Mitirho 20:1-38
20 Loko hasahasa yi herile, Pawulo a vitana vadyondzisiwa naswona endzhaku ko va khutaza ni ku va lela, a suka a ya eMakedoniya.
2 Endzhaku ka loko a endzele swifundzha sweswo naswona a khutaze lava a va kumeke kwalaho hi marito yo tala, u ye eGrikiya.
3 U hete tin’hweti tinharhu kwalaho, kambe leswi Vayuda+ a va n’wi bohele xikungu loko a ri kusuhi ni ku khandziya xikepe a ya eSiriya, u teke xiboho xo tlhela hi le Makedoniya.
4 A a famba na Sopatere n’wana wa Piro wa le Beriya, Aristako+ na Sekundo va le Tesalonika, Gayo wa le Derbe, Timotiya+ na Tixiko+ na Trofimo+ lava humaka exifundzheni xa Asiya.
5 Vavanuna lava va rhange va famba va ya hi yimela eTrowasi;
6 kambe hi suke eFilipiya hi xikepe endzhaku ka masiku ya Swinkwa Leswi Nga Riki Na Comela,+ hi fike eka vona eTrowasi ku nga si hela masiku ya ntlhanu naswona hi tshame masiku ya nkombo kwalaho.
7 Hi siku ro sungula ra vhiki, loko hi hlengeletanile leswaku hi ta dya swakudya, Pawulo u sungule ku vulavula na vona tanihi leswi a a ta famba hi xa mundzuku xa kona; naswona u vulavule na vona nkarhi wo leha kukondza ku va exikarhi ka vusiku.
8 A ku ri ni mavoni yo hlayanyana ekamareni ra le henhla laha a hi hlengeletane kona.
9 Jaha rin’wana leri vuriwaka Yutiko a ri tshame efasitereni kutani ri khomiwa hi vurhongo lebyikulu loko Pawulo a ri karhi a vulavula hiloko vurhongo byi ri hlula, ri wa ku suka eka xithezi xa vunharhu, va ri tlakula ri file.
10 Kambe Pawulo a ya exithezini xa le hansi a fika a tilahlela ehenhla ka rona kutani a ri angarha+ a ku: “Tshikani ku ba pongo, hikuva wa hanya.”+
11 Hiloko a ya exithezini xa le henhla a fika a dya swakudya.* A ya emahlweni a bula na vona nkarhi wo leha ku fikela hi matakuxa, endzhaku ka sweswo a khoma ndlela a famba.
12 Hiloko va teka jaha ri ri karhi ri hanya naswona a va chaveleleke ngopfu.
13 Hi khandziye xikepe hi rhanga hi ya eAso, laha a hi ta hundza hi teka Pawulo hikuva a a hi byele leswaku hi hundza hi n’wi teka kwalaho hileswi yena a a tiyimisele ku ya kona hi milenge.
14 Kutani loko a hi kuma eAso, hi fambe na yena hi xikepe hi ya eMitilena.
15 Hi xa mundzuku xa kona hi suka kwalaho hi xikepe hi ya fika ekusuhi ni le Kiyo, hi siku ra vumbirhi hi fika eSamosi naswona hi siku ra vunharhu hi fika eMileta.
16 Pawulo a a endle xiboho xa leswaku a nge ngheni eEfesa,+ a a nga lavi ku dya nkarhi exifundzheni xa Asiya hikuva a a jahele ku ya fika eYerusalema+ hi siku ra Nkhuvo wa Pentekosta loko a ta swi kota.
