Mitirho 3:1-26
3 Siku rin’wana Petro na Yohane a va ya etempeleni hi awara ya vukaye* hi nkarhi wa xikhongelo,
2 a ku tlakuriwe wanuna loyi a tswariweke a lamarile. Siku ni siku a va n’wi veka ekusuhi ni nyangwa ya tempele leyi a yi vuriwa Nyangwa Yo Saseka, leswaku a ta kombela mali eka lava nghenaka etempeleni.
3 Loko a vona Petro na Yohane va ri ekusuhi ni ku nghena etempeleni a sungula ku va kombela mali.
4 Kambe Petro na Yohane, va n’wi languta exikandzeni va ku: “Hi langute.”
5 Hiloko a va langutisa, a langutele ku kuma swo karhi eka vona.
6 Hambiswiritano, Petro a ku: “Silivhere ni nsuku a ndzi na swona, kambe ndzi ta ku nyika leswi ndzi nga na swona. Hi vito ra Yesu Kreste wa le Nazareta, famba!”+
7 Hiloko a n’wi khoma hi voko ra xinene a n’wi yimisa.+ Xikan’wekan’we milenge yakwe yi tiyelela;+
8 a tlula, a sungula ku famba+ a nghena na vona etempeleni, a ri karhi a tlulatlula a dzunisa Xikwembu.
9 Vanhu hinkwavo va n’wi vona a ri karhi a famba a dzunisa Xikwembu.
10 Hiloko va swi xiya leswaku a ku ri wanuna luya a a hamba a tshama enyangweni ya tempele+ leyi vuriwaka Nyangwa Yo Saseka a ri karhi a kombela mali kwalaho, kutani va hlamala swinene va tlhela va tsaka hikwalaho ka leswi swi n’wi humeleleke.
11 Loko wanuna yoloye a ha khomelele Petro na Yohane, vanhu hinkwavo va tsutsumela eka vona laha a ku vuriwa Rikupakupa* Ra Solomoni,+ va hlamarile swinene.
12 Loko Petro a vona sweswo, a vutisa vanhu a ku: “Vavanuna va Israyele, hikwalaho ka yini mi hlamarisiwa hi leswi naswona hikwalaho ka yini mi hi honolela onge hiloko hi n’wi endle a famba hi matimba ya hina kumbe hikwalaho ka ku tinyiketela ka hina eka Xikwembu?
13 Xikwembu xa Abrahama, xa Isaka ni xa Yakobo,+ ku nga Xikwembu xa vakokwa wa hina, xi vangamise Nandza wa xona+ Yesu,+ loyi n’wina mi n’wi nyiketeke+ ni ku n’wi landzula emahlweni ka Pilato, hambileswi yena a a lava ku n’wi tshunxa.
14 Ina, mi landzule munhu yoloye wo kwetsima a tlhela a lulama, kutani mi kombela ku tshunxeriwa munhu loyi a nga mudlayi,+
15 mi dlaya Murhangeri Lonkulu wa vutomi.+ Kambe Xikwembu xi n’wi pfuxile eka lava feke, ku nga mhaka leyi hi nga timbhoni ta yona.+
16 Wanuna loyi mi n’wi vonaka naswona mi n’wi tivaka u hanyisiwe hi vito ra Yesu ni hikwalaho ka ripfumelo ra hina eka vito rakwe. Ripfumelo leri hi nga na rona eka Yesu, ri endle leswaku wanuna loyi a hanyisiwa emahlweni ka n’wina hinkwenu.
17 Kutani, vamakwerhu, ndza swi tiva leswaku mi endle hi ku pfumala vutivi,+ hilaha vafumi va n’wina va endleke hakona.+
18 Kambe hi ndlela yoleyo Xikwembu xi endle leswi xi swi tiviseke vanhu swi nga si endleka hi ku tirhisa vaprofeta, ku nga leswaku Kreste wa xona a a ta xaniseka.+
19 “Hikwalaho, hundzukani+ mi tlhelela eka Xikwembu+ leswaku swidyoho swa n’wina swi ta suriwa,+ leswaku tinguva ta ku phyuphyisiwa ti ta ta ti huma eka Yehovha*
20 ni leswaku a rhumela Kreste loyi mi hlawuleriweke yena, ku nga Yesu.
21 Tilo ri fanele ri n’wi khoma kukondza ku fika nkarhi wa ku pfuxeta swilo hinkwaswo leswi Xikwembu xi vulavuleke ha swona hi ku tirhisa vaprofeta va xona va khale vo kwetsima.
22 Kahlekahle, Muxe u te: ‘Yehovha* Xikwembu xa n’wina u ta mi hlawulela muprofeta wo fana na mina exikarhi ka vamakwenu.+ Mi fanele mi yingisa hinkwaswo leswi a nga ta mi byela swona.+
23 Kunene, loyi a nga ta ka a nga n’wi yingisi Muprofeta yoloye u ta lovisiwa.’+
24 Vaprofeta hinkwavo, ku sukela eka Samuwele ni lava veke kona endzhaku ka yena, vo tala va vona va vulavule hi wona masiku lawa.+
25 Mi vana va vaprofeta ni va ntwanano lowu Xikwembu xi wu endleke ni vatata wa n’wina,+ loko xi byela Abrahama xi ku: ‘Mindyangu hinkwayo emisaveni yi ta katekisiwa hikwalaho ka vana* va wena.’+
26 Endzhaku ko tisa Nandza wa xona, Xikwembu xi rhange xi n’wi rhuma eka n’wina+ leswaku a ta mi katekisa hi ku mi tshikisa swiendlo swa n’wina swo homboloka.”
Tinhlamuselo ta le hansi
^ Ku nga kwalomu ka 3:00 nindzhenga.
^ Kumbe “eVhurandini.”
^ Vona Xiengetelo A5.
^ Vona Xiengetelo A5.
^ Hi Xigriki, “mbewu.”
