Hosiya 10:1-15
10 “Israyele u fana ni murhi wa madiriva lowu nga bola* lowu tswalaka mihandzu.+
Loko mihandzu ya yena yi andza, u andzisa ni tialtari ta yena.+Loko tiko ra yena ri va ni ndzalo, u endla tiphuphu to saseka leti a ti hundzuleke swikwembu.+
2 Mbilu ya vona yi ni vukanganyisi;Va ta dyiwa hi nandzu.
Ku ni loyi a nga ta tshova tialtari ta vona a tlhela a herisa timhandzi leti ku gandzeriwaka eka tona.
3 Va ta ku, ‘A hi na hosi+ hikuva a hi n’wi chavanga Yehovha.
Niloko a hi ri ni hosi, a yi ta hi endlela yini?’
4 Va vulavula marito lama nga pfuniki nchumu, va endla switshembiso swa mavunwa+ ni mintwanano;Vuavanyisi bya vona byi fana ni swimilana leswi nga ni chefu emasin’wini.+
5 Vaaki va Samariya va ta twa ku vava hikwalaho ka xifaniso xa rhole xa le Beta-avheni.+
Vanhu va xona va ta xi rilela,Swin’we ni vaprista va xona lava a va xi tsakela, hikwalaho ka ku vangama ka xona,Hikuva xi ta ya evuhlongeni.
6 Xi ta yisiwa eAsiriya xi va nyiko ya hosi leyikulu.+
Efrayimi u ta khomisiwa tingana,Kutani Israyele u ta khomiwa hi tingana hikwalaho ka xona.+
7 Samariya ni hosi ya yena va ta lovisiwa,*+Ku fana ni xirhabyana lexi phaphamalaka ematini.
8 Tindhawu leti tlakukeke ta Beta-avheni+ leti endlaka leswaku Israyele+ a dyoha ti ta lovisiwa.+
Tialtari ta vona ti ta mila mitwa.+
Vanhu va ta byela tintshava va ku, ‘Hi funengeteni!’
Va byela swintshabyana va ku, ‘Hi weleni!’+
9 Wena Israyele u dyohile ku sukela emasikwini ya leswi humeleleke eGibiya.+
A va hundzukanga.
Nyimpi a yi va hetanga vana lava nga lulamangiki eGibiya.
10 Ndzi ta va xupula loko ndzi swi rhandza.
Vanhu va ta hlengeletana va lwa na vona,Va ta xupuriwa hi ku rhwala milandzu ya vona yimbirhi.*
11 Efrayimi a a ri thokazi* leri leteriweke leri a ri rhandza ku hula,Hikwalaho a ndzi n’wi pananga.
Kambe sweswi ndzi ta endla leswaku ku va ni loyi a gadaka* Efrayimi.+
Yuda u ta rima; Yakobo u ta faya mabuwu.
12 Byalani ku lulama mi tshovela rirhandzu ra ntiyiso.
Rimani masimu lama rimekaka+Loko ka ha ri ni nkarhi wo lavisisa Yehovha,+Kukondza a fika a ta mi dyondzisa hi ku lulama.+
13 Kambe mi rime leswo homboloka,Mi tshovele leswi nga lulamangiki,+Mi kume vuyelo bya vuxisi bya n’wina;Hikuva mi titshembe ngopfu,Mi tshemba ni mavuthu ya n’wina.
14 Vanhu va n’wina va ta hlaseriwa,Miti ya n’wina leyi biyeriweke yi ta lovisiwa,+Ku fana ni ku lovisiwa ka yindlu ya Arabela hi Xalimani,Hi siku ra nyimpi loko vamanana va dlayeteriwa ni vana va vona.
15 Leswi hi leswi u nga ta endliwa swona wena Bethele,+ hikwalaho ka vubihi bya wena lebyikulu.
Hosi ya Israyele yi ta lovisiwa* hi nkarhi wa vurhonga.”+
Tinhlamuselo ta le hansi
^ Kumbexana “nava.”
^ Hi Xiheveru, “miyetiwa.”
^ Ku nga ku rhwala nxupulo wa vona ku fana ni joko.
^ Ku nga homu ya xisati leyitsongo leyi nga si vaka ni marhole.
^ Kumbe “panaka.”
^ Hi Xiheveru, “miyetiwa.”
