Nahume 2:1-13
2 Loyi a hangalasaka u tile ku ta lwa na wena.*+
Rindza makhokholo.
Tshama u rindze ndlela.
Hloma* u lungheka.
2 Hikuva Yehovha u ta endla leswaku YakoboNa Israyele va tlhela va va ni xindzhuti,Hikuva vahlaseri va va hlaserile;+Va onhe marhavi ya vona ya madiriva.
3 Switlhangu swa vavanuna vakwe va matimba swi pendiwe swi va swo tshwuka,Tinhenha takwe ti ambale swiambalo swo tshwuka.
Makalichi yakwe ya nyimpi lama endliweke hi tinsimbhi ma hatima ku fana ni ndziloHi siku leri a hlomelaka nyimpi,Naswona matlhari lama endliweke hi yunipa ma rhurhumerisiwa.
4 Makalichi ya nyimpi ma tsutsuma hi ndlela leyi nga lawulekiki eswitarateni.
Ma ya ehansi ni le henhla exikarhi ka muti.
Ma vangama ku fana ni swisana swa ndzilo naswona ma hatima ku fana ni rihati.
5 U ta vitana tindhuna takwe ta nyimpi.
Ti ta rhurhumela hi ku chava loko ti ri karhi ti ta.
Ti tsutsumela ekhumbini;Ti ya sirhelela muti.
6 Tinyangwa ta milambu ti ta pfuriwa,Yindlu ya vuhosi yi ta mbundzumuxiwa.
7 Xiboho xi endliwile: Muti a wa ha sirhelelekanga,Vaaki va wona va yisiwa evuhlongeni, malandza ya wona ya xisati ma konya;Ma rila ku fana ni matuva ma ri karhi ma tiba swifuva.
8 Khale Ninivha+ a a fana ni xidziva xa mati,Kambe sweswi vanhu va baleka.
“Yimani! Yimani!”
Kambe a ku na loyi a langutaka endzhaku.+
9 Phanghani silivhere, phanghani nsuku!
Ku ni xuma xo tala swinene.
Ku ni swilo swo hambanahambana swa risima.
10 Muti a wa ha ri na munhu, wu lovisiwile, i rhumbi.+
Timbilu ta vona ta n’oka hi ku chava, matsolo ya vona ma ngundlangundla, masenge ya vona ma rhurhumela;Swikandza swa vona hinkwavo swi ni gome.
11 Ku endleke yini hi muti lowu a wu fana ni ndhawu ya tinghala,+ laha swinghalana a swi dya kona,Laha nghala a yi fambafamba kona ni n’wana wa yona,Ti nga chavisiwi hi munhu?
12 Nghala a yi hlotela vana va yona nyama yo tala ya swiharhi,Yi tlhela yi dlayela tinghala ta yona ta xisati.
Ndhawu ya yona a yi tshama yi tele hi nyama,Ndhawu ya yona a yi tala hi swiharhi leswi handzuleriweke.
13 “Waswivo! Ndzi lwa na wena,” ku vula Yehovha wa mavuthu,+“Ndzi ta hisa makalichi ya wena ya nyimpi hi ndzilo,+Banga ri ta heta swinghalana swa wena.
Ndzi ta herisa swiharhi leswi u swi hlotaka,Varhumiwa va wena a va nge he twakali.”+
