Habakuku 2:1-20
2 Ndzi ta tshama ndzi yimile+ endhawini ya mina yo rindza,Ndzi ta rindza emakhumbini ya muti.
Ndzi ta tshama ndzi rindzile leswaku ndzi tiva leswi a lavaka ndzi swi vula,Ni leswi ndzi nga ta swi vula loko ndzi tshinyiwa.
2 Kutani Yehovha a ndzi hlamula a ku:
“Tsala xivono lexi, u xi tsala swi vonaka kahle eswiphepherheleni,+Leswaku loyi a xi hlayaka a xi hlaya hi ku olova.+
3 Hikuva xivono lexi i xa nkarhi lowu takaNaswona xi hatlisela ku hetiseka, a xi nge hembi.
Hambiloko xo hlwela,* tshama u xi rindzerile!+
Hikuva xi ta hetiseka.
A xi nge hlweli!
4 Languta loyi a tinyungubyisaka;A nga lulamanga nikatsongo.
Kambe lowo lulama u ta hanya hikwalaho ka ku tshembeka kakwe.+
5 Hakunene, leswi vhinyo yi kanganyisaka,Munhu la tikukumuxaka a nge yi fikeleli pakani yakwe.
A nga xurhi ku fana ni Sirha;*U fana ni rifu a nga eneriseki.
U tshamela ku hlengeleta matiko hinkwawo,A tlhela a tihlengeletela vanhu hinkwavo.+
6 Xana vanhu lava hinkwavo a va nge vuli marito yo tlhokovetsela, yo vungunya ni mawetana* ku lwisana na yena?+
Va ta ku:
‘Khombo eka loyi a hlengeletaka leswi nga riki swa yena,Loyi a engetelaka xikweleti xakwe!U ta swi endla ku fikela rini?
7 Xana lava ku lombaka mali a va nge ku pfukeli u nga swi rindzelanga?
Va ta pfuka va ku hlasela hi tihanyi,U ta va nchumu lowu va nga ta wu phanga.+
8 Hikwalaho ka leswi u phangeleke matiko yo tala,Vanhu hinkwavo va ta ku phangela,+Hikwalaho ka leswi u halateke ngati ya vanhu,U vanga madzolonga emisaveni,Emitini ni le ka vanhu lava tshamaka eka yona.+
9 Khombo eka loyi a fuwisaka yindlu ya yena hi swilo swo biha,Leswaku a veka xisaka xakwe laha ku tlakukeke,Leswaku a balekela khombo!
10 U kunguhatele yindlu ya wena tingana.
U dyohile hileswi u dlayeke vanhu vo tala.+
11 Hikuva ribye ri ta rila ri ri ekhumbini,Kutani mhandzi yi ta ri hlamula yi ri elwangwini.
12 Khombo eka loyi a akaka muti hi ku halata ngati,Ni loyi a wu simekaka hi leswi nga lulamangiki!
13 Xana a swi humi eka Yehovha wa mavuthu leswaku vanhu va ta tirha hi matimba ivi leswi va swi tirheleke swi helela endzilweni,Nileswaku matiko ma tirhela swa hava?+
14 Hikuva misava hinkwayo yi ta tala hi ku tiva ku vangama ka YehovhaHilaha mati ma funengetaka lwandle hakona.+
15 Khombo eka loyi a nyikaka vanghana vakwe swakunwaA swi hlanganisa ni vukarhi ni ku hlundzuka leswaku a va dakwisa,Hi xikongomelo xo lava ku va vona va nga ambalanga!
16 Ematshan’weni yo xiximiwa u ta nyumisiwa.
Na wena nwana, va ta ku vonela leswaku a wu yimbanga.*
Xinwelo lexi nga evokweni ra xinene ra Yehovha xi ta fika eka wena,+Ku xiximeka ka wena ku ta hundzuka tingana;
17 Hikuva tihanyi leti endliweke eka Lebanoni ti ta endliwa eka wena,Ni ku lovisiwa loku chaviseke swiharhi ku ta ku fikela,Hikwalaho ka leswi u halateke ngati ya vanhuNi leswi u onheke misava,Miti ni lava va tshamaka eka yona.+
18 Xana xifaniso lexi vatliwekeXi n’wi pfuna yini muendli wa xona?
Xana xifaniso xa nsimbhi ni mudyondzisi wa mavunwa swi pfuna yini,Hambiloko muendli wa swona a swi tshemba,A endla swikwembu leswi nga pfuniki nchumu, leswi nga vulavuliki?+
19 Khombo eka loyi a byelaka xigodo* a ku, “Pfuka!”
Kumbe eka ribye a ku, “Pfuka! Hi dyondzise!”
Waswivo! Swi namekiwe nsuku ni silivhere,+Kambe a swi hefemuli.+
20 Kambe Yehovha u le tempeleni yakwe yo kwetsima.+
Misava hinkwayo a yi miyele emahlweni ka yena!’”+
Tinhlamuselo ta le hansi
^ Kumbe “xi vonaka xi hlwela.”
^ Kumbe “Sheol.” Vona Tinhlamuselo.
^ Kumbe “mitshayito.”
^ Kumbexana “u dedeleka.”
^ Kumbe “ntsandza.”
