Hosiya 1:1-11
1 Rito ra Yehovha leri fikeke eka Hosiya* n’wana wa Beri enkarhini wa ku fuma ka Uziya,+ Yohatama,+ Akazi+ na Hezekiya,+ tihosi ta Yuda,+ ni le nkarhini wa ku fuma ka Yerobuwamu+ n’wana wa Yowasi,+ hosi ya Israyele.
2 Loko Yehovha a sungula ku vulavula na Hosiya, Yehovha u vulavule na yena a ku: “Famba u ya teka nghwavava, yi ta ku velekela vana lava nga riki va wena, hikuva tiko ri tshike ku landzela Yehovha hikwalaho ka vunghwavava bya rona.”+
3 Hiloko a famba a ya teka Gomere n’wana wa Diblayimi, ivi a tika a n’wi velekela n’wana wa jaha.
4 Yehovha a ku eka yena: “N’wi thye vito ra Yizriyele,* hikuva ku nga ri khale ndzi ta xupula ndyangu wa Yehu+ hikwalaho ko halata ngati eYizriyele naswona ndzi ta herisa vuhosi bya yindlu ya Israyele.+
5 Esikwini rero ndzi ta tshova vurha* bya Israyele eNkoveni wa Yizriyele.”
6 Hiloko Gomere a tlhela a tika kutani a veleka n’wana wa nhwanyana. Kutani Xikwembu xi byela Hosiya xi ku: “N’wi thye vito ra Lo-ruhama,* hikuva a ndzi nge he tlheli ndzi va ni tintswalo+ eka yindlu ya Israyele, ndzi ta va hlongola.+
7 Kambe ndzi ta va ni tintswalo eka yindlu ya Yuda,+ ndzi ta va ponisa, mina Yehovha Xikwembu xa vona;+ a ndzi nge va ponisi hi vurha kumbe hi banga, kumbe hi nyimpi, kumbe hi tihanci, kumbe hi vagadi va tihanci.”+
8 Endzhaku ka loko Gomere a lumule Lo-ruhama, u tlhele a tika a veleka n’wana wa jaha.
9 Xikwembu xi ku eka Hosiya: “N’wi thye vito ra Lo-ami,* hikuva n’wina a mi vanhu va mina naswona mina a ndzi nge vi Xikwembu xa n’wina.
10 “Vanhu va Israyele va ta tala ku fana ni sava ra lwandle, leri nga pimekiki kumbe ku hlayeka.+ Kutani endhawini leyi va byeriweke leswaku, ‘A mi vanhu va mina,’+ va ta byeriwa leswaku, ‘N’wina mi vana va Xikwembu lexi hanyaka.’+
11 Vanhu va Yuda ni va Israyele va ta hlengeletana va va nchumu wun’we,+ va ta tihlawulela murhangeri un’we va huma etikweni, hikuva siku ra Yizriyele+ ri ta va rikulu.
Tinhlamuselo ta le hansi
^ I nkomiso wa vito leri nge Hoxaya, leri vulaka “Ku Ponisiwa Hi Yehovha; Yehovha U Ponisile.”
^ Leswi vulaka “Xikwembu Xi Ta Byala Mbewu.”
^ Kumbe “mpaxu.”
^ Leswi vulaka “A Va Kombiwanga Musa.”
^ Leswi vulaka “A Hi Vanhu Va Mina.”
