Ezekiyele 46:1-24
46 “Yehovha Hosi Leyi Tlakukeke u ri: ‘Gede ya xivava* xa vaprista, leyi languteke evuxeni+ yi fanele yi tshama yi pfariwile+ ku ringana masiku ya tsevu+ lawa ku tirhiwaka ha wona, kambe hi siku ra Savata ni hi siku leri ku thwasaka n’weti yi fanele yi pfuriwa.
2 Ndhuna yi ta nghena hi le handle hi ndlela ya le rikupakupeni ra gede+ naswona yi ta yima egedeni. Vaprista va ta nyikela gandzelo ra yona ro hisiwa ni magandzelo ya yona yo kombela ku rhula naswona yi ta khinsama egedeni kutani yi huma. Kambe gede a yi fanelanga yi pfariwa ku fikela nimadyambu.
3 Nakambe vanhu va tiko va ta khinsama emahlweni ka Yehovha endhawini yo nghena ha yona ya gede yoleyo hi Tisavata ni hi masiku ya ku thwasa ka n’weti.+
4 “‘Gandzelo ro hisiwa leri nga ta nyikeriwa hi ndhuna eka Yehovha hi siku ra Savata ri fanele ri va swinyimpfana swa tsevu leswi hanyeke kahle ni khuna leri hanyeke kahle.+
5 Gandzelo ra mavele ri ta va mpimo wa efa* eka khuna ni hinkwaswo leswi yi kotaka ku swi humesa eka swinyimpfana swa xinuna swin’we ni hini* ya mafurha eka mpimo wun’wana ni wun’wana wa efa.+
6 Hi siku ra ku thwasa ka n’weti ku ta endliwa gandzelo hi xinkuzana lexi hanyeke kahle, swinyimpfana swa xinuna swa tsevu ni khuna; hinkwaswo swi fanele swi va swi hanye kahle.+
7 Yi fanele yi humesa gandzelo ra mavele ra mpimo wa efa eka xinkuzana, mpimo wa efa eka khuna ni leswi yi nga kotaka ku swi humesa eka swinyimpfana swa xinuna. Yi fanele yi nyikela hini ya mafurha eka mpimo wun’wana ni wun’wana wa efa.
8 “‘Loko ndhuna yi nghena, yi fanele yi nghena hi ndlela ya rikupakupa* ra gede naswona yi fanele yi huma hi laha yi ngheneke hakona.+
9 Loko vanhu va tiko va ta emahlweni ka Yehovha hi nkarhi wa mikhuvo,+ lava nghenaka hi gede ya le n’walungwini+ leswaku va ta gandzela va fanele va huma hi gede ya le dzongeni+ ni lava nghenaka hi gede ya le dzongeni va fanele va huma hi gede ya le n’walungwini. A nga kona loyi a faneleke a huma hi gede leyi a ngheneke ha yona, hikuva va fanele va huma hi gede leyi va langutaneke na yona.
10 Ndhuna leyi nga exikarhi ka vona yi fanele yi nghena loko va nghena naswona yi fanele yi huma loko va huma.
11 Hi nkarhi wa mikhuvo ni hi tinguva ta mikhuvo, gandzelo ra mavele ri fanele ri va mpimo wa efa eka xinkuzana, mpimo wa efa eka khuna ni leswi yi kotaka ku swi humesa eka swinyimpfana swa xinuna, ni hini ya mafurha eka mpimo wun’wana ni wun’wana wa efa.+
12 “‘Loko ndhuna yi nyikela gandzelo ro hisiwa+ kumbe gandzelo ro kombela ku rhula ri ri gandzelo ro tirhandzela eka Yehovha, yi ta pfuleriwa gede leyi languteke evuxeni naswona yi ta humesa gandzelo ra yona ro hisiwa ni gandzelo ra yona ro kombela ku rhula hilaha yi endlaka hakona hi siku ra Savata.+ Loko yi humile, gede yi fanele yi pfariwa.+
13 “‘Siku rin’wana ni rin’wana u fanele u nyikela xinyimpfana xa xinuna lexi hanyeke kahle, lexi nga ni lembe xi va gandzelo ro hisiwa eka Yehovha.+ U fanele u endla leswi mixo wun’wana ni wun’wana.
