Mitirho 23:1-35
23 Pawulo a langutisisa huvo ya Sanedri a ku: “Vavanuna, vamakwerhu, ripfalo+ ra mina ra ndzi tshunxa emahlweni ka Xikwembu leswaku a ndzi endlanga nchumu xo biha ku ta fikela namuntlha.”
2 Loko muprista lonkulu Ananiya a twa sweswo a lerisa lava yimeke ekusuhi na yena leswaku va n’wi makala nomu.
3 Kutani Pawulo a ku eka yena: “Xikwembu xi ta ku ba, mukanganyisi* ndziwena. Xana u tshama ehansi leswaku u ndzi avanyisa hi ku landza Nawu, kutani hi nkarhi lowu fanaka u tlula Nawu hi ku lerisa leswaku ndzi biwa?”
4 Lava a va yime ekusuhi va ku: “Xana u rhuketela muprista lonkulu wa Xikwembu?”
5 Kutani Pawulo a ku: “Vamakwerhu, a ndzi nga swi tivi leswaku i muprista lonkulu. Hikuva ku tsariwile, ‘U nga tshuki u vulavula swo biha hi mufumi wa vanhu va ka n’wina.’”+
6 Kutani Pawulo, hi ku xiya leswaku ntlawa wun’wana a wu vumbiwa hi Vasaduki kambe lowun’wana a wu ri wa Vafarisi, a huwelela emahlweni ka Sanedri a ku: “Vavanuna, vamakwerhu, ndzi Mufarisi,+ ndzi n’wana wa Vafarisi. Ndzi avanyisiwa hikwalaho ka leswi ndzi nga ni ntshembo wa leswaku vafi va ta pfuxiwa.”
7 Hiloko ku pfuka mholovo exikarhi ka Vafarisi ni Vasaduki hikwalaho ka leswi a vuleke marito lawa naswona huvo a yi nga ha twani.
8 Hikuva Vasaduki va vula leswaku vafi a va nge pfuxiwi naswona a ku na ntsumi kumbe swivumbiwa leswi nga vonakiki, kambe Vafarisi va swi pfumela hinkwaswo.+
9 Hiloko ku va ni huwa leyikulu, kutani vatsari van’wana va ntlawa wa Vafarisi va tlakuka, va sungula ku kariha va ku: “Munhu loyi a nga dyohanga nchumu; kambe loko ku ri ni swivumbiwa leswi nga vonakiki kumbe ntsumi leyi vulavuleke na yena+—.”
10 Loko mholovo yi ya yi kula, ndhuna ya nyimpi yi chava leswaku va nga phatlulela Pawulo, hiloko yi lerisa masocha leswaku ma ya n’wi vutla exikarhi ka vona ma n’wi yisa egoveleni ra masocha.
11 Kambe hi vusiku lebyi landzelaka Hosi yi yima ekusuhi na yena yi ku: “Vana ni xivindzi!+ Hikuva hilaha u nyikeleke vumbhoni lebyi heleleke ha mina eYerusalema, u fanele ku ya endla tano ni le Rhoma.”+
12 Loko ri xa, Vayuda va boha kungu ro dlaya Pawulo, va hlambanya va vula leswaku a va nge dyi kumbe ku nwa va nga si n’wi dlaya.
13 A ku ri ni vavanuna vo tlula 40 lava endleke xihlambanyo lexi.
14 Vavanuna lava va ye eka vaprista lavakulu ni vakulukumba va fika va ku: “Hi endle xihlambanyo xa leswaku a hi nge dyi nchumu nikatsongo hi nga si dlaya Pawulo.
15 Hikwalaho, n’wina ni huvo ya Sanedri byelani ndhuna ya nyimpi leswaku yi n’wi tisa haleno onge hiloko mi lava ku kambisisa mhaka ya yena hi vukheta. Kambe a nga si tshinela, hi ta va hi lunghekile ku heta hi yena.”
16 Hambiswiritano, n’wana wa makwavo wa Pawulo wa xisati a twa hi ta kungu leri ro n’wi tumbelela hiloko a nghena egoveleni ra masocha a fika a vikela Pawulo.
