Mitirho 5:1-42
-
Ananiya na Safira (1-11)
-
Vaapostola va endla masingita yo tala (12-16)
-
Va khomiwa va tlhela va tshunxiwa (17-21a)
-
Vaapostola va tlhela va yimisiwa emahlweni ka Sanedri (21b-32)
-
‘Hi fanele hi yingisa Xikwembu ku tlula vanhu’ (29)
-
-
Xitsundzuxo xa Gamaliyele (33-40)
-
Ku chumayela hi yindlu ni yindlu (41, 42)
5 Hambiswiritano, wanuna la vuriwaka Ananiya ni nsati wakwe Safira, va xavisa ndhawu yin’wana ya vona.
2 Kambe a tumbeta mali yin’wana ya yona naswona nsati wakwe a a swi tiva kutani a yisa mali yitsongo eka vaapostola.+
3 Kambe Petro a ku: “Ananiya, hikwalaho ka yini Sathana a ku nyike xivindzi xo hembela+ moya lowo kwetsima+ ni ku fihla mali yin’wana ya nsimu?
4 Loko u nga si yi xavisa, xana a yi nga ri ya wena? Niloko u yi xavisile, xana mali ya kona a yi nga ri ya wena ke? Hikwalaho ka yini u bohe ku endla leswi? U hembele Xikwembu, ku nga ri vanhu.”
5 Loko Ananiya a twa sweswo, a wa a fa. Kutani hinkwavo lava tweke mhaka leyi va chava swinene.
6 Hiloko majaha ma suka ma yima ma n’wi tsondzela hi malapi, ma n’wi rhwala ma ya n’wi lahla.
7 Endzhaku ka kwalomu ka tiawara tinharhu, nsati wakwe a nghena naswona a a nga swi tivi leswi nga endleka.
8 Petro a n’wi vutisa a ku: “Ndzi byele, xana n’wina vambirhi mi xavise nsimu hi mali leyi?” Yena a ku: “Ina, hi yi xavise hi mali yoleyo.”
9 Hiloko Petro a ku: “Hikwalaho ka yini n’wina vambirhi mi tibyele ku ringa moya wa Yehovha?* Vona! Vanhu lava lahleke nuna wa wena va le nyangweni, na wena va ta ku rhwala.”
10 Xikan’wekan’we a wela emilengeni ya yena a fa. Loko majaha ma nghena ma n’wi kume a file, ivi ma n’wi rhwala ma ya n’wi lahla etlhelo ka nuna wakwe.
11 Hiloko vandlha hinkwaro ni hinkwavo lava tweke hi swilo leswi va chava swinene.
12 Ku tlula kwalaho, vaapostola va ya emahlweni va endla masingita yo tala ni swihlamariso exikarhi ka vanhu;+ naswona hinkwavo a va hlangana eRikupakupeni* Ra Solomoni.+
13 Vanhu lavan’wana a va nga ri na xivindzi xo va joyina; kambe a va vulavula kahle ngopfu hi vona.
14 Hambiswiritano, lava pfumelaka eka Hosi a va ya va engeteleka, vavanuna ni vavasati vo tala.+
15 Hambi ku ri vavabyi a va va humesela eswitarateni va va lata emasangwini, leswaku loko Petro a hundza van’wana va vona va funengetiwa hi ndzhuti wakwe.+
16 Nakambe mintshungu leyi humaka emitini leyi nga ekusuhi na Yerusalema a yi tshamela ku ta, yi rhwale vanhu lava vabyaka ni lava karhatiwaka hi mimoya leyi nga basangiki, naswona hinkwavo ka vona a va hanyisiwa.
17 Kambe muprista lonkulu ni hinkwavo lava a va ri na yena, lava a va ri va ntlawa wa Vasaduki va tlakuka, va tele mavondzo.
18 Hiloko va khoma vaapostola va va pfalela ekhotsweni ra muti.+
19 Kambe nivusiku, ntsumi ya Yehovha* yi pfula tinyangwa ta khotso,+ yi va humesa kutani yi ku:
20 “Fambani mi ya yima etempeleni, mi fika mi byela vanhu mahungu hinkwawo ya vutomi lebyi.”
21 Endzhaku ka loko va byeriwe sweswo, va ya etempeleni hi matakuxa va fika va sungula ku dyondzisa.
Loko muprista lonkulu ni lava a va ri na yena va fika, va vitana huvo ya Sanedri ni vakulukumba hinkwavo va Vaisrayele, kutani va rhumela vanhu leswaku va landza vaapostola ekhotsweni va va tisa eka vona.
