Ezekiyele 32:1-32
32 Hi lembe ra vu-12, hi n’hweti ya vu-12, hi siku ro sungula ra n’hweti, Yehovha a tlhela a vulavula na mina a ku:
2 “N’wana wa munhu, yimbelela risimu ra xirilo mayelana na Faro hosi ya le Egipta, u ku eka yena,‘A wu fana ni xinghalana lexi nga ni matimba xa matiko,Kambe u miyetiwile.
A wu fana ni xivandzana xa le lwandle,+ u hlambela emilambyeni ya wena,U pfindlusa mati hi milenge ya wena u tlhela u thyakisa milambu.’
3 Yehovha Hosi Leyi Tlakukeke u ri:
‘Ndzi ta lahlela nete ya mina ehenhla ka wena ndzi tirhisa ntlawa wa matiko yo tala,Kutani ma ta ku koka hi rikoka ra mina.
4 Ndzi ta ku tshika etikweni;Ndzi ta ku cukumeta enhoveni.
Ndzi ta endla leswaku swinyenyana hinkwaswo swi tshama ehenhla ka wena,Ndzi ta xurhisa swiharhi swa misava hinkwayo hi wena.+
5 Ndzi ta cukumeta nyama ya wena etintshaveni,Ndzi tata minkova hi masalela ya wena.+
6 Ndzi ta tsakamisa tiko hi ngati ya wena leyi khulukaka ku ya fika etintshaveni,Yi ta tata swinambyana.’
7 ‘Loko u timiwa, ndzi ta pfala matilo ndzi endla tinyeleti ti va munyama.
Ndzi ta funengeta dyambu hi mapapa,N’weti a wu nge humesi ku vonakala ka wona.+
8 Timboni hinkwato leti voningaka ematilweni ndzi ta ti endla munyama hikwalaho ka wena,Ndzi ta endla leswaku tiko ra wena ri va ni munyama,’ ku vula Yehovha Hosi Leyi Tlakukeke.
9 ‘Ndzi ta endla leswaku timbilu ta vanhu vo tala ti karhateka loko ndzi humesa mahlonga ya wena ma ya ematikweni man’wana,Matiko lawa u nga ma tivangiki.+
10 Ndzi ta endla leswaku vanhu vo tala va hlamala,Tihosi ta vona ti ta rhurhumela hi ku chava hikwalaho ka wena, loko ndzi vangamisa banga ra mina emahlweni ka tona.
Ti ta tshamela ku rhurhumela, yin’wana ni yin’wana yi chavela vutomi bya yona,Hi siku leri u nga ta wa ha rona.’
11 Hikuva Yehovha Hosi Leyi Tlakukeke u ri:
‘U ta hlaseriwa hi banga ra hosi ya le Babilona.+
12 Ndzi ta endla leswaku mitshungu leyi nga na wena yi dlayiwa hi mabanga ya tinhenha leti nga ni matimba,Ta matiko lama nga ni tihanyi swinene, hinkwayo ka yona.+
Ma ta herisa swilo leswi tiko ra Egipta ri tinyungubyisaka ha swona naswona mitshungu leyi ri nga na yona yi ta lovisiwa.+
13 Ndzi ta lovisa swifuwo swa yena hinkwaswo leswi nga ekusuhi ni mati yakwe yo tala,+A ku na nenge wa munhu kumbe wa xifuwo lowu nga ta tlhela wu ma pfindlusa.’+
14 ‘Hi nkarhi wolowo ndzi ta endla mati ya vona ma basa,Milambu ya vona ndzi ta yi endla yi khuluka ku fana ni mafurha,’ ku vula Yehovha Hosi Leyi Tlakukeke.
15 ‘Loko ndzi endla tiko ra Egipta ri va rhumbi, tiko leri tekeriweke swilo swa rona hinkwaswo,+Loko ndzi dlaya vaaki hinkwavo va rona,Va ta swi tiva leswaku hi mina Yehovha.+
16 Leri i risimu ra xirilo, vanhu va ta ri yimbelela;Vanhwanyana va matiko va ta ri yimbelela.
Va ta ri yimbelelela tiko ra Egipta ni mitshungu ya rona hinkwayo,’ ku vula Yehovha Hosi Leyi Tlakukeke.”
17 Hi lembe ra vu-12, hi siku ra vu-15 ra n’hweti, Yehovha a vulavula na mina a ku:
18 “N’wana wa munhu, rilela mitshungu ya Egipta, u n’wi rhelerisa esirheni, yena ni vanhwanyana va matiko lama nga ni matimba ni lava rhelelaka esirheni.
