Risimu Ra Solomoni 1:1-17
1 Risimu ra Solomoni leri dumeke:+
2 “Ndzi tswontswe hi nomu wa wena,Hikuva swikombiso swa wena swa rirhandzu swa antswa ku tlula vhinyo.+
3 Nun’hwelo wa mafurha ya wena wa tsakisa.+
Vito ra wena ri fana ni mafurha lama nun’hwelaka lama chuluriweke.+
Hi swona swi endlaka vanhwanyana va ku rhandza.
4 Ndzi teke hi famba swin’we;* a hi tsutsume.
Hosi yi ndzi tise emakamareni ya yona ya le ndzenindzeni!
A hi tsake, hi khana swin’we.
A hi dzunise marito ya wena lama kombisaka rirhandzu lama nga ya nkoka ku tlula vhinyo.
Swa fanela leswaku va* ku rhandza.
5 Ndzi wa ntima kambe ndza languteka, n’wina vanhwanyana va le Yerusalema,Ku fana ni matende ya Kedari,+ ku fana ni malapi ya tende+ ra Solomoni.
6 Mi nga ndzi hlamali leswi ndzi nga dzwihala,Ndzi lo hisiwa hi dyambu.
Vabuti wa mina va ndzi hlundzukerile;Va ndzi veka leswaku ndzi hlayisa masimu ya madiriva,Kambe ndzi tsandzekile ku hlayisa nsimu ya mina ya madiriva.
7 Wena loyi ndzi n’wi rhandzaka swinene,Ndzi byele laha u riselaka kona swifuwo swa wena,+Laha swi vundzaka kona ninhlikanhi.
Hikwalaho ka yini ndzi fanele ndzi fana ni wansati loyi a funengetiweke hi nguvu*Exikarhi ka swifuwo swa vanghana va wena?”
8 “Loko u nga swi tivi, wena wansati wo saseka ngopfu exikarhi ka vavasati,Landzelela mikondzo ya swifuwo,U risa swimbutana swa wena ekusuhi ni matende ya varisi.”
9 “Murhandziwa, ndzi ku fanise ni hanci leyi nga exikarhi ka makalichi ya Faro.+
10 Marhama ya wena ma sasekile exikarhi ka swin’wetsin’wetsi,*Nhamu ya wena yi sasekile loko u ambale vuhlalu.
11 Hi ta ku endlela swin’wetsin’wetsi swa nsukuSwi khavisiwe hi silivhere.”
12 “Loko hosi yi tshame etafuleni ra yona,Mafurha+ ya mina ma humesa nun’hwelo wa wona.
13 Murhandziwa wanga u fana ni nkwama wa mira+ eka minaU etlela exikarhi ka mavele ya mina nivusiku.
14 Murhandziwa wanga u fana ni xichocho xa henna+ eka minaLexi nga exikarhi ka masimu ya madiriva ya Eni-gedi.”+
15 “Vona! U sasekile murhandziwa.
U sasekile. Matihlo ya wena ma fana ni ya matuva.”+
16 “Vona! U sasekile murhandziwa naswona wa ndzi tsakisa.+
Mubedo wa hina wu endliwe hi matluka.
17 Timhandzi ta yindlu ya hina i ta mukedari,Mapulanga ya lwangu ra yindlu* ya hina i mirhi ya yunipa.
Tinhlamuselo ta le hansi
^ Hi Xiheveru, “Ndzi koke.”
^ Ku nga vanhwanyana.
^ Kumbe “nceka lowu funengeriwaka hi munhu loyi a feriweke.”
^ Kumbexana “exikarhi ka misisi leyi lukiweke.”
^ Kumbe “yindlu leyikulu.”
