
