Swivuriso 26:1-28
26 Ku dzunisiwa a ku xi faneli xiphukuphuku,+Ku fana ni gamboko hi ximumu ni mpfula hi nkarhi wa ntshovelo.
2 Ndzhukano a wu ti ku nga ri na xivangelo lexi twalaka,Ku fana nileswi xinyenyana xi nga ni xivangelo xo baleka ni mbewulani* yi nga ni xivangelo xo haha.
3 Ximoko i xa hanci, tomu i ra mbhongolo,+Kasi nkhavi i wa nhlana wa swiphukuphuku.+
4 U nga hlamuli xiphukuphuku hi ku ya hi vuphukuphuku bya xona,Leswaku na wena u nga fani na xona.
5 Hlamula xiphukuphuku hi ku ya hi vuphukuphuku bya xona,Leswaku xi nga titeki xi tlharihile.+
6 Loyi a tamerisaka xiphukuphuku timhakaU fana ni munhu loyi a titsemaka milenge kutani a tivavisa.*
7 Xivuriso lexi humaka enon’wini wa swiphukuphuku,+Xi fana ni milenge leyi khwitaka* ya munhu la lamaleke.
8 Ku dzunisa xiphukuphuku,+Swi fana ni ku bohelela ribye exipelupelwini.
9 Xivuriso lexi humaka enon’wini wa swiphukuphuku,Xi fana ni mitwa leyi kumekaka evokweni ra xidakwa.
10 Loyi a tholaka xiphukuphuku kumbe lava hundzaka hi ndlela,U fana ni mucopi wa miseve loyi a vavisaka munhu un’wana ni un’wana.
11 Xiphukuphuku xi phindha vuphukuphuku bya xona,+Ku fana ni mbyana leyi tlhelelaka emahlanteni ya yona.
12 Xana u n’wi vonile munhu la anakanyaka leswaku u tlharihile?+
Swa olova ku pfuna xiphukuphuku ku ri ni ku pfuna yena.
13 Lolo ri ri: “Ku ni xinghalana endleleni,Nghala erivaleni ra muti!”+
14 Nyangwa yi tshamela ku hundzuluka eka timeremere* ta yona,Ni lolo ri tano emubedweni wa rona.+
15 Lolo ri hoxa voko ra rona enkambaneni,Kambe a ri na matimba yo ri tlherisela enon’wini wa rona.+
16 Lolo ri anakanya leswaku ri tlhariheKu tlula vanhu va nkombo lava hlamulaka leswi twalaka.
17 Munhu la hundzaka hi ndlela kutani a hlundzukisiwa hi* mholovo leyi nga n’wi khumbiki+U fana ni munhu la khomaka tindleve ta mbyana.
18 Ku fana ni munhu loyi a pengaka loyi a copaka miseve leyi pfurhaka ni leyi dlayaka
19 U tano munhu la kanganyisaka munhukulobye kutani a ku, “A ndzo tlanga!”+
20 Laha ku nga riki na tihunyi, ndzilo wa timeka,Naswona laha ku nga riki na mulumbeti, mholovo a yi vi kona.+
21 Munhu wa tinyimpi la hlohlotelaka mholovo,+U fana ni malahla lama cheriwaka ehenhla ka makala ni tihunyi leti pfurhisaka ndzilo.
22 Marito ya munhu wo hleva ma fana ni swakudya leswitsongo swo nandziha;*Ma mitiwa hi ku hatlisa ma nghena ekhwirini.+
23 Marito ya musa lama vuriwaka hi munhu loyi a nga ni mbilu yo biha+Ma fana ni silivhere leyi namekiweke ehenhla ka xiphemu xa xibya xa vumba.
24 Loyi a vengaka van’wana u tumbeta rivengo rakwe hi milomu yakwe,Kambe embilwini yakwe u tele vukanganyisi.
25 Hambiloko a vulavula hi ndlela ya musa, u nga n’wi tshembi,Hikuva ku ni swilo swa nkombo leswi nyenyetsaka embilwini yakwe.*
26 Hambileswi rivengo rakwe ri tumbetiweke hi vukanganyisi,Vubihi byakwe byi ta paluxiwa emahlweni ka vanhu.
27 Loyi a celaka mugodi u ta wela eka wona,Ni loyi a khunguluxaka ribye ri ta tlhelela eka yena ri n’wi pyanya.+
28 Ririmi leri hembaka ri venga lava ri va twiseke ku vava,Naswona nomu lowu tlhomaka van’wana tinsiva wu vanga ku onhaka.+
Tinhlamuselo ta le hansi
^ Kumbe “nkonjana; nyenga.”
^ Hi Xiheveru, “nwa madzolonga.”
^ Kumbe “lengalengaka.”
^ Ku nga xinsimbana lexi hlanganisaka rivanti ni fureme.
^ Kumbexana “loyi a nghenelelaka.”
^ Kumbe “fana ni swilo leswi mitiwaka hi makolo.”
^ Kumbe “Hikuva mbilu yakwe yi nyenyetsa swinene.”
