Esaya 7:1-25
7 Enkarhini wa ku fuma ka Akazi+ n’wana wa Yohatama n’wana wa Uziya, hosi ya le Yuda, Hosi Resini wa Siriya na Peka+ n’wana wa Remaliya hosi ya Israyele, va ta va ta lwa na Yerusalema kambe a va swi kotanga ku wu teka.+
2 Hiloko ndyangu wa Davhida wu twa xiviko lexi nge: “Masocha ya le Siriya ma hlangane ni masocha ya le Efrayimi.”
Kutani Akazi ni vanhu vakwe va sungula ku rhurhumela ku fana ni mirhi ya le khwatini loko yi biwa hi moya.
3 Hiloko Yehovha a byela Esaya a ku: “Ndzi kombela leswaku wena ni n’wana wa wena Xeyara-yatubu*+ mi huma mi ya hlangana na Akazi, emakumu ka mugerho*+ wa le henhla lowu nga endleleni leyi yaka ensin’wini ya muhlantswi.
4 U fanele u n’wi byela u ku, ‘Rhulisa mbilu. U nga chavi, u nga rhurhumeli hikwalaho ka swikundzu swimbirhi leswi nga kusuhi ni ku timeka ni hikwalaho ka ku hlundzuka ka Resini na Siriya ni n’wana wa Remaliya.+
5 Hikuva muti wa Siriya ni wa Efrayimi ni n’wana wa Remaliya va ku bohele kungu, va ku:
6 “A hi fambeni hi ya lwa ni muti wa Yuda kutani hi wu hlula, hi veka n’wana wa Tabele ku va hosi ya wona.”+
7 “ ‘Yehovha Hosi Leyi Tlakukeke u ri:
“A swi nge endleki,Naswona a swi nge humeleli.
8 Hikuva ntsindza wa tiko ra Siriya i Damaska,Kasi hosi ya le Damaska i Resini.
Tiko ra Efrayimi ri ta herisiwa ku nga ha vi na vanhu+Ku nga si hela malembe ya 65.
9 Ntsindza wa tiko ra Efrayimi i Samariya+
Kasi hosi ya le Samariya i n’wana wa Remaliya.+
Loko mi nga vi na ripfumelo leri tiyeke,Mfumo wa n’wina a wu nge tiyi.” ’ ”
10 Yehovha a tlhela a vulavula na Akazi a ku:
11 “Kombela Yehovha Xikwembu xa wena leswaku a ku komba xikombiso;+ xi nga ha va xi ente kukota Sirha* kumbe xi tlakuke kukota xibakabaka.”
12 Kambe Akazi a ku: “A ndzi nge kombeli naswona a ndzi nge n’wi ringi Yehovha.”
13 Hiloko Esaya a tlhela a ku: “Ndzi kombela mi yingisa, n’wina ndyangu wa Davhida. Xana a swi enelanga leswi mi ringeke vanhu? Xana mi fanele mi tlhela mi ringa ni Xikwembu?+
14 Hikwalaho Yehovha u ta mi nyika xikombiso: Vonani! Nhwana u ta tika kutani a veleka n’wana wa jaha+ naswona u ta n’wi thya vito ra Emanuwele.*+
15 Loko se a kota ku hlawula leswinene eka leswo biha u ta dya botere ni vulombe.
16 Hikuva loko mufana a nga si kota ku hlawula leswinene eka leswo biha, matiko ya tihosi timbirhi leti mi ti chavaka ma ta va ma nga ha ri na munhu.+
17 Yehovha u ta ku tisela khombo lerikulu leri wena, vanhu va wena ni vandyangu wa tata wa wena mi nga si tshamaka mi ri vona hi mpfhuka Efrayimi a hambane na Yuda,+ hikuva U ta tisa hosi ya Asiriya.+
18 “Hi siku rero Yehovha u ta ba khwela a vitana tinhongana leti nga eswinambyanini swa le kule swa Nayili eEgipta ni tinyoxi leti nga etikweni ra Asiriya,
19 kutani hinkwaswo swi ta fika swi tshama emikoveni, emabakweni lama nga ni maribye, emakhwatini hinkwawo ya mitwa ni hinkwako laha ku nga ni mati.
20 “Hi siku rero, Yehovha u ta tirhisa xikaringana* lexi lombiweke etikweni leri nga etlhelo ka Nambu* u ta tirhisa hosi ya Asiriya,+ kutani u ta va byevula tinhloko ni milenge ni malepfu.
21 “Hi siku rero munhu u ta siya xirhodyana xin’we entlhambini wakwe ni tinyimpfu timbirhi.
22 Hikwalaho ka leswi ku nga ni ntswamba wo tala, u ta dya botere hikuva vanhu hinkwavo lava nga ta va va sele etikweni va ta dya botere ni vulombe.
23 “Hi siku rero laha a ku ri ni mirhi ya madiriva ya 1 000, leyi ringanaka swiphemu swa silivhere swa 1 000, ku ta va ku ri ni khwati ra mitwa ni nhova ntsena.
24 Vanhu va ta ya kona va khome miseve ni vurha hikuva tiko hinkwaro ri ta va ri ri makhwati ya mitwa ni nhova.
25 Tintshava hinkwato leti a ti hlakuriwa hi xikomu, a wu nge he tshineli eka tona hi ku chava mitwa ni nhova; ti ta va madyelo ya tinkuzi ni tinyimpfu.”
Tinhlamuselo ta le hansi
^ Leswi vulaka “Ku Ta Vuya Lava Nga Ta Sala Ntsena.”
^ Kumbe “ndhawu leyi ku fambaka mati.”
^ Kumbe “Sheol.” Vona Tinhlamuselo.
^ Leswi vulaka “Xikwembu Xi Na Hina.”
^ Kumbe “xisingwana.”
^ Ku nga Yufrata.
