Esaya 65:1-25
65 “Ndzi pfumele ku laviwa hi vanhu lava nga kombelangiki mpfuno eka mina;Ndzi pfumele ku kumiwa hi lava a va nga ri eku ndzi laveni.+
Ndzi te, ‘Hi mina loyi, hi mina loyi,’ ndzi byela tiko leri a ri nga vitani vito ra mina.+
2 Ndzi yimise mavoko siku hinkwaro ndzi yimisela vanhu lava omeke tinhloko,+Lava fambaka etindleleni to homboloka,+Lava tiendlelaka ku rhandza;+
3 Vanhu lava tshamelaka ku ndzi dyohela,+Va gandzela emintangeni,+ va hisa magandzelo ya vona ehenhla ka switina.
4 Va tshama exikarhi ka masirha,+Nivusiku va tshama etindhawini leti tumbeleke,*Va dya nyama ya tinguluve,+Swibya swa vona swi ni murhu* wa swilo leswi nga basangiki.+
5 Va ri, ‘Tshama kwalaho; u nga tshineli eka mina,Hikuva ndzi kwetsima ku ku tlula.’
Va ya emahlweni va ndzi hlundzukisa, ku fana ni ndzilo lowu pfurhaka siku hinkwaro.
6 Vonani! Swi tsariwile;A ndzi nge miyeli,Ndzi ta va xupula,+Ndzi ta va xupula hikwalaho ka swidyoho swa vona
7 Ndzi va xupulela swidyoho swa vona ni swa vakokwa wa vona,”+ ku vula Yehovha.
“Hikuva va endle magandzelo etintshaveni,Va ndzi rhukanile ehenhla ka swintshabyana,+Ndzi ta rhanga hi ku va xupula hikwalaho ka swidyoho swa vona.”
8 Yehovha u ri:
“Ku fana ni leswi vhinyo leyintshwa yi humaka exichochweni xa madirivaKutani un’wana a ku, ‘Mi nga xi cukumeti, hikuva ku ni leswinene* eka xona,’Ndzi ta endla tano hi malandza ya mina;A ndzi nge ma lovisi hinkwawo.+
9 Yakobo u ta ndzi tswalela n’wana*Yuda u ta ndzi tswalela loyi a nga ta nyikiwa tintshava ta mina;+Lava ndzi va hlawuleke va ta tshama kwalaho,Malandza ya mina ma ta tshama kona.+
10 Saroni+ wu ta va madyelo ya tinyimpfuNi Nkova wa Akora+ wu ta va ndhawu yo vundza eka yona ya tihomu,Eka vanhu va mina lava ndzi lavaka.
11 Kambe n’wina mi van’wana va lava fularhelaka Yehovha,+Lava rivalaka ntshava ya mina yo kwetsima,+Lava lulamiselaka xikwembu xa Nkateko tafula,Ni lava tataka swinwelo hi vhinyo leyi pfanganisiweke va endlela xikwembu xa Vumundzuku.
12 Hikwalaho mi ta dlayiwa hi banga,+Naswona hinkwenu mi ta khinsama leswaku mi dlayiwa,+Hikuva ndzi mi vitanile kambe a mi ndzi hlamulanga,Ndzi vulavurile, kambe a mi yingisanga;+A mi tshamela ku ndzi dyohela,Mi hlawule ku endla leswi nga ndzi tsakisiki.”+
13 Hikwalaho Yehovha Hosi Leyi Tlakukeke u ri:
“Vonani! Malandza ya mina ma ta dya, kambe mi ta va ni ndlala.+
Vonani! Malandza ya mina ma ta nwa,+ kambe n’wina mi ta va ni torha.
Vonani! Malandza ya mina ma ta tsaka,+ kambe n’wina mi ta khomiwa hi tingana.+
14 Vonani! Malandza ya mina ma ta ba nkulungwana hikwalaho ka leswi timbilu ta wona ti tsakeke,Kambe n’wina mi ta rila hikwalaho ka leswi timbilu ta n’wina ti vavaka,Naswona mi ta kalakala hikwalaho ka gome.
15 Vito ra n’wina ri ta va ndzhukano eka vanhu va mina,Naswona Yehovha Hosi Leyi Tlakukeke u ta mi dlaya hinkwenu,Kambe malandza yakwe u ta ma thya vito rin’wana;+
16 Lerova loyi a tikombelelaka mikateko emisaveniU ta katekisiwa hi Xikwembu xa ntiyiso,*Kasi loyi a hlambanyaka emisaveniU ta hlambanya hi Xikwembu xa ntiyiso.*+
Hikuva a va nge he ma tsundzuki maxangu ya vona;A ndzi nge he ma voni.+
17 Vonani! Ndzi tumbuluxa matilo lamantshwa ni misava leyintshwa;+Swilo swa khale swi ta rivariwa,Naswona a swi nge he ti emiehleketweni.+
18 Hikwalaho khanani, mi tsaka hilaha ku nga heriki hi leswi ndzi swi tumbuluxaka.
Hikuva maswivo! Ndzi ta endla leswaku vanhu va tsaka hikwalaho ka YerusalemaVanhu vakwe va ta khana.+
19 Ndzi ta tsaka hikwalaho ka Yerusalema, ndzi khana hikwalaho ka vanhu va mina;+A ku nge he twali swirilo kumbe ku kalakala emutini wolowo.”+
20 “A ku nge he vi na ricece leri nga ta hanya masikunyana,Kumbe mudyuhari loyi a nga ta fa a nga si hanya malembe lawa a faneleke a hanya wona.
Hikuva munhu loyi a faka a ri ni malembe ya 100, swi ta fana ni loko a fe a ha ri mufana,Kasi mudyohi u ta rhukaniwa hambiloko a ri ni malembe ya 100.*
21 Va ta aka tiyindlu va tshama eka tona,+Va ta rima masimu ya madiriva va dya mihandzu ya wona.+
22 A va nge he aki kutani ku tshama un’wana,A va nge rimi kutani ku dya un’wana.
Hikuva masiku ya vanhu va mina ma ta fana ni masiku ya murhi,+Vanhu va mina lava ndzi va hlawuleke va ta tiphina swinene hi mitirho ya mavoko ya vona.
23 A va nge he tirheli swa hava,+Kumbe va veleka vana lava nga ta xaniseka,Hikuva vona i vanhu lava katekisiweke hi Yehovha,+Swin’we ni vana va vona lava nga na vona.+
24 Ndzi ta va hlamula va nga si kombela mpfuno;Ndzi ta va twa va nga si heta ni ku vulavula.
25 Mhisi ni xinyimpfana swi ta dya swin’we,Nghala yi ta dya byanyi ku fana ni nkuzi,+Swakudya swa nyoka ku ta va ntshuri.
A swi nge he endli swo biha kumbe ku onha entshaveni ya mina yo kwetsima,”+ ku vula Yehovha.
Tinhlamuselo ta le hansi
^ Kumbexana “eswiyindlwanini swa varindzi.”
^ Kumbe “sopo.”
^ Hi Xiheveru, “nkateko.”
^ Hi Xiheveru, “mbewu.”
^ Kumbe “xo tshembeka.” Hi Xiheveru, “Amen.”
^ Kumbe “xo tshembeka.” Hi Xiheveru, “Amen.”
^ Kumbexana “Kasi loyi a faka a ri ni malembe ya 100 u ta tekiwa a rhukaniwile.”
