Vakorinto Wa Vumbirhi 9:1-15
9 A swi bohi ku va ndzi mi tsalela leswaku mi ta swi tiva ku mi fanele mi pfuna vakwetsimi,+
2 hikuva ndza ku tiva ku tiyimisela ka n’wina loku ndzi tibumaka hakona eka vanhu va le Makedoniya leswaku se swi endla lembe vamakwerhu va le Akaya va lunghekele ku pfuna, kutani ku hiseka ka n’wina ku khutaze vo tala va vona.
3 Kambe ndzi mi rhumela vamakwerhu leswaku ku tibuma ka hina hi n’wina ku nga vi ka hava emhakeni leyi ni leswaku mi va mi lunghekile, hilaha ndzi vuleke hakona leswaku mi ta va mi lunghekile.
4 Loko swi nga ri tano, loko vanhu va le Makedoniya vo ta na mina naswona va mi kuma mi nga lunghekanga, hina xikan’we na n’wina hi ta khomiwa hi tingana hikwalaho ka leswi hi mi tshembaka.
5 Kutani ndzi vone swi fanerile leswaku ndzi khutaza vamakwerhu leswaku va ta eka n’wina ndzi nga si fika, leswaku loko hi fika nyiko leyi yi ta va yi lunghekile naswona yi ta kombisa leswaku a mi yi nyikeli hikwalaho ka leswi hi mi sindziseke ku endla tano kambe hikwalaho ka leswi mi hananaka.
6 Kambe tsundzukani leswi, loyi a byalaka katsongo u ta tshovela katsongo naswona loyi a byalaka swo tala u ta tshovela swo tala.+
7 Un’wana ni un’wana a a endle hilaha a tiyimiseleke hakona embilwini yakwe, ku nga ri hi ku vilela kumbe hi ku sindzisiwa,+ hikuva Xikwembu xi rhandza munhu loyi a nyikaka a tsakile.+
8 Ku tlula kwalaho, Xikwembu xa swi kota ku mi komba musa wa xona lowukulu leswaku mi nga pfumali nchumu, kambe mi ta va ni swo tala leswaku mi ta kota ku endla mitirho leyinene.+
9 (Hilaha ku tsariweke hakona: “Wa hanana; u nyike swisiwana. U ta tshama a lulamile hilaha ku nga heriki.”+
10 Kutani Loyi a nyikaka muhaxi mbewu yo tala ni xinkwa, u ta mi nyika mbewu a tlhela a mi andzisela yona leswaku mi yi haxa naswona u ta engetela ntshovelo wa ku lulama ka n’wina.)
11 Xikwembu xi mi katekise hi tindlela to hambanahambana leswaku mi ta hanana swinene naswona vanhu va ta khensa Xikwembu hikwalaho ka nyiko ya n’wina leyi hi nga ta va nyika yona;
12 loko mi pfuna hi ndlela leyi leswaku ku vuyeriwa van’wana a mi pfuni vakwetsimi ntsena,+ kambe nileswaku vo tala va ta khensa Xikwembu hikwalaho ka mpfuno lowu.
13 Leswi mi swi endleke swi kombisa vumunhu bya n’wina naswona hikwalaho ka sweswo va dzunisa Xikwembu hikuva mi hanya hi ku pfumelelana ni mahungu lamanene ha Kreste, lawa mi ma chumayelaka ni leswi mi nyikeleke swo tala eka vona ni le ka hinkwavo.+
14 Nakambe va ta mi rhandza va tlhela va mi kombelela eka Xikwembu hikwalaho ka musa wa xona lowukulu lowu xi mi kombeke wona.
15 A ku khensiwe Xikwembu hikwalaho ka nyiko ya xona ya mahala leyi swi nga kotekiki ku yi hlamusela.
