Esaya 18:1-7
-
Ku avanyisiwa ka Etiyopiya (1-7)
18 Khombo eka tiko leri taleke hi switsotswana leswi nga ni timpapa,Leri nga exifundzheni xa milambu ya Etiyopiya!+
2 Leri rhumaka vayimeri leswaku va famba hi le lwandle,Va tsemakanya milambu hi xikepe lexi endliweke hi papirasi ri ku:
“Fambani, n’wina varhumiwa lava nga ni rivilo,Etikweni ra vanhu vo leha va nghohe yo saseka,Eka vanhu lava chaviwaka emisaveni hinkwayo,+Tiko ra matimba leri kotaka ku hlula,Lava tiko ra vona ri khukhuriweke hi milambu.”
3 N’wina vaaki va tiko na n’wina lava tshamaka emisaveni,Leswi mi swi vonaka swi ta fana ni mfungho lowu vekiweke etintshaveni,Mi ta twa mpfumawulo ku fana ni loko ku chayiwa nanga.
4 Hikuva Yehovha u ndzi byele a ku:
“A ndzi nge kavanyetiwi naswona ndzi ta languta ndhawu ya mina,Ku fana ni ku hisa ka dyambu,Ku fana ni mberha leyi waka hi nkarhi wa ntshovelo.
5 Loko swiluva swa madiriva swi dzudzekile,Ni mihandzu ya kona yi sungula ku wupfa, ntshovelo wu nga si fikaSwihluke swi ta khutuleriwa hi swikhutulo,Swirhabyana swi ta tsemiwa swi cukumetiwa.
6 Mitsumbu ya vona yi ta dyiwa hi swinyenyana swa le tintshaveni leswi dyaka nyama ni swiharhi.
Swinyenyana leswi dyaka nyama swi ta yi dya hi nkarhi wa ximumu,Naswona swiharhi swi ta yi dya ni hi nkarhi wa ntshovelo.
7 Enkarhini wolowo ku ta tisiwa nyiko eka Yehovha wa mavuthu,Leyi humaka etikweni ra vanhu vo leha, va nghohe yo saseka,Vanhu lava chaviwaka emisaveni hinkwayo,Tiko ra matimba leri kotaka ku hlula,Lava tiko ra vona ri khukhuriweke hi milambu,Yi ya endhawini leyi dzunisaka vito ra Yehovha wa mavuthu, Ntshava ya Siyoni.”+
