Eklesiasta 12:1-14
12 Kutani tsundzuka Muvumbi wa wena Lonkulu wa ha ri muntshwa,+ ku nga si fika masiku ya khombo+ ni malembe lawa u nga ta ku: “Vutomi a bya ha tsakisi”;
2 ku nga si fika nkarhi lowu dyambu ni ku vonakala ni n’weti ni tinyeleti swi nga ta va munyama,+ ni mapapa ma nga si tlhela ma vuya endzhaku ka loko ku ne mpfula leyikulu;
3 esikwini leri varindzi va yindlu va nga ta rhurhumela ni vavanuna lava nga ni matimba va nga ta goveka ni vavasati lava silaka va nga ta tshika ku tirha hikwalaho ka leswi va nga ha talangiki, ni vavasati lava nga ta hlometela emafasitereni va kuma ku ri munyama;+
4 loko tinyangwa leti languteke exitarateni ti pfariwa, loko mpfumawulo wa ribye ra ku sila wu twalela ehansi, loko munhu a pfuxiwa hi ku rila ka xinyenyana ni loko risimu leri vavasati va ri yimbelelaka ri twalela ehansi.+
5 Loko munhu a sungula ku chava ndhawu leyi tlakukeke naswona ku ri ni khombo exitarateni. Ni loko murhi wa almondi wu sungula ku rhumbuka+ ni njiya yi tikoka, ni mihandzu ya murhi wa kaperi yi baleka hikuva munhu u ya endlwini leyi a nga ta tshama eka yona nkarhi wo leha+ naswona vakhandli va nhlonge va le xitarateni;+
6 loko ntambhu ya silivhere yi nga si susiwa, xibya xa nsuku xi fayiwa ni khuwana leri nga exihlobyeni ri fayiwa ni vhilwa leri tirhisiwaka ku ka mati exihlobyeni ri tshoviwa.
7 Kutani ntshuri wu tlhelela emisaveni+ laha wu humaka kona ni matimba ya vutomi ma tlhelela eka Xikwembu xa ntiyiso laha ma humaka kona.+
8 Muhlengeleti+ u ri: “A swi pfuni nchumu!” “Hinkwaswo a swi pfuni nchumu!”+
9 Muhlengeleti a a nga lo tlhariha ntsena kambe nkarhi ni nkarhi a a dyondzisa vanhu leswi a swi tivaka,+ a a anakanyisisa ni ku lavisisa leswaku a ta hlengeleta swivuriso swo tala.+
10 Muhlengeleti a a lava ku kuma marito lama tsakisaka+ ni ku tlhela a tsala ntiyiso.
11 Marito ya lavo tlhariha ma fana ni tinhonga to khayima swifuwo+ ni swivuriso swa vona swi fana ni swipikiri leswi beleriweke kahle; swi huma eka murisi un’we.
12 N’wananga, mayelana ni timhaka tin’wana handle ka leti, yingisa xitsundzuxo lexi: Ku ta tshama ku ri karhi ku endliwa tibuku to tala naswona loko wo tinyiketela swinene eka tona swi ta ku karharisa.+
13 Loko hinkwaswo se swi twiwile, makumu ya mhaka hi lawa: Chava Xikwembu xa ntiyiso+ u hlayisa swileriso swa xona,+ hikuva leswi hi swona leswi munhu a faneleke a swi endla.+
14 Phela Xikwembu xa ntiyiso xi ta avanyisa mitirho hinkwayo ku katsa ni leyi fihliweke, xi ta vula loko yi ri yinene kumbe yi ri yo biha.+
