Swirilo 4:1-22
א [Aleph]
4 Vona ndlela leyi nsuku lowu hatimaka wu dzwihaleke ha yona, nsuku lowunene!+
Vona ndlela leyi maribye yo kwetsima+ ma hangalakeke ha yona eswitarateni!*+
ב [Beth]
2 Vana va risima va le Siyoni, lava nga tshama va va va risima ku fana ni nsuku wa xiyimo xa le henhla,Vona ndlela leyi va voniwaka va fana ni makhuwana ya vumba ha yona,Lama endliweke hi muvumbi!
ג [Gimel]
3 Timhungubye ti humese mavele ti mamisa vana va tona,Kambe nhwanyana wa vanhu va mina u ve ni tihanyi+ ku fana ni tinca emananga.+
ד [Daleth]
4 Ririmi ra ricece leri mamaka ri namarhela malaka ya rona hikwalaho ka torha.
Vana va kombela xinkwa+ kambe a nga kona loyi a va nyikaka xona.+
ה [He]
5 Lava a va tolovele ku dya swakudya swa xiyimo xa le henhla va etlele ni ndlala eswitarateni.+
Lava kuleke hi swiambalo swo durha*+ va handza matala.
ו [Waw]
6 Nxupulo* wa nhwanyana wa vanhu va mina i wukulu ku tlula nxupulo wa xidyoho xa muti wa Sodoma,+Lowu lovisiweke hi nkarhinyana, ku nga ri na loyi a wu pfunaka.+
ז [Zayin]
7 Vanaziri+ va yena a va tenge ku tlula gamboko, va base ku tlula ntswamba.
A va tshwuke ku tlula tikorala; a va fana ni maribye ya nkoka lama vuriwaka safiri lama hatimisiweke.
ח [Heth]
8 Va ntime ku tlula nsiti;A va ha tiviwi eswitarateni.
Tinyama ta vona ti khwanyanile ti namarhela marhambu;+ ti fana ni tihunyi leti omeke.
ט [Teth]
9 Va antswa lava dlayiweke hi banga ku tlula lava dlayiweke hi ndlala,+Hikuva va hela matimba, va tlhaviwa hi banga hileswi ku nga riki na swakudya emasin’wini.
י [Yod]
10 Mavoko ya vavasati lava nga ni ntwelavusiwana ma sweke vana va vona.+
Va ve swakudya swa vona swa xirilo hi nkarhi wa ku wa ka nhwanyana wa vanhu va mina.+
כ [Kaph]
11 Yehovha u kombise vukarhi byakwe;U chulule vukarhi byakwe lebyikulu.+
U lumeka ndzilo eSiyoni lowu hisaka masungulo yakwe.+
ל [Lamed]
12 Tihosi ta misava ni vaaki hinkwavo va yona a va tshembangaLeswaku nala u ta nghena etigedeni ta Yerusalema.+
מ [Mem]
13 A ku ri hikwalaho ka swidyoho swa vaprofeta va yena, swihoxo swa vaprista va yena,+Lava halateke ngati ya vanhu vo lulama exikarhi ka yena.+
נ [Nun]
14 Va tsendzeleke eswitarateni ku fana ni lava feke matihlo.+
Va lo juu, hi ngati,+Lerova a nga kona loyi a kotaka ku khumba swiambalo swa vona.
ס [Samekh]
15 Va va huwelerile va ku: “Sukani! Mi thyakile! Sukani! Sukani! Mi nga hi khumbi!”
Hikuva a va ha ri na makaya vo tsendzeleka kunene.
Vanhu va matiko va te: “A va nge tshami na hina laha.*+
פ [Pe]
16 Yehovha u va hangalasile;+A nge he va tsakeli.
Vanhu a va nge va xiximi vaprista,+ a va nge vi na mhaka ni vakulukumba.”+
ע [Ayin]
17 Matihlo ya hina ma karhele ku langutela mpfuno kambe hi nga wu kumi.+
Hi langutele mpfuno etikweni leri nga hi ponisangiki.+
צ [Tsade]
18 Valala va hina va hi hlotile+ lerova hi tsandzeka ni ku famba eswitarateni.
Hi le kusuhi ni ku herisiwa; masiku ya hina ma herile hikuva makumu ya hina ma fikile.
ק [Qoph]
19 Lava hi hlongorisaka a va ri ni rivilo ro tlula ra magama.+
Va hi hlongorisile etintshaveni; va hi tumbelerile emananga.
ר [Resh]
20 Loyi hi hanyaka hikwalaho ka yena, muhlawuriwa wa Yehovha,+ u pfaleriwe emugodini wa vona lowukulu,+Loyi hi vuleke ha yena hi ku: “Hi ta tshama endzhutini wakwe exikarhi ka matiko.”
ש [Sin]
21 Khana u tsaka, wena nhwanyana wa Edomu,+ loyi a tshamaka etikweni ra Uza.
Kambe ni le ka wena xinwelo xi ta hundzisiwa,+ u ta dakwa u famba u nga ambalanga.+
ת [Taw]
22 Wena nhwanyana wa Siyoni, u hetile ku hakela xihoxo xa wena.
A nge he tlheli a ku yisa evuhlongeni.+
Kambe u ta ba wena nhwanyana wa le Edomu hikwalaho ka xihoxo xa wena.
U ta paluxa swidyoho swa wena.+
Tinhlamuselo ta le hansi
^ Hi Xiheveru, “emahandzeni ya tindlela.”
^ Hi Xiheveru, “va kurisiweke va ambala swo tshwuka.”
^ Hi Xiheveru, “Xihoxo.”
^ Kumbe “he vi valuveri laha.”
