Mitirho 18:1-28
18 Endzhaku ka sweswo a suka eAtena a ya eKorinto.
2 Kutani a kuma Muyuda un’wana la vuriwaka Akhwila,+ la velekiweke ePonto loyi a a ha ku fika a huma eItaliya ni nsati wakwe Prisila, hikuva Klawudiyo a a lerise Vayuda hinkwavo leswaku va suka eRhoma. Hiloko a ya eka vona,
3 naswona leswi a va endla ntirho lowu fanaka, u tshame ekaya ra vona a tirha na vona,+ hikuva hi ntirho a va ri vaendli va matende.
4 A a hamba a va ni mbulavulo esinagogeni+ savata yin’wana ni yin’wana+ naswona a a khorwisa Vayuda ni Magriki.
5 Kuteloko Silasi+ na Timotiya+ va fika va huma eMakedoniya, Pawulo a khomeka ngopfu hi rito, a chumayela Vayuda ku tiyisekisa leswaku Yesu i Kreste.+
6 Kambe endzhaku ka loko va n’wi kanetile ni ku n’wi sandza, a dzudza swiambalo swakwe+ a ku eka vona: “Ngati ya n’wina a yi ve ehenhla ka tinhloko ta n’wina.+ Mina a ndzi na nandzu.+ Ku sukela sweswi ndzi ta ya eka vanhu va matiko.”+
7 Hiloko a suka kwalaho* a ya endlwini ya wanuna loyi a vuriwaka Titiyo Yusto, mugandzeri wa Xikwembu, loyi yindlu yakwe a yi vandzakane ni sinagoga.
8 Kambe Krispo+ mulanguteri wa sinagoga a va mupfumeri eHosini swin’we ni ndyangu wakwe hinkwawo. Vakorinto vo tala lava va swi tweke na vona va va vapfumeri kutani va khuvuriwa.
9 Ku tlula kwalaho, Hosi yi byela Pawulo exivonweni nivusiku yi ku: “U nga chavi, yana emahlweni u dyondzisa, u nga tshiki,
10 hikuva ndzi na wena+ naswona a nga kona munhu loyi a nga ta ku hlasela a ku vavisa; hikuva ndzi ni vanhu vo tala emutini lowu.”
11 Hiloko a tshama kona lembe ni tin’hweti ta tsevu, a dyondzisa rito ra Xikwembu exikarhi ka vona.
12 Loko Galiyo a ri holobye* wa le Akaya, Vayuda va hlasela Pawulo va n’wi yisa ehubyeni,
13 va ku: “Wanuna loyi u kucetela vanhu ku gandzela Xikwembu hi ndlela leyi nga fambisaniki ni nawu.”
14 Kambe loko Pawulo a ha lava ku vulavula, Galiyo a byela Vayuda a ku: “Hakunene loko a ku ri hileswaku ku ni xidyoho xo karhi kumbe vugevenga lebyikulu, a ndzi ta tinyika nkarhi wo mi yingisela n’wina Vayuda.
15 Kambe loko ku ri hi leswaku mi kanetana hi marito ni mavito ni timhaka leti khumbaka nawu wa n’wina,+ swi lulamiseni hi n’wexe. A ndzi lavi ku va muavanyisi wa swilo sweswo.”
16 Hiloko a va hlongola ehubyeni.
17 Kutani hinkwavo va khoma Sostena+ mulanguteri wa sinagoga, va sungula ku n’wi ba emahlweni ka huvo. Kambe Galiyo a nga vanga na mhaka ni swilo leswi.
18 Hambiswritano, endzhaku ko tshama masiku yo hlayanyana, Pawulo a lela vamakwavo kutani a tlutela eSiriya, a heleketiwa hi Prisila na Akhwila. Misisi yakwe a yi tsemetiwe yi va yitsongo eKenikreya+ hikuva a a endle xihlambanyo.
19 Hiloko va fika eEfesa, kutani a va siya kwalaho; kambe a nghena esinagogeni a kanerisana ni Vayuda.+
20 Hambileswi a va tshamela ku n’wi kombela leswaku a tshama nkarhi wo lehanyana, a nga pfumelanga
21 kambe u va lerile kutani a ku eka vona: “Ndzi ta tlhela ndzi vuya eka n’wina loko Yehovha* a swi rhandza.” Hiloko a suka eEfesa a famba hi xikepe
22 a ya eKhezariya. Kutani a tlhandluka* a ya pfuxela vandlha endzhaku ka sweswo a ya eAntiyoka.+
23 Loko a tshame nkarhinyana kwalaho, u sukile a ya etindhawini to hambanahambana etikweni ra Galatiya ni ra Frigiya+ a tiyisa vadyondzisiwa hinkwavo.+
24 Kutani Muyuda un’wana la vuriwaka Apolosi+ la velekeriweke eAleksandriya, a fika eEfesa; a a ri wanuna la nga ni vuswikoti byo vulavula naswona a a ma tiva kahle Matsalwa.
25 Wanuna loyi a a dyondzisiwe* ndlela ya Yehovha,* naswona a gingiriteka hikwalaho ka moya wa Xikwembu, a a vulavula ni ku dyondzisa hi ndlela ya ntiyiso swilo leswi khumbaka Yesu, kambe a a tolovelane ni nkhuvulo wa Yohane ntsena.
26 A sungula ku vulavula hi xivindzi esinagogeni kutani loko Prisila na Akhwila+ va n’wi twa, va famba na yena kutani va n’wi hlamusela kahle ndlela ya Xikwembu.
27 Ku tlula kwalaho, leswi a a lava ku tsemakanya a ya eAkaya, vamakwavo va tsalela vadyondzisiwa, va va khongotela leswaku va n’wi amukela hi musa. Loko a fika kwalaho, u va pfune ngopfu lava veke vapfumeri hikwalaho ka musa lowukulu wa Xikwembu;
28 hikuva u kombise erivaleni ni hi ku tiyimisela leswaku Vayuda va hoxisile, a va komba hi Matsalwa leswaku Yesu i Kreste.+
Tinhlamuselo ta le hansi
^ Ku nga esinagogeni.
^ Mufumi wa xifundzha wa le Rhoma. Vona Tinhlamuselo.
^ Vona Xiengetelo A5.
^ Swi nga endleka ku vulavuriwa hi Yerusalema.
^ Kumbe “a a lo byeriwa kunene.”
^ Vona Xiengetelo A5.
