Esaya 6:1-13
6 Hi lembe leri Hosi Uziya a feke ha rona,+ ndzi vone Yehovha a tshame exiluvelweni lexi tlakukeke ni lexi nga ehenhla+ naswona xiambalo xakwe a xi koka ehansi xi tata tempele.
2 Ehenhla ka yena a ku yime tiserafi; ha yin’we a yi ri ni timpapa ta tsevu. Timpapa timbirhi a yi tifunengeta xikandza ha tona, timbirhi a yi tifunengeta milenge ha tona naswona timbirhi a yi haha ha tona.
3 Kutani ti huwelelana ti ku:
“Wa kwetsima, wa kwetsima, wa kwetsima Yehovha wa mavuthu.+
Misava hinkwayo yi tele ku vangama kakwe.”
4 Hiloko timeremere* ta tinyangwa ti tsekatseka hikwalaho ka mpfumawulo wa ku huwelela, kutani yindlu yi tala hi musi.+
5 Kutani ndzi ku: “Khombo eka mina!
Ndzi file,*Hikuva leswi humaka enon’wini wa mina a swi basanga;Naswona ndzi tshama ni vanhu lava vulavulaka leswi nga basangiki;+Hikuva ndzi vone Hosi, Yehovha wa mavuthu!”
6 Hiloko serafi yin’wana yi haha yi ta eka mina naswona a yi khome kala ro hisa+ leri yi ri tekeke ealtarini hi xo oka ndzilo.+
7 Yi khumba nomu wa mina ivi yi ku:
“Waswivo! Ri khumbe nomu wa wena.
A wa ha ri na nandzu,Xidyoho xa wena xi rivaleriwile.”
8 Hiloko ndzi twa rito ra Yehovha ri ku: “Ndzi ta rhuma mani, i mani loyi a nga ta hi yela?”+ Kutani ndzi ku: “Hi mina loyi! Ndzi rhume!”+
9 Kutani a ku, “Famba u ya byela vanhu lava u ku:
‘Ku twa, mi ta twa,Kambe a mi nge twisisi;Ku vona mi ta vona,Kambe a mi nge vi na vutivi.’+
10 Endla timbilu ta vanhu lava ti sihalala,+U endla ni tindleve ta vona ti nga twi,+U pfala ni matihlo ya vona,Leswaku va nga voni hi matihlo ya vona,Naswona va nga twi hi tindleve ta vona,Leswaku va nga twisisi,Leswaku va hundzuka kutani va horisiwa.”+
11 Hiloko ndzi ku: “Ku fikela rini Yehovha?” Kutani a ku:
“Ku fikela loko miti yi lovisiwa yi sala yi ri marhumbi ku nga ha tshami munhuNi tiyindlu ti nga vi na vanhuNi tiko ri onheteriwa ri va mananga;+
12 Kukondza Yehovha a hlongola vanhu va ya ekule,+Ni tiko ri sala ri ri mananga.
13 “Kambe ka ha ta va ni vanhu vatsongo lava nga ta sala etikweni naswona ri ta tlhela ri hisiwa ku fana ni murhi lowukulu ni ku fana ni murhi wa oku, leyi endzhaku ka loko yi tsemiwile ku nga ta sala xikundzu;* mbewu yo kwetsima yi ta va xikundzu xa rona.”
Tinhlamuselo ta le hansi
^ Ku nga swinsimbana leswi hlanganisaka rivanti ni fureme.
^ Hi Xiheveru, “Ndzi miyetiwile.”
^ Kumbe “xigodo.”
