Swivuriso 27:1-27
27 U nga tibumi hi siku ra mundzuku,Hikuva a wu swi tivi leswaku ri ta ta na yini.*+
2 Loyi a ku dzunisaka a ku ve un’wana, ku nga ri nomu wa wena;A ku ve van’wana,* ku nga ri milomu ya wena.+
3 Ribye ni sava swa tika,Kambe ku nyenyetsiwa hi xiphukuphuku swi tika ku tlula swilo sweswo haswimbirhi.+
4 Ku kariha ku ni nsele ni ku hlundzuka ku fana ni ndhambi,Kambe i mani la nga tiyelaka ku vondzokiwa?+
5 Swa antswa ku tshinyiwa hi ku kongoma ku ri ni rirhandzu leri tumbeleke.+
6 Timbanga leti vangiweke hi munghana ta tshembeka,+Kambe nala u tswontswa ko tala.*
7 Munhu loyi a xurheke a nga byi lavi vulombe lebyi humaka exihlengeni,Kambe loyi a twaka ndlala u nandziheriwa ni hi swakudya swo bava.
8 Munhu loyi a balekaka ekaya kakweU fana ni xinyenyana lexi balekaka exisakeni xa xona.
9 Mafurha ni murhi wo nun’hwela swi tsakisa mbilu;Swi tano ni hi vunghana lebyi tsakisaka lebyi vaka kona hikwalaho ka ndzayo leyi humaka embilwini.+
10 U nga n’wi rivali munghana wa wena kumbe wa tata wa wena,Naswona u nga ngheni endlwini ya makwenu hi siku ra wena ra khombo;Wa antswa muakelani la nga ekusuhi ku tlula makwenu loyi a nga le kule.+
11 N’wananga, tlhariha u tsakisa mbilu yanga,+Leswaku ndzi ta hlamula loyi a ndzi tlhontlhaka.+
12 Munhu wo tlhariha u vona khombo kutani a tumbela,+Kambe la nga riki na ntokoto u ya emahlweni a famba kutani a langutana ni vuyelo bya swiendlo swakwe.*
13 Teka xiambalo xa wanuna loko a humese xitiyisekiso hikwalaho ka mufambi;Teka xitiyisekiso eka yena loko a xi humesile hikwalaho ka wansati wo huma etikweni rin’wana.+
14 Loko munhu a xeweta munhukulobye hi rito leri tlakukeke a n’wi navelela leswinene ka ha ri mixo swinene,Swi ta tekiwa ku ri ndzhukano eka yena.
15 Nsati wa timholovo u fana ni lwangu leri tshamelaka ku pfuta loko ku na mpfula.+
16 Loyi a nga n’wi lawulaka a nga lawula ni moyaA nga khoma mafurha hi voko rakwe ra xinene.
17 Leswi nsimbhi yi lotaka nsimbhi,Ni munhu u lota munghana wakwe.*+
18 Loyi a khathalelaka nkuwa u ta dya mihandzu ya wona,+Ni loyi a khathalelaka n’wini wakwe u ta xiximiwa.+
19 Leswi mati ma kombisaka xikandza xa munhu,Ni mbilu ya munhu yi kombisa leswi nga embilwini ya munhu un’wana.
20 Sirha ni ndhawu ya ku lovisiwa* a swi eneriseki,+Hambi ku ri matihlo ya munhu a ma eneriseki.
21 Leswi mbita ya ku tengisa yi nga ya silivhere ni xitiko xa ndzilo xi nga xa nsuku,+Ni munhu u kamberiwa hi ku dzunisiwa loku a ku kumaka.*
22 Hambiloko wo kandza xiphukuphuku hi musiKu fana ni mavele lama kandziweke etshurini,Vuphukuphuku bya xona a byi nge suki eka xona.
23 U fanele u wu tiva kahle ntlhambi wa wena.
Ti khathalele kahle* tinyimpfu ta wena,+
24 Hikuva rifuwo a ri tshami hilaha ku nga heriki,+Ni vatukulu va wena a va nge fumi tanihi tihosi hilaha ku nga heriki.
25 Byanyi bya rihlaza byi herile, ku mile byanyi lebyintshwa,Swimilana swa le tintshaveni swa hlengeletiwa.
26 Makhuna lamatsongo ma ku nyika swiambalo,Kasi hi swiphongo u nga xava nsimu.
27 Ku ta va ni ntswamba lowu eneleke wa timbuti lowu u nga ta dya wona,Wu ta dyiwa ni hi ndyangu wa wena ni malandza ya wena ya xisati.
Tinhlamuselo ta le hansi
^ Hi Xiheveru, “leswi ri nga ta swi veleka.”
^ Hi Xiheveru, “muluveri.”
^ Kumbexana “swi nga humi embilwini.”
^ Kumbe “xupuriwa.”
^ Hi Xiheveru, “xikandza xa munghana wakwe.”
^ Kumbe “Sheol na Abadoni.”
^ Kumbe “Ni munhu u fambisana ni ku dzunisiwa kakwe.”
^ Kumbe “Veka mbilu ya wena eka; Ti nyike nkarhi wa wena.”
