Amosi 4:1-13
4 “Yingisani mhaka leyi, n’wina tihomu ta Baxani,Leti nga entshaveni ya Samariya,+N’wina vavasati lava kanganyisaka lava pfumalaka+ ni ku tshikilela swisiwana,Lava byelaka vanuna* va vona va ku, ‘Hi teleni na swo nwa!’
2 Leswi Yehovha Hosi Leyi Tlakukeke a kwetsimaka u hlambanyile,‘“Masiku ma ta, lawa mi nga ta rhwariwa hi swioveKutani lava saleke va ta kokiwa hi swinjovo.
3 Un’wana ni un’wana wa n’wina u ta huma hi mbhovo lowu a langutaneke na wona ekhumbini leri boxekeke;Mi ta lahleriwa eHarimoni,” ku vula Yehovha.’
4 ‘Tanani eBethele mi ta dyohela* kona,+Tanani ni le Giligala mi ta dyoha mi tiphina!+
Tisani magandzelo ya n’wina+ nimixo,Ni vukhume bya n’wina+ hi siku ra vunharhu.
5 Hisani gandzelo ra xinkwa lexi nga ni comela leswaku mi khensa Xikwembu;+Twarisani magandzelo ya n’wina ya ku tirhandzela!
Hikuva mi rhandza ku endla sweswo, n’wina vanhu va Israyele,’ ku vula Yehovha Hosi Leyi Tlakukeke.
6 ‘Loko ku ri mina, a ndzi mi nyikanga swakudya emitini ya n’wina hinkwayoNdzi endle leswaku xinkwa xi nga ha kumeki etindlwini ta n’wina hinkwato;+Kambe a mi tlhelelanga eka mina,’+ ku vula Yehovha.
7 ‘Ndzi tlhele ndzi mi tsona mpfula ka ha sele tin’hweti tinharhu ku nga si fika ntshovelo;+Ndzi endle leswaku yi na emutini wun’we kambe emutini lowun’wana yi nga ni.
Mpfula yi ta na exiphen’wini xin’wana xa masimu,Kambe xiphemu lexin’wana lexi mpfula yi nga nangiki eka xona xi ta oma.
8 Vanhu lava humaka emitini yimbirhi kumbe yinharhu va tshetsheleke* va ya emutini wun’we leswaku va ya nwa mati,+Kambe a va kolwanga;A mi tlhelelanga eka mina,’+ ku vula Yehovha.
9 ‘Ndzi hlasele swimilana swa n’wina hi dyandza ni mfurho.*+
Mi kurise mitanga ya n’wina ni masimu ya madiriva,Kambe tinjiya ti ta dya mikuwa ya n’wina ni mirhi ya n’wina ya mutlhwari;+Kambe a mi tlhelelanga eka mina,’+ ku vula Yehovha.
10 ‘Ndzi rhumele ntungu wo fana ni wa le Egipta exikarhi ka n’wina.+
Majaha ya n’wina ndzi ma dlaye hi banga,+ ndzi teka tihanci ta n’wina.+
Laha mi tshamaka kona a ku ri na risema ra mitsumbu;+Kambe a mi tlhelelanga eka mina,’ ku vula Yehovha.
11 ‘Ndzi endle leswaku mi herisiwa,Ku fana ni loko ndzi herisa Sodoma na Gomora.+
A mi fana ni xisana lexi susiweke endzilweni;Kambe a mi tlhelelanga eka mina,’+ ku vula Yehovha.
12 Hi leswi ndzi nga ta ku endla swona, wena Israyele.
Lunghekela ku hlangana ni Xikwembu xa wena, wena Israyele,Hikuva leswi hi leswi ndzi nga ta ku endla swona.
13 Hikuva hi xona lexi tumbuluxeke tintshava+ ni moya;+Xi byela munhu leswi xi anakanyaka swona,Xi endla vurhonga byi va munyama,+Xi kandziyela tindhawu leti tlakukeke ta misava;+Vito ra xona i Yehovha Xikwembu xa mavuthu.”
Tinhlamuselo ta le hansi
^ Kumbe “vini.”
^ Kumbe “xandzukela.”
^ Kumbe “dedeleke.”
^ Ku nga vuvabyi lebyi hlaselaka swimilana ni swilo swin’wana.
