Vakorinto Wa Vumbirhi 11:1-33
11 Hambileswi ndzi vonakaka onge ndzi xiphukuphuku, ndzi kombela mi ndzi lehisela mbilu. Kambe ndza swi xiya leswaku a mi ndzi heleli mbilu!
2 Ndzi ni vukwele swinene ha n’wina hilaha Xikwembu xi endlaka hakona. Hikuva ndzi mi tshembise ku tekiwa hi nuna un’we, naswona ndzi lava ku mi nyiketa eka Kreste mi ri nhwana wo tenga.+
3 Kambe ndza chava leswaku mi nga kanganyisiwa hi ndlela yo karhi, hilaha nyoka yi kanganyiseke Evha hakona hi vuxisi bya yona,+ kutani mianakanyo ya n’wina yi nga onhiwa mi nga ha landzeli Kreste hi mbilu hinkwayo mi tengile.+
4 Hikuva loko ku fika un’wana a ta chumayela hi Yesu un’wana ku nga ri yena loyi hi chumayeleke ha yena, kumbe mi amukela moya wun’wana ku nga ri wona lowu mi wu amukeleke, kumbe a mi tisela mahungu lamanene kambe ku nga ri wona lawa mi ma amukeleke,+ yena mi n’wi lehisela mbilu.
5 Hikuva ndza swi xiya leswaku a ku na nchumu lowu kombisaka leswaku ndzi wa xiyimo xa le hansi eka vaapostola va n’wina lava tiendlaka onge i vanene ngopfu.+
6 Hambiloko ndzi nga ri xivulavuri lexi nga ni vuswikoti,+ kambe vutivi ndzi na byona; sweswo hi swi veke swi va erivaleni eka n’wina hi tindlela hinkwato ni le ka swilo hinkwaswo.
7 Kumbe, xana ndzi endle xidyoho leswi ndzi nga titsongahata leswaku n’wina mi tlakusiwa, hileswi ndzi mi chumayeleke mahungu lamanene ya Xikwembu hi ku tsaka handle ko lava leswaku mi ndzi hakela?+
8 Ndzi kume mpfuno eka mavandlha man’wana naswona leswi swi fana ni loko ndzi ma yiverile leswaku ndzi ta tirhela n’wina.+
9 Kambe loko ndza ha ri na n’wina naswona ndzi pfumala swo karhi, a ndzi vanga ndzhwalo eka munhu ni un’we, hikuva vamakwerhu lava humaka eMakedoniya va ndzi nyike swilo swo tala leswi a ndzi swi pfumala.+ A ndzi vanga ndzhwalo eka n’wina hi ndlela yo karhi naswona a ndzi nge pfuki ndzi ve ndzhwalo.+
10 Loko ntsena ndza ha ri mulandzeri wa Kreste, a ndzi nge tshiki ku tibuma+ hi ndlela leyi, eswifundzheni swa Akaya.
11 Hikwalaho ka xivangelo xihi? Xana hileswi ndzi nga mi rhandziki? Xikwembu xa swi tiva leswaku ndza mi rhandza.
12 Kambe leswi ndzi swi endlaka ndzi ta ya emahlweni ndzi swi endla,+ leswaku lava lavaka ku kombisa leswaku va ringana na hina ni ku tibuma hi swilo leswi va swi endleke, va nga kumi xivangelo xo endla tano.
13 Hikuva vanhu vo tano i vaapostola va mavunwa, vatirhi lava kanganyisaka, va tiendla onge i vaapostola va Kreste.+
14 A swi hlamarisi, hikuva Sathana na yena u tiendla ntsumi ya ku vonakala.+
15 Hikwalaho a swi hlamarisi loko malandza yakwe na wona ma tiendla malandza yo lulama. Kambe eku heteleleni ma ta tshovela leswi ma swi byalaka.+
16 Nakambe ndzi ri: Ku nga vi na munhu loyi a ehleketaka leswaku ndzi xiphukuphuku. Kambe hambiloko mi ehleketa tano, ndzi amukeleni niloko ndzi ri xiphukuphuku, leswaku na mina ndzi ta tibumanyana.
