Eklesiasta 11:1-10
11 Lahlela xinkwa xa wena ematini,+ hikuva u ta tlhela u xi kuma endzhaku ka masiku yo tala.+
2 Phemela vanhu va nkombo kumbe va nhungu,+ hikuva a wu ri tivi khombo leri nga ta humelela emisaveni.
3 Loko mapapa ma ri ni mati yo tala, ma ta chulula mpfula emisaveni; naswona loko murhi wu wela edzongeni kumbe en’walungwini, wu ta tshama laha wu nga wela kona.
4 Loyi a langutisaka moya a nge byali mbewu ni loyi a langutisaka mapapa a nge tshoveli.+
5 Tanihi leswi u nga yi tiviki ndlela leyi moya wu tirhaka ha yona emarhambyini ya n’wana loyi a nga ekhwirini ra wansati loyi a tikeke,+ hilaha ku fanaka a wu wu tivi ntirho wa Xikwembu xa ntiyiso lexi endlaka swilo hinkwaswo.+
6 Byala mbewu ya wena nimixo naswona u nga wisi ku fikela nimadyambu;+ hikuva a wu swi tivi leswaku ku ta mila yihi, ku nga ha mila leyi kumbe leyin’wana, kumbexana hinkwato ka tona.
7 Ku vonakala i kunene naswona i swinene leswaku matihlo ma vona dyambu.
8 Hikuva loko munhu o tshuka a hanya malembe yo tala, a a tiphine ha wona hinkwawo.+ Kambe u fanele a tsundzuka leswaku eka wona ku nga ha tala masiku ya khombo; hinkwaswo leswi nga ta endleka a swi pfuni nchumu.+
9 Wena muntshwa, tsaka hi vuntshwa bya wena naswona mbilu ya wena a yi tsake emasikwini ya vuntshwa bya wena. Landzela mbilu ya wena u ya laha matihlo ya wena ma ku kombaka kona; kambe tiva leswaku u ta tihlamulela eka Xikwembu xa ntiyiso eka hinkwaswo leswi u swi endlaka.+
10 Kutani susa swilo leswi nga ku vangelaka khombo embilwini ya wena, u papalata ni swilo leswi nga onhaka miri wa wena, hikuva vuntshwa ni matimba ya byona a swi pfuni nchumu.+