22 Kambe loko tindhuna ti fika ekhotsweni, a ti va kumanga. Hiloko ti tlhelela eka huvo ti fika ti vika,
23 ti ku: “Hi kume khotso ri lotleriwile naswona varindzi a va yime etinyangweni, kambe loko hi pfula a hi kumanga munhu endzeni.”
24 Loko murhangeri wa tempele ni vaprista lavakulu va twa mhaka leyi, va pfilunganyeka hikuva a va nga swi tivi leswaku mhaka leyi yi ta helela kwihi.
25 Kambe ku ta munhu un’wana a fika a ku: “Vavanuna lava mi va pfaleleke ekhotsweni va le tempeleni, va le ku dyondziseni ka vanhu.”
26 Hiloko murhangeri ni malandza yakwe va famba va ya va teka va vuya na vona, a va va lwisanga hikuva a va chava leswaku vanhu va nga va khandla hi maribye.+
27 Kutani va va tisa va fika va va yimisa emahlweni ka huvo ya Sanedri. Muprista lonkulu a va konanisa
28 a ku: “Hi mi lerise leswaku mi nga ha dyondzisi hi vito leri,+ kambe mi tate Yerusalema hi dyondzo ya n’wina naswona mi tiyimisele ku hi rhwexa ngati ya munhu loyi.”+
29 Petro ni vaapostola lavan’wana va hlamula va ku: “Hi fanele hi yingisa Xikwembu tanihi mufumi ku tlula vanhu.+
30 Xikwembu xa vakokwa wa hina xi pfuxe Yesu, loyi mi n’wi dlayeke, mi n’wi hayeka emhandzini.*+
31 Xikwembu xi n’wi tlakusile a va Murhangeri Lonkulu+ ni Muponisi,+ xi n’wi veka evokweni ra xona ra xinene+ leswaku Vaisrayele va ta hundzuka ni ku rivaleriwa swidyoho.+
32 Hina hi timbhoni ta timhaka leti,+ ku katsa ni moya lowo kwetsima,+ lowu Xikwembu xi wu nyikeke lava xi yingisaka tanihi mufumi.”
33 Loko va twa sweswo, va hlundzuka ngopfu lerova va lava ku va dlaya.
34 Kambe Mufarisi un’wana loyi vito ra yena ku nga Gamaliyele+ a suka a yima emahlweni ka huvo ya Sanedri; a a ri mudyondzisi wa Nawu naswona a a xiximiwa hi vanhu hinkwavo, a lerisa leswaku vavanuna lava va humeseriwa ehandle swa xinkarhana.
35 A byela huvo a ku: “Vavanuna va Israyele, tivoneleni eka leswi mi lavaka ku swi endla eka vavanuna lava.
36 Hi xikombiso, ku tshame ku va na Tudasi, loyi a nga vula leswaku i munhu wo hlawuleka naswona u joyiniwe hi vanhu va kwalomu ka 400. Kambe u dlayiwile naswona hinkwavo lava a va n’wi landzela va hangalakile, a ku salanga munhu.
37 Endzhaku ka yena ku humelele Yudasi wa Mugaleliya hi nkarhi wa ku tsarisiwa ka vanhu naswona u kucetele vanhu leswaku va n’wi landzela. Wanuna yoloye na yena u dlayiwile naswona hinkwavo lava a va n’wi landzela va hangalakile.
38 Hikwalaho, emhakeni leyi, ndzi ri eka n’wina, mi nga tikarhati hi vanhu lava, va tshikeni. Hikuva loko kungu kumbe ntirho lowu wu huma eka vanhu, a wu nge tlhaveriwi hi dyambu;
39 kambe loko wu huma eka Xikwembu, a mi nge swi koti ku va tshikisa.+ Handle ka sweswo mi ta tikuma mi ri eku lweni ni Xikwembu hi xoxe.”+
40 Hiloko va n’wi yingisa, kutani va vitana vaapostola, va va ba,+ va va lerisa leswaku va tshika ku vulavula hi vito ra Yesu, kutani va va tshika va famba.
41 Hiloko va suka emahlweni ka huvo ya Sanedri va tsakile+ hikuva a va tekiwa va faneriwa hi ku xaniseka hikwalaho ka vito ra Yesu.
42 Naswona siku ni siku a va ya emahlweni va dyondzisa etempeleni ni hi yindlu ni yindlu+ va nga tshiki va chumayela mahungu lamanene hi ta Kreste, Yesu.+
Tinhlamuselo ta le hansi
^ Vona Xiengetelo A5.
^ Kumbe “eVhurandini.”
^ Vona Xiengetelo A5.
^ Kumbe “ensinyeni.”