19 “‘U tlula mani hi ku saseka? Rhelela u ya lahliwa ni lava nga yimbangiki!’
20 “‘Va ta wela exikarhi ka lava dlayiweke hi banga.+ U nyiketiwe ebangeni; n’wi kokeni a suka swin’we ni mitshungu yakwe hinkwayo.
21 “‘Tinhenha leti nga ni matimba swinene ti ta vulavula na yena ni lava n’wi pfunaka ti ri endzenindzeni ka Sirha.* Va ta rhelela naswona va ta lahliwa ku fana ni vanhu lava nga yimbangiki lava dlayiweke hi banga.
22 Asiriya ni ntshungu wakwe hinkwawo va kwalaho. Masirha ya vona ma n’wi rhendzerile, hinkwavo va dlayiwe hi banga.+
23 Masirha yakwe ma le ndzenindzeni ka sirha ni ntshungu wakwe wu rhendzele sirha rakwe, hinkwavo va dlayiwe hi banga hikuva va vange ku chava etikweni ra lava hanyaka.
24 “‘Elami+ u kwalaho ni mitshungu yakwe hinkwayo yi rhendzele sirha rakwe, hinkwavo va dlayiwe hi banga. Va rhelele va nga yimbanga esirheni, lava vangeke ku chava etikweni ra lava hanyaka. Va ta byarha tingana ta vona ni lava rhelelaka esirheni.
25 Va n’wi endlele mubedo exikarhi ka lava dlayiweke swin’we ni mitshungu yakwe hinkwayo leyi rhendzeleke masirha yakwe. Hinkwavo a va yimbanga, va dlayiwe hi banga hikuva va vange ku chava etikweni ra lava hanyaka; naswona va ta byarha tingana ta vona ni lava rhelelaka esirheni. U vekiwe exikarhi ka lava dlayiweke.
26 “‘Mixeke na Tubala+ swin’we ni mitshungu ya vona* hinkwayo va kwalaho. Masirha ya vona* ma n’wi rhendzerile. Hinkwavo a va yimbanga, va tlhaviwe hi banga hikuva va vange ku chava etikweni ra lava hanyaka.
27 Xana a va nge lahliwi ni tinhenha ta matimba leti nga yimbangiki, leti rheleleke eSirheni* ni matlhari ya tona? Va ta veka mabanga ya tona ehansi ka tinhloko ta tona* naswona swidyoho swa tona swi ta va ehenhla ka marhambu ya tona, hikuva tinhenha leti ta matimba ti vange ku chava etikweni ra lava hanyaka.
28 Kambe wena u ta lovisiwa exikarhi ka lava nga yimbangiki naswona u ta lahliwa ni lava dlayiweke hi banga.
29 “‘Edomu+ u kwalaho, tihosi ta yena ni tindhuna ta yena hinkwato ti lahliwe exikarhi ka lava dlayiweke hi banga hambileswi a ti ri ni matimba; na tona ti ta lahliwa ni lava nga yimbangiki+ ni lava rhelelaka esirheni.
30 “‘Tihosana* ta le n’walungwini ti kwalaho swin’we ni Vasidoni+ hinkwavo, lava rheleleke ni tingana swin’we ni lava dlayiweke hambileswi va vangeke ku chava hikwalaho ka matimba ya vona. Va ta lahliwa va nga yimbanga swin’we ni lava dlayiweke hi banga naswona va ta byarha tingana ta vona ni lava rhelelaka esirheni.
31 “‘Faro u ta vona vanhu lava hinkwavo naswona u ta chaveleleka eka hinkwaswo leswi endlekeke eka mitshungu yakwe;+ Faro ni masocha yakwe hinkwawo va ta dlayiwa hi banga,’ ku vula Yehovha Hosi Leyi Tlakukeke.
32 “‘Hikwalaho ka leswi a vangeke ku chava etikweni ra lava hanyaka, Faro ni mitshungu yakwe hinkwayo va ta lahliwa* ni lava nga yimbangiki, lava dlayiweke hi banga,’ ku vula Yehovha Hosi Leyi Tlakukeke.”
Tinhlamuselo ta le hansi
^ Kumbe “Sheol.” Vona Tinhlamuselo.
^ Hi Xiheveru, “yena.”
^ Hi Xiheveru, “yena.”
^ Kumbe “eSheol.” Vona Tinhlamuselo.
^ Kumbexana ku vulavuriwa hi tinhenha leti a ti lahliwa ni mabanga ya tona, ku ri ndlela yo ti xixima.
^ Kumbe “Varhangeri.”
^ Hi Xiheveru, “etlela.”