14 Mixo wun’wana ni wun’wana u fanele u nyikela hi hafu ya seya* ku va gandzelo ra mavele swin’we ni xinyimpfana, ku katsa ni mafurha lama nga le henhlanyana ka litara yo n’wan’wasela emapeni lama silekeke kahle swi va gandzelo leri nyikeriwaka eka Yehovha nkarhi ni nkarhi. Lowu i nawu wa hilaha ku nga heriki.
15 Va fanele va humesa xinyimpfana xa xinuna, gandzelo ra mavele ni mafurha mixo wun’wana ni wun’wana swi va gandzelo ro hisiwa ra nkarhi ni nkarhi.’
16 “Yehovha Hosi Leyi Tlakukeke u ri: ‘Loko ndhuna yi nyika vana va yona ndhawu tanihi nyiko yi va ndzhaka, yi ta va ya vana va yona. I ndhawu ya vona leyi va yi kumeke yi va ndzhaka.
17 Kambe loko yo nyika un’wana wa malandza ya yona ndhawu yi va nyiko, yi ta va ya yena ku fikela hi lembe ra ntshunxeko;+ kutani endzhaku ka sweswo yi ta tlheriseriwa eka ndhuna. I vana va yona ntsena lava ndzhaka ya vona yi nga ta va ya vona hilaha ku nga heriki.
18 Ndhuna a yi fanelanga yi teka ndzhaka ya vanhu hi ku va sindzisa leswaku va suka endhawini ya vona. Yi fanele yi nyika vana va yona ndzhaka endhawini ya yona leswaku ku nga vi ni munhu exikarhi ka vanhu va mina loyi a hlongoriwaka endhawini yakwe.’”
19 Hiloko a ndzi nghenisa hi laha ku ngheniwaka ha kona+ etlhelo ka gede leyi yaka eka makamara yo dyela eka wona yo kwetsima* ya vaprista, lama languteke en’walungwini+ naswona kwalaho ndzi vona ndhawu etlhelweni ra le vupeladyambu hi le ndzhaku.
20 A ku eka mina: “Leyi i ndhawu leyi vaprista va nga ta swekela eka yona gandzelo ra nandzu ni gandzelo ra xidyoho ni laha va nga ta ri bakela kona gandzelo ra mavele,+ leswaku va nga humi na nchumu exivaveni xa mani na mani leswaku va hundzisela ku kwetsima eka vanhu.”+
21 U ndzi humese a ndzi yisa exivaveni xa mani na mani a ndzi hundzisa hi le tikhonweni ta mune ta xivava, naswona ndzi vone xivava eka khona yin’wana ni yin’wana ya xivava xa mani na mani.
22 Eka tikhona ta mune ta xivava a ku ri ni xivava lexitsongo, lexi a xi ringana ni swivava swin’wana, ha xin’we a xi lehe swisungunu swa 40* xi anama swisungunu swa 30.* Hinkwaswo a swi ringana.
23 Eka xivava xin’wana ni xin’wana a ku ri ni makhumbi lamatsongo lama xi rhendzeleke naswona exikarhi ka wona a ku akiwe tindhawu to swekela eka tona magandzelo.
24 Kutani a ku eka mina: “Leti i tiyindlu leti lava tirhaka etempeleni va swekelaka eka tona magandzelo ya vanhu.”+
Tinhlamuselo ta le hansi
^ Vona Tinhlamuselo.
^ Vona Xiengetelo B14.
^ Vona Xiengetelo B14.
^ Kumbe “vhurandi.”
^ Hi Xiheveru, “1/6 ya efa.” Vona Xiengetelo B14.
^ Kumbe “makamara yo kwetsima.”
^ Kumbe “20,7 wa timitara.” Laha ku kombeteriwa eka swisungunu swo leha. Vona Xiengetelo B14.
^ Kumbe “15,5 wa timitara.”
