Yohane Wa Vunharhu 1:1-14
1 Hi mina nkulukumba,* ndzi tsalela wena Gayo la rhandzekaka loyi ndzi n’wi rhandzaka swinene.
2 Makwerhu la rhandzekaka, ndzi khongelela leswaku swi ku fambela kahle u tlhela u va ni rihanyo lerinene, hilaha swi nga hakona sweswi.
3 Hikuva ndzi tsake ngopfu loko ku te vamakwerhu va fika va ndzi byela leswaku wa ha tshembekile entiyisweni naswona wa ha ya emahlweni u famba entiyisweni.+
4 A xi kona lexi ndzi tsakisaka ku tlula leswi: ku twa leswaku vana va mina va ya emahlweni va famba entiyisweni.+
5 Makwerhu la rhandzekaka, wa tshembeka eka leswi u swi endlelaka vamakwerhu, hambileswi u nga va tiviki.+
6 Evandlheni va vulavula hi rirhandzu leri u nga na rona. Loko va suka kwalaho, ndzi kombela u va khoma hi ndlela leyi nga ta tsakisa Xikwembu.+
7 Hikuva va hume hikwalaho ka vito ra Xikwembu naswona a va nga langutelanga ku kuma swo karhi+ eka vanhu va matiko.
8 Hikwalaho, hi boheka ku komba vanhu vo tano malwandla,+ leswaku hi ta va vatirhikulobye entiyisweni.+
9 Ndzi tsalele vandlha papila, kambe Diyotrefo, loyi a rhandzaka ku tiveka emahlweni exikarhi ka vona,+ a nga ma xiximi hinkwawo marito lama humaka eka hina.+
10 Hi yona mhaka loko ndzi ta, ndzi ta endla leswaku leswi a swi endlaka swi tiveka hikuva u hi vulavula ku biha.+ A nga endli sweswo ntsena, u tlhela a ala ku amukela vamakwerhu+ hi xichavo; naswona lava lavaka ku va amukela u ringeta ku va sivela a tlhela a va hlongola evandlheni.
11 Makwerhu la rhandzekaka, tekelela leswi nga swinene ku nga ri leswo biha.+ Loyi a endlaka swilo leswinene u huma eka Xikwembu.+ Loyi a endlaka swilo swo biha a nga si xi vona Xikwembu.+
12 Vamakwerhu hinkwavo va vulavula kahle hi Demetriyo naswona ndlela leyi a hanyaka ha yona yi fambisana ni ntiyiso. Ku vula ntiyiso na hina hi nyikela vumbhoni emhakeni yoleyo naswona wa swi tiva leswaku leswi hi swi vulaka i ntiyiso.
13 Ndzi ni swo tala swo ku tsalela swona, kambe a ndzi nge ku tsaleli swona.
14 Hambiswiritano, ndzi tshemba leswaku ndzi ta ku vona ku nga ri khale naswona hi ta vulavula hi langutanile.
Onge u nga va ni ku rhula.
Vamakwerhu va ku rungula. Ndzi rungulele vamakwerhu ha un’we un’we.
Tinhlamuselo ta le hansi
^ Kumbe “nkulu.”
