Ezekiyele 30:1-26
30 Yehovha a tlhela a vulavula na mina a ku:
2 “N’wana wa munhu, profeta u ku, ‘Yehovha Hosi Leyi Tlakukeke u ri:
“Huwelelani, ‘Yoo, siku ri le ku teni!’
3 Hikuva siku ri le kusuhi, siku ra Yehovha ri le kusuhi.+
Ri ta va siku ra mapapa,+ nkarhi lowu vekiweke wa matiko.+
4 Banga ri ta ta eEgipta naswona Etiyopiya u ta chava loko lava dlayiwaka va wa eEgipta;Rifuwo ra rona ra tekiwa ni masungulo ya rona ma hirimuxiwa.+
5 Etiyopiya,+ Putu,+ Ludi ni hinkwavo lava humaka ematikweni man’wana,Kubu ni vana va tiko leri ndzi endleke ntwanano na rona,*Hinkwavo ka vona va ta dlayiwa hi banga.”’
6 “Yehovha u ri:
‘Lava seketelaka Egipta na vona va ta dlayiwa,Ni matimba lawa a tinyungubyisaka ha wona ma ta herisiwa.’+
“‘Va ta dlayiwa hi banga ku sukela eMigidoli+ ku ya eSeyene,’+ ku vula Yehovha Hosi Leyi Tlakukeke.
7 ‘Va ta endliwa rhumbi ku tlula matiko hinkwawo, miti ya kona yi ta onhiwa ku tlula miti hinkwayo.+
8 Va ta swi tiva leswaku hi mina Yehovha loko ndzi lumeka ndzilo eEgipta ni ku lovisa matiko hinkwawo lawa a tirhisanaka na wona.
9 Hi siku rero ndzi ta rhumela varhumiwa hi swikepe leswaku va endla Etiyopiya loyi a titshembaka a rhurhumela; va ta chava hi siku leri telaka Egipta, hikuva ri ta ta hakunene.’
10 “Yehovha Hosi Leyi Tlakukeke u ri: ‘Ndzi ta herisa mitshungu ya Egipta hi ku tirhisa Hosi Nebukadnetsara* wa le Babilona.+
11 Yena ni masocha yakwe lama nga ni tihanyi swinene exikarhi ka matiko,+ va ta tisiwa leswaku va lovisa tiko leri. Va ta hlomula mabanga ya vona va lwa na Egipta, va tata tiko rero hi mitsumbu.+
12 Ndzi ta endla leswaku migerho* ya Nayili+ yi oma naswona ndzi ta xavisela vanhu vo homboloka tiko rero. Ndzi ta tirhisa vanhu vo huma ematikweni man’wana leswaku va endla tiko rero ni swilo hinkwaswo leswi nga eka rona rhumbi.+ Mina Yehovha ndzi vurile.’
13 “Yehovha Hosi Leyi Tlakukeke u ri: ‘Ndzi ta tlhela ndzi herisa swifaniso leswi nyenyetsaka* ni swikwembu leswi nga pfuniki nchumu swa le Nofu.*+ A ku nge he vi na hosana* leyi humaka etikweni ra Egipta naswona ndzi ta endla leswaku tiko ra Egipta ri chava.+
14 Ndzi ta endla leswaku Patirosi+ a va rhumbi, ndzi lumeka ndzilo eSowana, ndzi avanyisa No.*+
15 Ndzi ta chululela vukarhi bya mina ehenhla ka Sini, xisirhelelo xa Egipta, ndzi lovisa vaaki va le No.
16 Ndzi ta lumeka ndzilo eEgipta; Sini u ta chava naswona masocha ma ta nghena hi nkani eNo, kasi Nofu* u ta hlaseriwa dyambu ri lo hosi!
17 Majaha ya le Oni* ni le Pibeseti ma ta dlayiwa hi banga kasi vaaki va miti yoleyo va ta yisiwa evuhlongeni.
18 Ku ta va ni munyama eTahapenese ninhlikanhi loko ndzi tshova majoko ya Egipta kwalaho.+ Matimba lawa a tinyungubyisaka ha wona ma ta hela,+ u ta funengetiwa hi mapapa naswona swimitana swakwe swi ta yisiwa evuhlongeni.+
19 Ndzi ta avanyisa Egipta, va ta swi tiva leswaku hi mina Yehovha.’”
20 Hi lembe ra vu-11, hi n’hweti yo sungula, hi siku ra vunkombo ra n’hweti, Yehovha a vulavula na mina a ku:
21 “N’wana wa munhu, ndzi tshove voko ra Faro hosi ya le Egipta; a ri nge boheleriwi leswaku ri ta hola kumbe ri tsondzeriwa hi bandichi leswaku ri va ni matimba yo khoma banga.”
22 “Hikwalaho Yehovha Hosi Leyi Tlakukeke u ri: ‘Ndzi lwa na Faro hosi ya le Egipta,+ ndzi ta tshova mavoko ya yena, leri nga ni matimba ni leri tshovekeke+ naswona ndzi ta endla leswaku banga ri wa evokweni rakwe.+
23 Ndzi ta hangalasa Vaegipta exikarhi ka matiko, ndzi va hangalasa etindhawini to hambanahambana.+
24 Ndzi ta tiyisa mavoko* ya hosi ya le Babilona,+ ndzi yi khomisa banga ra mina,+ ndzi ta tshova mavoko ya Faro naswona u ta konya swinene ku fana ni munhu loyi a faka emahlweni ka yena.*
25 Ndzi ta tiyisa mavoko ya hosi ya Babilona kambe mavoko ya Faro ma ta hela matimba; va ta swi tiva leswaku hi mina Yehovha loko ndzi khomisa hosi ya le Babilona banga ra mina, yi ri tirhisa ku lwa ni tiko ra Egipta.+
26 Ndzi ta hangalasa Vaegipta exikarhi ka matiko,+ va ta swi tiva leswaku hi mina Yehovha.’”
Tinhlamuselo ta le hansi
^ Kumbexana ku vulavuriwa hi Vaisrayele lava a va tirhisana ni tiko ra Egipta.
^ Hi Xiheveru, “Nebukadretsara,” ku nga matsalelo lama hambaneke.
^ Kumbe “misele.”
^ Kumbe “ndhuna.”
^ Kumbe “Memfisi.”
^ Xiga xa Xiheveru lexi tirhisiweke laha xi nga ha fambisana ni rito leri vulaka “vulongo” naswona xi tirhisiwa ku kombisa leswaku nchumu wo karhi a wu xiximiwi.
^ Ku nga Tebesi.
^ Kumbe “Memfisi.”
^ Ku nga Heliyopolisi.
^ Kumbe “engetela matimba.”
^ Hileswaku, emahlweni ka hosi ya Babilona.
