Swivuriso 14:1-35
14 Wansati loyi a tlhariheke hakunene u aka yindlu yakwe,+Kambe loyi a nga xiphukuphuku wa yi hirimuxa hi mavoko yakwe.
2 Loyi a fambaka hi vululami u chava Yehovha,Kambe loyi tindlela takwe ti hombolokeke wa N’wi venga.
3 Mavulavulelo ya ku titlakusa ya xiphukuphuku ma fana ni nhonga,Kambe milomu ya lavo tlhariha yi ta va sirhelela.
4 Laha ku nga riki na tihomu xidyelo xi basile,Kambe ntshovelo wo tala wu tisa hi matimba ya nkuzi.
5 Mbhoni yo tshembeka a yi nge hembi,Kambe mbhoni ya mavunwa yi vulavula mavunwa ntsena.+
6 Muhlekuri u lava vutlhari kambe a nga byi kumi,Kambe munhu loyi a nga ni ku twisisa u kuma vutivi hi ku olova.+
7 Hambana ni xiphukuphuku,Hikuva a wu nge kumi vutivi emilon’wini ya xona.+
8 Vutlhari byi endla loyi a tlhariheke a twisisa ndlela leyi a fambaka ha yona,Kambe swiphukuphuku swi xisiwa* hi vuphukuphuku bya swona.+
9 Swiphukuphuku swi endla xihlekiso hi swidyoho swa swona,+Kambe lavo lulama va tiyimisele ku lulamisa timhaka.
10 Mbilu yi tiva leswi yi karhataka,Naswona a ku na munhu un’wana loyi a nga twaka ntsako wa yona.
11 Yindlu ya lavo homboloka yi ta lovisiwa,+Kambe tende ra lavo lulama ri ta ya ri kula.
12 Ku ni ndlela leyi vonakaka yi lulamile eka munhu,+Kambe emakumu yi yisa eku feni.+
13 Munhu a nga ha hleka kasi mbilu yakwe ya vava,Naswona ku tsaka ku nga ha hetelela hi gome.
14 Loyi a nga ni mbilu yo sihalala u ta kuma vuyelo bya tindlela takwe,+Kambe munhu lonene u kuma vuyelo bya swiendlo swakwe.+
15 Munhu loyi a nga riki na ntokoto u tshemba rito rin’wana ni rin’wana,Kambe lowo tlhariha u anakanyisisa hi leswi a nga ta swi endla.+
16 Lowo tlhariha u ni vuxiyaxiya naswona u fularhela leswo biha,Kambe xihunguki a xi na mhaka* naswona xi titshemba ku tlula mpimo.
17 Loyi a hatliselaka ku hlundzuka u endla swilo hi ndlela ya vuphukuphuku,+Kambe munhu loyi a anakanyisisaka* wa vengiwa.
18 Lava nga riki na ntokoto va ta kuma vuphukuphuku,Kambe lavo tlhariha va tlhandlekiwa harhi ya vutivi.+
19 Vanhu lavo biha va ta boheka ku khinsama emahlweni ka lavanene,Kasi lavo homboloka va ta khinsama etigedeni ta lavo lulama.
20 Xisiwana xi vengiwa ni hi vaakelani va xona,+Kambe vanghana va munhu loyi a fuweke va tele.+
21 Loyi a n’wi langutelaka ehansi munhukulobye wa dyoha,Kambe wa tsaka loyi a kombaka xisiwana tintswalo.+
22 Xana lava kunguhataka swilo swo biha a va nge hambuki?
Kambe lava tiyimiseleke ku endla leswinene va ta kombiwa rirhandzu ni ku tshembeka.+
23 Swa vuyerisa ku endla ntirho wun’wana ni wun’wana wo tika,Kambe ku vulavula ntsena swi vanga vusiwana.+
24 Harhi ya lavo tlhariha i rifuwo ra vona;Kambe vuphukuphuku bya swihunguki i vuphukuphuku ntsena.+
25 Mbhoni ya ntiyiso yi ponisa vutomi,Kambe mbhoni ya mavunwa yi vulavula mavunwa ntsena.
26 Munhu loyi a chavaka Yehovha u n’wi tshemba eka swilo hinkwaswo,+Naswona vana va yena va ta kuma vutumbelo.+
27 Ku chava Yehovha i xihlovo xa vutomi,Ku pfuna munhu ku balekela mitlhamu ya rifu.
28 Ku saseka ka hosi i ku tala ka vanhu,+Kambe mufumi loyi a nga riki na vanhu vo va fuma a hi nchumu.
29 Loyi a hlwelaka ku hlundzuka u ni ku twisisa lokukulu,+Kambe loyi a helaka mbilu u kombisa vuphukuphuku bya yena.+
30 Mbilu yo rhula yi hanyisa miri,Kambe mavondzo ma fana ni vuvabyi lebyi borisaka marhambu.+
31 Loyi a dyelelaka xisiwana u rhukana Muendli wa xona,+Kambe loyi a kombisaka xisiwana tintswalo wa N’wi vangamisa.+
32 Lowo homboloka u ta wisiwa hi vubihi byakwe,Kambe lowo lulama u ta kuma vutumbelo eku tshembekeni kakwe.+
33 Munhu loyi a twisisaka u ni vutlhari embilwini yakwe,+Kambe a byi tshami eka swihunguki.
34 Ku lulama ku tlakusa tiko,+Kambe xidyoho xi khomisa vanhu tingana.
35 Hosi yi tsakisiwa hi nandza loyi a endlaka swilo hi ku twisisa,+Kambe yi hlundzukisiwa hi loyi a endlaka swilo leswi khomisaka tingana.+
Tinhlamuselo ta le hansi
^ Kumbexana “swiphukuphuku swi kanganyisa van’wana.”
^ Kumbe “xa hlundzuka.”
^ Kumbe “munhu loyi a nga ni vuswikoti byo anakanyisisa.”