17 Hambiswiritano, loko a ri eMileta u rhumele rito a vitana vakulu va vandlha ra le Efesa.
18 Loko va fika eka yena a ku: “Mi yi tiva kahle ndlela leyi ndzi tikhomeke ha yona loko ndzi ri na n’wina ku sukela siku ro sungula leri ndzi teke exifundzheni xa Asiya ha rona,+
19 ndzi tirhele Hosi hi ku titsongahata swinene+ ni hi mihloti ni miringo leyi ndzi vangeriweke yona hi Vayuda,
20 naswona a ndzi tshikanga ku mi byela swilo leswi pfunaka,* kumbe ku mi dyondzisa erivaleni+ ni hi yindlu ni yindlu.+
21 Kambe ndzi nyikele vumbhoni lebyi heleleke eka Vayuda ni Magriki mayelana ni ku hundzukela+ eka Xikwembu ni ku va ni ripfumelo eka Hosi ya hina Yesu.+
22 Hambiswiritano, sweswi moya lowo kwetsima wu ndzi susumetela ku ya eYerusalema, hambileswi ndzi nga swi tiviki leswaku ku ta endleka yini hi mina loko ndzi ri kwale,
23 handle ka leswaku emutini wun’wana ni wun’wana moya lowo kwetsima wu tshamela ku ndzi byela leswaku ndzi ta khomiwa ndzi tlhela ndzi xanisiwa.+
24 Nilokoswiritano, a ndzi byi teki byi ri bya nkoka vutomi bya mina kambe loko ntsena ndzo heta tsima ra mina+ ni ntirho lowu Hosi Yesu a ndzi nyikeke wona, wo nyikela vumbhoni lebyi heleleke bya mahungu lamanene ya musa lowukulu wa Xikwembu.
25 “Kutani maswivo, ndza swi tiva leswaku hinkwenu lava ndzi mi chumayeleke hi Mfumo a mi nge he ndzi voni.
26 Hikwalaho ndzi mi vitanile mi ta va timbhoni namuntlha leswaku a ndzi na nandzu wa ngati ya munhu,+
27 hikuva a ndzi tshikanga ku mi byela ndzayo hinkwayo leyi humaka eka Xikwembu.+
28 Tihlayiseni+ mi tlhela mi hlayisa ni ntlhambi hinkwawo, lowu moya lowo kwetsima wu mi vekeke ku va valanguteri va wona,+ ku risa vandlha ra Xikwembu,+ leri xi ri xaveke hi ngati ya N’wana wa xona.+
29 Ndza swi tiva leswaku loko se ndzi fambile ku ta nghena timhisi leti tshikilelaka exikarhi ka n’wina+ naswona ti ta khoma ntlhambi hi tihanyi
30 nakambe exikarhi ka n’wina ku ta va ni vavanuna lava nga ta dyondzisa tidyondzo leti nga riki ntiyiso leswaku va tikokela vadyondzisiwa.+
31 “Hikwalaho tshamani mi rindzile, mi tsundzuka leswaku ku ringana malembe manharhu,+ a ndzi tshikanga ku tsundzuxa un’wana ni un’wana wa n’wina vusiku ni nhlikanhi ndzi ri karhi ndzi rila.
32 Sweswi ndzi mi veka eka Xikwembu ni le ritweni ra xona ra musa lowukulu, ku nga rito leri nga ta mi aka ni ku mi nyika ndzhaka exikarhi ka hinkwavo lava Xikwembu xi va hlawuleke ku va vakwetsimi.+
33 A ndzi navelanga silivhere kumbe nsuku kumbe swiambalo swa munhu un’wana.+
34 N’wina hi n’wexe mi swi tiva kahle leswaku mavoko lawa ya mina ma tirhele swilaveko swa mina+ ni swa lava a ndzi ri na vona.
35 Ndzi mi kombile eka swilo hinkwaswo leswaku hi ku tirha hi matimba hi ndlela leyi,+ mi fanele mi pfuna lava tsaneke naswona mi fanele mi tsundzuka marito ya Hosi Yesu, loko a te: ‘Ku nyika+ swi tisa ntsako lowukulu ku tlula ku amukela.’”
36 Loko a hete ku vula swilo leswi, a khinsama na vona hinkwavo kutani a khongela.
37 Hiloko hinkwavo va sungula ku rila kutani va vukarha Pawulo va tlhela va n’wi tswontswa,
38 hikuva a va twe ku vava swinene ngopfungopfu hileswi a va byeleke leswaku a va nge he tlheli va n’wi vona.+ Hiloko va n’wi heleketa exikepeni.
