Swirilo 5:1-22
5 Yehovha, tsundzuka leswi nga hi wela.
Languta u vona tingana ta hina.+
2 Ndzhaka ya hina yi nyikiwe vafambi, tiyindlu ta hina ti nyikiwe vanhu lava humaka ematikweni man’wana.+
3 Hi hundzuke vana lava nga riki na tatana; vamana wa hina va fana ni tinoni.+
4 Hi boheka ku xava mati+ yo nwa ni tihunyi.
5 Lava hi hlongorisaka va le kusuhi ni ku hi khoma;Hi karhele kambe a va hi wisisi.+
6 Hi titshege hi Egipta+ na Asiriya+ leswaku hi kuma xinkwa lexi eneleke xo dya.
7 Vakokwa wa hina lava nga dyoha a va ha ri kona, kambe hina hi fanele hi rhwala vuyelo bya swihoxo swa vona.
8 Sweswi hi fumiwa hi malandza; a ku na munhu loyi a hi ponisaka eka wona.
9 Hi kuma xinkwa xa hina hi ku veka vutomi bya hina ekhombyeni,+ hikwalaho ka banga ra le mananga.
10 Nhlonge ya hina yi hisa ku fana ni xitiko xa ndzilo hikwalaho ka ku khomiwa hi ndlala swinene.+
11 Va pfinye vasati va le Siyoni ni vanhwana va miti ya Yuda.+
12 Tihosana ti hayekiwe hi voko ra tona+ naswona vakulukumba a va ha xiximiwi.+
13 Majaha ma rhwala ribye ro sila naswona vafana va wile hikwalaho ko rhwala tihunyi to tika.
14 Vakulukumba a va ha ri kona egedeni ya muti;+ majaha a ma ha chayi vuyimbeleri bya wona.+
15 Timbilu ta hina a ta ha tsakanga; ku cina ka hina ku hundzuke xirilo.+
16 Harhi yi wile enhlokweni ya hina. Khombo eka hina hikuva hi dyohile!
17 Timbilu ta hina ta vava hikwalaho ka leswi,+Ni matihlo ya hina a ma ha voni kahle hikwalaho ka swilo leswi,+
18 Hikwalaho ka leswi Ntshava ya Siyoni yi nga rhumbi;+ timhungubye ti rhendzeleka kona.
19 Yehovha Xikwembu xanga, u tshama exiluvelweni xa vuhosi hilaha ku nga heriki.
Vuhosi bya wena i bya hilaha ku nga heriki.+
20 Hikwalaho ka yini u hi rivala hilaha ku nga heriki naswona u hi tshika nkarhi wo leha swinene?+
21 Yehovha Xikwembu xanga, hi tlherisele eka wena, kutani hi ta tlhelela eka wena hi ku hatlisa.+
Tlhela u hi tisela masiku yo tsakisa ku fana ni lawa hi nga tshama hi va na wona.+
22 Hambiswiritano, u hi lahlele makumu.
U hi hlundzukele ngopfu.+
