Tikronika Ta Vumbirhi 7:1-22
7 Loko Solomoni a heta ku khongela,+ ndzilo wu ta hi le tilweni+ wu hisa hinkwaswo leswi a ku endliwe magandzelo hi swona, kutani ku vangama ka Yehovha ku tata yindlu leyi.+
2 Vaprista a va tsandzeka ku nghena endlwini ya Yehovha hikuva ku vangama ka Yehovha a ku tate yindlu ya Yehovha.+
3 Vaisrayele va wu vonile ndzilo lowu niloko ku vangama ka Yehovha ku va ehenhla ka yindlu leyi, hiloko va khinsama swikandza swa vona swi languta ehansi laha a va ri kona va khensa Yehovha, “hikuva hi lonene; rirhandzu rakwe lerikulu a ri heli.”
4 Kutani hosi ni vanhu hinkwavo va endlela Yehovha magandzelo.+
5 Hosi Solomoni a endla magandzelo hi tihomu ta 22 000 ni tinyimpfu ta 120 000. Kutani hosi ni vanhu hinkwavo va khangula* yindlu ya Xikwembu xa ntiyiso.+
6 Vaprista a va yime laha va tirhaka kona, Valevhi na vona a va yime laha va tirhaka kona va khome swichayachayana leswi a swi chayiwa loko ku dzunisiwa Yehovha hi risimu.+ (Hosi Davhida u endle swichayachayana leswi leswaku a khensa Yehovha ha swona, “hikuva rirhandzu rakwe lerikulu a ri heli.”) Vaprista a va ri eku chayeni ka timhalamhala+ hi nkarhi lowu Vaisrayele a va yime emahlweni ka vona.
7 Kutani Solomoni a kwetsimisa ndhawu leyi nga exikarhi ka xivava* lexi a xi ri emahlweni ka yindlu ya Yehovha, hikuva kwalaho a a fanele a nyikela magandzelo yo hisiwa+ ni mafurha ya swifuwo ya magandzelo yo kombela ku rhula, hikuva altari+ ya koporo leyi Solomoni a yi endleke a yi ri yitsongo leswaku ku endliwa magandzelo yo hisiwa, magandzelo ya mavele+ ni mafurha ya swiharhi+ ya magandzelo eka yona.
8 Hi nkarhi wolowo Solomoni a endla nkhuvo ku ringana masiku ya nkombo+ ni tiko hinkwaro ra Israyele, ntshungu lowukulu lowu a wu huma eLebo-hamati* ku ya eNkoveni wa Egipta.+
9 Kambe hi siku ra vunhungu,* va khome nhlengeletano yo hlawuleka+ hikuva ku khanguriwa* ka altari ku hete masiku ya nkombo ni nkhuvo wu hete masiku ya nkombo.
10 Kutani hi siku ra vu-23 ra n’hweti ya vunkombo, a tshika vanhu va famba, timbilu ta vona ti tsakile+ hikwalaho ka vunene lebyi Yehovha a byi endleleke Davhida na Solomoni ku katsa ni vanhu vakwe, ku nga Vaisrayele.+
11 Xisweswo Solomoni a heta ku aka yindlu ya Yehovha ni yindlu ya hosi;+ naswona Solomoni u kote ku endla hinkwaswo leswi a a lava ku swi endla endlwini ya Yehovha ni le ndlwini yakwe.+
12 Hiloko Yehovha a humelela eka Solomoni+ nivusiku a ku eka yena: “Ndzi xi twile xikhongelo xa wena naswona ndzi tihlawulele ndhawu leyi leswaku yi va ndhawu yo endlela eka yona magandzelo.+
13 Loko ndzi pfala matilo leswaku mpfula yi nga ni, niloko ndzi lerisa tinjiya leswaku ti onha tiko, niloko ndzi rhumela ntungu eka vanhu va mina,
14 loko vanhu va mina lava vitaniwaka hi vito ra mina+ va titsongahata+ ivi va khongela, va ndzi lava va tshika tindlela ta vona to biha,+ kutani ndzi ta va yingisa ndzi ri etilweni, ndzi va rivalela xidyoho xa vona, ndzi lunghisa tiko ra vona.+
15 Matihlo ya mina ma ta tshama ma pfulekile naswona tindleve ta mina ti ta yingisa swikhongelo leswi endliwaka endhawini leyi.+
16 Sweswi ndzi hlawule yindlu leyi ndzi tlhela ndzi yi hlawulekisa, leswaku vito ra mina ri ta vangamisiwa eka yona hilaha ku nga heriki,+ matihlo ya mina ni mbilu ya mina swi ta tshama swi ri kwalaho.+
17 “Kutani loko wena wo ndzi yingisa hi mbilu hinkwayo hilaha Davhida tata wa wena a endleke hakona, u endla hinkwaswo leswi ndzi ku leriseke swona, u yingisa milawu ya mina ni swiboho swa mina,+
18 ndzi ta tiyisa vuhosi bya wena+ hilaha ndzi endleke ntwanano na Davhida+ tata wa wena hakona, ndzi ku, ‘Ku ta tshama ku ri ni munhu loyi a humaka endyangwini wa wena loyi a nga ta fuma Vaisrayele.’+
19 Kambe loko wo ndzi fularhela, u nga yingisi milawu ya mina ni swileriso swa mina leswi ndzi ku vekeleke swona, kutani u ya tirhela swikwembu swin’wana, u gandzela swona,+
20 ndzi ta susa Vaisrayele etikweni leri ndzi va nyikeke rona+ naswona yindlu leyi, leyi ndzi yi kwetsimiseke hikwalaho ka vito ra mina ndzi ta yi susa emahlweni ka mina naswona ndzi ta endla leswaku yi hlekuriwa yi tlhela yi hundzuka xihlekiso exikarhi ka vanhu hinkwavo.+
21 Yindlu leyi yi ta hundzuka rhumbi. Un’wana ni un’wana la hundzaka ekusuhi na yona u ta hlamala+ kutani a ku, ‘Hikwalaho ka yini Yehovha a endle leswi etikweni leri ni le ka yindlu leyi?’+
22 Kutani va ta ku, ‘Swi vangiwa hi leswi va fularheleke Yehovha+ Xikwembu xa vakokwa wa vona, loyi a va humeseke etikweni ra Egipta+ ivi va sungula ku tirhela swikwembu swin’wana va gandzela swona.+ Leswi hi swona leswi endleke a va tisela khombo leri.’”+
Tinhlamuselo ta le hansi
^ Kumbe “pfula.”
^ Vona Tinhlamuselo.
^ Kumbe “enyangweni ya Hamati.”
^ Siku ra le ndzhaku ka nkhuvo, kumbe siku ra vu-15.
^ Kumbe “pfuriwa.”