17 Leswi ndzi swi vulaka sweswi, a ndzi landzeli xikombiso xa Hosi kambe ndzi vulavula ku fana ni xiphukuphuku lexi titshembaka xi tlhela xi tibuma.
18 Leswi vo tala va tibumaka hi swilo swa misava, na mina ndzi ta tibuma.
19 Leswi mi titekaka mi tlharihe ngopfu, a mi swi teki ku ri nchumu ku va lehisela mbilu vanhu lava nga swiphukuphuku.
20 Kahlekahle, mi va lehisela mbilu hinkwavo lava mi endlaka mahlonga, hinkwavo lava mi dyelelaka, hinkwavo lava tekaka leswi mi nga na swona, hinkwavo lava titlakusaka eka n’wina ni hinkwavo lava mi makalaka.
21 Swi khomisa tingana leswi hi vulaka leswi, hikuva eka van’wana va n’wina hi nga ha vonaka onge hi tsanile swinene.
Kambe loko vanhu van’wana va nga chavi ku tibuma kutani na mina a ndzi chavi ku tibuma hambileswi un’wana a nga vonaka onge ndzi xiphukuphuku.
22 Xana i Vaheveru? Na mina ndzi yena.+ Xana i Vaisrayele? Na mina ndzi yena. Xana i vana* va Abrahama? Na mina ndzi yena.+
23 Xana i malandza ya Kreste? Ndzi hlamula ku fana ni munhu wo penga, ndzi mupengi lonkulu: Ndzi endle ntirho wo tala,+ ndzi pfaleriwe ko tala emakhotsweni,+ ndzi biwe ku tlula mpimo naswona ndzi pone ku fa ko tala.+
24 Ndzi biwe ka ntlhanu hi Vayuda hi mikhavi ya 39,+
25 ndzi biwe hi tinhonga kanharhu,+ ndzi khandliwe hi maribye kan’we,+ ndzi tshovekeriwe hi xikepe kanharhu,+ ndzi hete vusiku byin’we ni siku rin’we ndzi ri elwandle;
26 ndzi ve emaendzweni ko tala, emakhombyeni ya milambu, emakhombyeni ya swigevenga, emakhombyeni ya vanhu va rikwerhu,+ emakhombyeni ya matiko,+ emakhombyeni emutini,+ emakhombyeni emananga, emakhombyeni elwandle, emakhombyeni exikarhi ka vamakwerhu va mavunwa,
27 entirhweni ni le ku tikarhateni, ndzi nga etleli vusiku byo tala,+ endlaleni ni le torheni,+ mikarhi yo tala a ndzi nga ri na swakudya,+ exirhamini naswona mikarhi yo tala a ndzi pfumala swiambalo.
28 Handle ka swilo sweswo hinkwaswo, ku ni leswi ndzi karhataka siku ni siku: ku vilela hi mavandlha hinkwawo.+
29 I mani loyi a tsaneke, kutani mina ndzi nga tsani? I mani loyi a khunguvanyekaka, kutani mina ndzi nga hlundzuki?
30 Loko ndzi fanele ndzi tibuma, ndzi ta tibuma hi swilo leswi kombisaka ku tsana ka mina.
31 Xikwembu lexi nga Tata wa Hosi Yesu, lexi faneleke xi dzunisiwa hilaha ku nga heriki, xa swi tiva leswaku a ndzi hembi.
32 EDamaska, ndhunankulu ya hosi Areta a yi rindza muti wa Vadamaska leswaku yi ta ndzi khoma,
33 kambe ndzi ehlisiwe hi basikiti efasitereni leri a ri ri ekhumbini ra muti+ hiloko ndzi ponisa sweswo emavokweni ya yona.
Tinhlamuselo ta le hansi
^ Hi Xigriki, “mbewu.”
