Ezekiyele 42:1-20
42 Hiloko a ndzi yisa exivaveni* xa mani na mani etlhelweni ra le n’walungwini.+ Kutani a ndzi yisa emuakweni wa makamara yo dyela eka wona lowu a wu ri etlhelo ka ndhawu leyi pfulekeke,+ en’walungwini wa muako lowu nga ekusuhi na wona.+
2 Ndhawu ya wona yo nghena ha yona ya le n’walungwini a yi lehe swisungunu swa 100* yi anama swisungunu swa 50.*
3 Xivava xa vaprista a xi aname swisungunu swa 20*+ naswona makamara yo dyela eka wona a ma ri exikarhi ka xivava xa vaprista ni xivava xa mani na mani. Makamara yo dyela eka wona a ma ri swithezi swinharhu leswi nga ni makupakupa naswona makupakupa ya kona a ma langutanile.
4 Emahlweni ka makamara yo dyela eka wona a ku ri ni phaseji ya le ndzeni+ leyi anameke swisungunu swa khume* yi leha swisungunu swa 100* naswona tindhawu to nghena ha tona eka makamara lawa a ti ri en’walungwini.
5 Makamara yo dyela eka wona ya le ka xithezi xa le henhla xa muako a ma nga anamanga ku fana ni lama nga eka xithezi xa le hansi ni xa le xikarhi hikuva makupakupa a ma dye ndhawu ya wona.
6 Hikuva a ma ri eka xithezi xa vunharhu, kambe a ma nga ri na tiphuphu to fana ni ta swivava. Hi yona mhaka leyi ku tekiweke ndhawu yo tala eka wona ku tlula lama nga eka xithezi xa le hansi ni xa le xikarhi.
7 Khumbi ra maribye ra le handle leri a ri ri ekusuhi ni makamara yo dyela eka wona etlhelweni ra xivava xa mani na mani lexi languteke makamara laman’wana yo dyela eka wona a ri lehe swisungunu swa 50.
8 Hikuva makamara yo dyela eka wona lawa a ma ri etlhelweni ra xivava xa mani na mani a ma lehe swisungunu swa 50 kambe lama languteke ndhawu yo kwetsima a ma lehe swisungunu swa 100.
9 Makamara yo dyela eka wona a ma ri ni ndlela yo nghena eka wona hi le vuxeni ku sukela exivaveni xa mani na mani.
10 Nakambe a ku ri ni makamara yo dyela eka wona endzeni ka khumbi ra maribye ra xivava etlhelweni ra le vuxeni, ekusuhi ni rivala ni muako.+
11 A ku ri ni phaseji emahlweni ka wona yo fana ni leyi nga emakamareni yo dyela eka wona ya le n’walungwini.+ A ma ringana hi ku leha ni hi ku anama naswona a ma ri ni tinyangwa to huma ha tona ni tipulani leti fanaka. Tindhawu to nghena ha tona ta wona
12 a ti fana ni tindhawu to nghena ha tona ta makamara yo dyela eka wona lawa a ma ri etlhelweni ra le dzongeni. A ku ri ni ndhawu yo nghena ha yona eku sunguleni ka phaseji, emahlweni ka khumbi ra maribye leri a ri ri ekusuhi etlhelweni ra le vuxeni laha munhu a a kota ku nghena ha kona.+
13 A ku eka mina: “Makamara yo dyela eka wona ya le n’walungwini ni makamara yo dyela eka wona ya le dzongeni lama nga etlhelo ka ndhawu leyi pfulekeke+ i makamara yo kwetsima yo dyela eka wona, lawa vaprista lava tshinelaka eka Yehovha va dyelaka kona magandzelo yo kwetsima ngopfu.+ Va ma veka kwalaho magandzelo yo kwetsima ngopfu, gandzelo ra mavele, gandzelo ra xidyoho ni gandzelo ra nandzu hikuva i ndhawu yo kwetsima.+
14 Loko vaprista va nghena, a va fanelanga va huma endhawini yo kwetsima va ya exivaveni xa mani na mani va nga rhanganga hi ku hluvula swiambalo leswi va tirhaka ha swona,+ hikuva swa kwetsima. Va ta ambala swiambalo swin’wana leswaku va kota ku nghena eka tindhawu leti vanhu van’wana va pfumeleriweke ku nghena eka tona.”
15 Loko a heta ku pima ndhawu ya le ndzeni ya tempele, u ndzi humese hi gede leyi languteke evuxeni+ naswona u pime ndhawu hinkwayo.
16 A pima tlhelo ra le vuxeni hi rihlanga ro pima ha rona.* Hi ku ya hi rihlanga leri, tlhelo leri a ri lehe tinhlanga ta 500* ku suka eka tlhelo rin’we ku ya eka lerin’wana.
17 A pima tlhelo ra le n’walungwini naswona hi ku ya hi rihlanga ro pima ha rona, a ri lehe tinhlanga ta 500.
18 A pima tlhelo ra le dzongeni naswona hi ku ya hi rihlanga ro pima ha rona, a ri lehe tinhlanga ta 500.
19 A rhendzeleka a ya etlhelo ra le vupeladyambu. A pima ndhawu leyi leheke tinhlanga ta 500 hi rihlanga ro pima ha rona.
20 A yi pima matlhelo ya mune. A yi ri ni khumbi leri yi rhendzeleke+ leri a ri lehe tinhlanga ta 500 ri anama tinhlanga ta 500,+ leswaku ri hambanisa ndhawu leyi kwetsimaka ni leyi nga kwetsimiki.+
Tinhlamuselo ta le hansi
^ Vona Tinhlamuselo.
^ Kumbe “51,8 wa timitara.”
^ Kumbe “25,9 wa timitara.”
^ Kumbe “10,4 wa timitara.”
^ Kumbe “5,2 wa timitara.”
^ Hi ku ya hi Septuagint ya Xigriki, “a yi lehe swisungunu swa 100.” Ndzimana ya Xiheveru yi hlayekisa xileswi: “Ndlela ya xisungunu xin’we.” Vona Xiengetelo B14.
^ Vona Xiengetelo B14.
^ Kumbe “1 555 wa timitara.”
