Ezekiyele 24:1-27
24 Yehovha a tlhela a vulavula na mina hi lembe ra vukaye, hi n’hweti ya vukhume, hi siku ra vukhume ra n’hweti a ku:
2 “N’wana wa munhu, tsala siku* leri ehansi. Hi siku leri, hosi ya Babilona yi sungule ku hlasela muti wa Yerusalema.+
3 Byela tiko leri xandzukeke xifaniso,* u vula leswi mayelana na rona:
“‘Yehovha Hosi Leyi Tlakukeke u ri:
“Tseleka poto; ri tseleke endzilweni u ri chela mati.+
4 Chela nyama leyi tsemeleriweke epotweni,+ nyama yin’wana ni yin’wana leyinene,Ndzhumbi ni katla; ri tate hi marhambu lamanene ngopfu.
5 Teka nyimpfu leyinene ngopfu,+ u tshivela tihunyi ti rhendzela poto.
Sweka nyama ni marhambu ya yona.”’
6 “Hikwalaho Yehovha Hosi Leyi Tlakukeke u ri:
‘Khombo eka muti lowu halataka ngati,+ poto leri rhoseke, leri nga susiwangiki rhosi!
Humesa nyama eka rona;+ u nga hoxi vuhlolotwana* hikwalaho ka vona.
7 Hikuva ngati ya yona yi le ndzeni ka yona;+ muti wu yi chulule ehenhla ka ribye.
A wu yi chululanga emisaveni leswaku wu yi seletela hi misava.+
8 Leswaku ndzi rihisela ndzi hlundzukile,Ndzi veke ngati ya wona eribyeni leri vangamakaLeswaku yi nga seleteriwi.’+
9 “Hikwalaho Yehovha Hosi Leyi Tlakukeke u ri:
‘Khombo eka muti lowu halataka ngati!+
Ndzi ta endla nyandza leyikulu ya tihunyi.
10 Hlengeleta tihunyi u tshivela ndzilo,Sweka nyama yi wupfa kahle, u chulula murhu wa yona, u tshika marhambu ma tshwa.
11 Tlhandleka poto emakaleni leswaku ri hisaLeswaku koporo ya rona yi ta hisa ngopfu.
Ku thyaka ka rona ku ta n’okela endzeni+ ni ku rhosa ka rona ku ta hela.
12 Ri heta matimba naswona ra karharisa,Hikuva ku rhosa ka rona a ku nge suki.+
Ri hoxe endzilweni ni rhosi ya rona!’
13 “‘U thyakisiwe hi manyala.+ Ndzi ringete ku ku basisa kambe a wu basi. A wu nge basi kukondza vukarhi bya mina byi hunguteka.+
14 Mina Yehovha ndzi vurile. Swilo leswi swi ta endleka. Ndzi ta teka goza ndzi nga kanakani naswona a ndzi nge vi na ntwelavusiwana kumbe ku tisola.+ Va ta ku avanyisa hi ku ya hi swiendlo swa wena,’ ku vula Yehovha Hosi Leyi Tlakukeke.”
15 Yehovha a tlhela a vulavula na mina a ku:
16 “N’wana wa munhu ndzi ta dlaya loyi u n’wi rhandzaka hi xitshuketa.+ A wu fanelanga u va ni gome; kumbe u rila.
17 Konya u miyerile naswona u nga yi endli mikhuva yo rilela vafi.+ Tibohe duku enhlokweni+ u ambala maphaxani ya wena.+ A wu fanelanga u funengeta malepfu ya le henhla ka nomu+ naswona u nga dyi xinkwa lexi u tiseriweke xona hi vanhu van’wana.”*+
18 Ndzi vulavula ni vanhu nimixo hiloko nsati wa mina a fa nimadyambu. Kutani hi siku leri landzelaka nimixo ndzi endla hilaha ndzi lerisiweke hakona.
19 Vanhu va ku eka mina: “Hi byele leswaku swilo leswi u swi endlaka swi hi khumba njhani.”
20 Ndzi va hlamule ndzi ku: “Yehovha u vulavule na mina a ku,
21 ‘Byela Vaisrayele u ku: “Yehovha Hosi Leyi Tlakukeke u ri, ‘Ndzi ta thyakisa ndhawu ya mina yo kwetsima ku nga ri khale,+ ku nga ndhawu leyi mi tinyungubyisaka hi yona swinene, ndhawu leyi nga ya nkoka eka n’wina ni leyi mi yi rhandzaka hi mbilu hinkwayo. Vana va n’wina lava mi va siyeke va ta dlayiwa hi banga.+
22 Kutani mi ta boheka ku endla hilaha ndzi endleke hakona. A mi nge ma funengeti malepfu ya le henhla ka nomu naswona a mi nge xi dyi xinkwa lexi mi tiseriweke xona hi vanhu van’wana.+
23 Mi ta boha duku naswona mi ta ambala maphaxani emilengeni. A mi nge vi na gome kumbe ku rila. Mi ta onha vutomi bya n’wina mi karharisiwa hi swihoxo swa n’wina+ naswona mi ta langutana mi konya.
24 Ezekiyele u ve xikombiso eka n’wina.+ Mi ta endla hilaha a endleke hakona. Loko swi endleka, mi ta swi tiva leswaku hi mina Yehovha Hosi Leyi Tlakukeke.’”’”
25 “Loko ku ri wena n’wana wa munhu, hi siku leri ndzi nga ta va tekela xisirhelelo xa vona ku nga ndhawu yo saseka leyi va tsakisaka, ndhawu leyi nga ya nkoka eka vona leyi va yi rhandzaka hi mbilu ya vona hinkwayo swin’we ni vana va vona,+
26 ku ta ta munhu loyi a poneke a ta ku vikela.+
27 Hi siku rero u ta pfula nomu wa wena u vulavula ni munhu loyi a poneke, a wu nge he tsandzeki ku vulavula.+ U ta va xikombiso eka vona, kutani va ta swi tiva leswaku hi mina Yehovha.”
Tinhlamuselo ta le hansi
^ Hi Xiheveru, “vito ra siku.”
^ Kumbe “xiphato.”
^ Vona Tinhlamuselo.
^ Hi Xiheveru, “xinkwa xa vanhu.”
