Mitirho 22:1-30
22 “Vavanuna, vamakwerhu na n’wina vatatana, ndzi yingiseni loko ndzi tihlamulela eka n’wina.”+
2 Loko va twa leswaku u vulavula na vona hi Xiheveru, va namba va miyela va ku whii, hiloko a ku:
3 “Ndzi Muyuda,+ la velekiweke eTarso le Kilikiya+ kambe ndzi dyondze emutini lowu, ndzi dyondzisiwa hi Gamaliyele,+ ndzi dyondzisiwe ku landzerisisa Nawu wa vakokwana+ naswona ndzi rhandza Xikwembu swinene ku fana na n’wina namuntlha.+
4 Ndzi xanise vanhu lava landzelaka Ndlela leyi kukondza va dlayiwa, a ndzi khoma vavanuna ni vavasati ndzi va boha ndzi va yisa emakhotsweni,+
5 hilaha muprista lonkulu ni vakulukumba hinkwavo va huvo va yi tivaka kahle mhaka leyi. Ndzi tlhele ndzi landza mapapila yo ya khoma vamakwerhu eDamaska eka vona naswona a ndzi ri endleleni yo landza lava a va ri kwale leswaku ndzi va tisa eYerusalema va bohiwile leswaku va ta xupuriwa.
6 “Kambe loko ndzi ri endleleni naswona ndzi ri ekusuhi ni le Damaska, hi nkarhi wa nhlikanhi, hi xitshuketa ndzi rhendzeriwe hi ku vonakala lokukulu loku humaka etilweni,+
7 hiloko ndzi wela ehansi kutani ndzi twa rito ri ku: ‘Sawulo, Sawulo, u ndzi xanisela yini?’
8 Ndzi hlamule ndzi ku: ‘Hi wena mani, Hosi?’ Kutani a ku: ‘Hi mina Yesu wa le Nazareta, loyi u n’wi xanisaka.’
9 Vavanuna lava a ndzi ri na vona va ku vonile ku vonakala kambe a va ri twanga rito ra loyi a a vulavula na mina.
10 Kutani ndzi ku: ‘Ndzi fanele ndzi endla yini Hosi?’ Hosi yi ku: ‘Yima, u ya eDamaska, u ta fika u byeriwa hinkwaswo leswi u faneleke ku swi endla.’+
11 Kambe leswi a ndzi nga ha koti ku vona nchumu hikwalaho ka ku vonakala koloko, lava a ndzi ri na vona va ndzi khome hi voko va ndzi yisa eDamaska.
12 “Hiloko wanuna la vuriwaka Ananiya, loyi a chavaka Xikwembu ni ku landzela Nawu, loyi Vayuda hinkwavo lava tshamaka kwalaho a va vulavula kahle ha yena,
13 a ta eka mina. A fika a yima ekusuhi na mina a ku: ‘Sawulo, makwerhu, tlhela u vona!’ Hiloko hi nkarhi wolowo ndzi languta kutani ndzi n’wi vona.+
14 A ku: ‘Xikwembu xa vakokwa wa hina xi ku hlawurile leswaku u ta tiva ku rhandza ka xona ni ku vona loyi a lulameke+ ni ku twa rito rakwe,
15 hikuva u ta va mbhoni yakwe eka vanhu hinkwavo ya swilo leswi u swi voneke ni ku swi twa.+
16 U nga ha yimayimi, famba u ya khuvuriwa u hlantswa swidyoho swa wena+ hi ku vitana vito rakwe.’+
17 “Kambe loko ndzi tlhelele eYerusalema,+ ndzi biwe hi riphume loko ndzi ri karhi ndzi khongela etempeleni,
18 ndzi n’wi vona kutani a ku: ‘Hatlisa u huma eYerusalema, hikuva a va nge byi amukeli vumbhoni bya wena mayelana na mina.’+
19 Hiloko ndzi ku: ‘Hosi, va swi tiva kahle leswaku a ndzi hamba ndzi khoma ni ku ba lava pfumelaka eka wena emasinagogeni;+
20 naswona loko ku dlayiwa Stefano mbhoni ya wena, a ndzi yime kwalaho ndzi swi seketela, ndzi rindze swiambalo swa lava a va n’wi dlaya.’+
21 Hambiswiritano, u ndzi hlamule a ku: ‘Famba, hikuva ndzi ta ku rhuma ematikweni ya le kule.’”+
22 Va ya emahlweni va n’wi yingisa ku ta fikela loko a heta ku vula marito lawa. Hiloko va huwelela va ku: “Wanuna loyi a a dlayiwe, hikuva a nga faneriwi hi ku hanya!”
23 Leswi a va huwelela ni ku lahletela swiambalo swa vona, va tsutsuxela ni ritshuri emoyeni,+
24 ndhuna ya nyimpi yi lerisa leswaku Pawulo a nghenisiwa egoveleni ra masocha yi tlhela yi vula leswaku u fanele a konanisiwa a ri karhi a biwa, leswaku yi ta swi kumisisa kahle leswi a swi endla vanhu va huwelela Pawulo hi ndlela leyi.
25 Kambe loko va n’wi vambile leswaku a ta biwa hi ximoko, Pawulo a vutisa ndhuna ya masocha leyi a yi yime kwalaho a ku: “Xana swa pfumeleriwa leswaku u ba Murhoma,* loyi a nga si voniwaka nandzu?”*+
26 Loko ndhuna ya masocha yi twa sweswo, yi ya eka ndhuna ya nyimpi yi fika yi ku: “Xana u tiyimisele ku endla yini? Phela wanuna loyi i Murhoma.”
27 Hiloko ndhuna ya nyimpi yi ya eka yena yi fika yi ku: “Ndzi byele, xana u Murhoma?” Yena a ku: “Ina.”
28 Ndhuna ya nyimpi yi ku: “Ndzi xave timfanelo to va muakatiko hi mali yo tala swinene.” Pawulo a ku: “Kambe mina ndzi lo velekeriwa eka tona.”+
29 Hikwalaho, vavanuna lava a va lava ku n’wi konanisa va ri karhi va n’wi ba va hatla va n’wi tshika; hiloko ndhuna ya nyimpi yi sungula ku chava loko yi vona leswaku i Murhoma ni hileswi a yi n’wi bohe hi tinketana.+
30 Kutani hi siku leri landzelaka, leswi ndhuna ya nyimpi a yi lava ku tiva xivangelo lexi a xi endla Vayuda va n’wi hehla, yi n’wi tshunxile yi tlhela yi lerisa vaprista lavakulu ni huvo ya Sanedri hinkwayo leswaku yi hlengeletana. Hiloko yi humesa Pawulo yi fika yi n’wi yimisa exikarhi ka vona.+