17 Hiloko Pawulo a vitana un’wana wa tindhuna ta masocha a ku: “Teka jaha leri u ri yisa eka ndhuna ya nyimpi, hikuva ri ni mhaka leyi ri lavaka ku n’wi byela yona.”
18 Hiloko yi ri teka yi ri yisa eka ndhuna ya nyimpi, yi fika yi ku: “Pawulo mubohiwa, u ndzi vitanile kutani a kombela leswaku ndzi tisa jaha leri eka wena, hikuva ri ni mhaka leyi ri lavaka ku ku byela yona.”
19 Ndhuna ya nyimpi yi khoma jaha hi voko, va ya yima etlhelonyana kutani yi ku: “Xana u lava ku ndzi byela yini?”
20 Jaha ri ku: “Vayuda va twanane ku ku kombela leswaku u tisa Pawulo ehubyeni ya Sanedri mundzuku, onge hiloko va lava ku kuma vuxokoxoko bya nandzu wakwe.+
21 Kambe va nga ku xisi, hikuva ntlawa wa vona wa vavanuna vo tlula 40, va n’wi tumbelerile naswona va hlambanye ku ka va nga dyi ni ku nwa kukondza va n’wi dlaya;+ kutani sweswi va lunghekile, va rindzele ku twa leswaku u ta ku yini hi mhaka leyi.”
22 Hiloko ndhuna ya nyimpi yi tshika jaha ri famba endzhaku ko ri lerisa yi ku: “U nga byeli munhu leswaku u ndzi byele mhaka leyi.”
23 Kutani yi vitana tindhuna timbirhi ta masocha yi ku: “Lunghisani masocha ya 200 leswaku ma ta macha ma ya eKhezariya, ni masocha ya 70 lama gadeke tihanci ni ya 200 lama hlomeke hi matlhari ma ta suka hi awara ya vunharhu* nivusiku.
24 Nakambe lavelani Pawulo tihanci leti a nga ta famba ha tona, leswaku a ta fika a hlayisekile eka ndhunankulu Felikisi.”
25 Hiloko yi tsala papila leri nge:
26 “Klawudiyo Lisiya, eka Muchaviseki, Ndhunankulu Felikisi: Xewani!
27 Wanuna loyi u khomiwe hi Vayuda naswona a va lava ku n’wi dlaya, kambe ndzi hatle ndzi ta ni masocha ya mina ndzi fika ndzi n’wi ponisa,+ hikuva ndzi twe leswaku i Murhoma.+
28 Leswi a ndzi lava ku tiva xivangelo xa ku n’wi hehla ka vona, ndzi n’wi yise eka huvo ya vona ya Sanedri.+
29 Ndzi kume leswaku u hehliwa hi timhaka leti fambelanaka ni Nawu wa vona,+ kambe a nga na nandzu lowu nga endlaka leswaku a gweviwa rifu kumbe ku pfaleriwa ekhotsweni.
30 Kambe hikwalaho ka leswi ndzi tweke leswaku ku ni lava endleke kungu ro n’wi dlaya,+ ndzi namba ndzi n’wi rhumela eka wena, ni ku lerisa lava n’wi hehlaka leswaku va ta vulavula emahlweni ka wena.”
31 Hikwalaho masocha lawa ma teka Pawulo+ hilaha ma lerisiweke hakona ma n’wi yisa eAntipateri nivusiku.
32 Hi siku leri landzelaka masocha ma tshika Pawulo a famba ni masocha lama gadeke tihanci kutani wona ma tlhelela egoveleni ra masocha.
33 Masocha lama gadeke tihanci ma fike eKhezariya ma nyika ndhunankulu papila ma tlhela ma n’wi siya na Pawulo.
34 Hiloko a ri hlaya kutani a vutisa leswaku a a huma eka xifundzha xihi, a kuma leswaku a a huma eKilikiya.+
35 Kutani ndhunankulu yi ku: “Ndzi ta yingisa mhaka ya wena loko lava ku hehlaka va fika.”+ Yi tlhela yi lerisa leswaku Pawulo a tshama endlwini ya vuhosi ya Heroda a rindziwile.
Tinhlamuselo ta le hansi
^ Hi Xigriki, “wena khumbi leri pendiweke hi pende yo basa.”
^ Ku nga kwalomu ka 9:00 nivusiku.
