Tipisalema 104:1-35
104 Ndzi ta dzunisa Yehovha.+
Yehovha Xikwembu xanga u nkulu ngopfu.+
U ambale xindzhuti ni ku vangama.+
2 U tifunengete hi ku vonakala+ ku fana ni xiambalo;U andlala matilo ku fana ni seyila ya tende.+
3 U veka timhandzi ta makamara yakwe ya le henhla ematini lama nga exibakabakeni,+A endla mapapa* ma va kalichi yakwe,+Yi famba ehenhla ka timpapa ta moya.+
4 U endla tintsumi takwe ti va mimoya,Malandza yakwe ma va ndzilo lowu lovisaka.+
5 U tiyise masungulo ya misava;+A yi nge susiwi endhawini ya yona* hilaha ku nga heriki.+
6 U yi funengete hi xidziva xa mati ku fana ni nguvu.+
Mati a ma funengete tintshava.
7 Ma balekile loko u ma tshinya;+Ma chuhile ma tsutsuma loko ma twa mpfumawulo wa ku dzindza ka wena
8 Tintshava ti tlhandlukile+ ivi mikova yi rhelelaYi ya endhawini leyi u yi endleleke yona.
9 U veke ndzilakana lowu ma nga fanelangiki ma wu hundza,+Leswaku ma nga ha pfuki ma funengete misava.
10 U rhuma swihlovo emikoveni;Swi khuluka exikarhi ka tintshava.
11 Swiharhi hinkwaswo swi nwa kona mati;Timbhongolo ta nhova ti timula kona torha.
12 Ehenhla ka swona ku tshama swinyenyana;Swi yimbelela exikarhi ka nhova yo tlhuma.
13 U cheleta tintshava a ri emakamareni yakwe ya le henhla.+
Misava ya eneriseka hi mihandzu ya mitirho ya wena.+
14 U mirisela tihomu byanyiKasi vanhu u va mirisela swimilana,+Leswaku swi humesa swakudya etikweni
15 Ni vhinyo leyi tsakisaka mbilu ya munhu,+Mafurha lama hatimisaka xikandza,Ni xinkwa lexi nyikaka munhu matimba.*+
16 Mirhi ya Yehovha yi cheletiwa kahle,Mikedari leyi a yi byaleke eLebanoni,
17 Laha swinyenyana swi akaka kona swisaka.
Ntavila*+ yi tshama ehenhla ka mirhi ya yunipa.
18 Tintshava to leha i ta timbuti ta le tintshaveni;+Kasi timbila ti tumbela emaribyeni.+
19 U endle n’weti leswaku wu hambanisa tinguva;Dyambu ri swi tiva kahle leswaku ri fanele ri pela rini.+
20 U tisa munyama ivi ku va vusiku,+Loko swiharhi hinkwaswo swi sungula ku fambafamba.
21 Swinghalana swa bonga loko swi ri karhi swi hlota+Ni ku lava swakudya swa swona leswi humaka eka Xikwembu.+
22 Loko dyambu ri xa,Swa tlhela swi ya etlela etindhawini ta swona.
23 Munhu u ya entirhweni,A tirha ku fikela nimadyambu.
24 Mitirho ya wena yi tele swinene Yehovha Xikwembu xanga!+
Hinkwayo ka yona u yi endle hi vutlhari.+
Misava yi tele hi swilo leswi u swi endleke.
25 Lwandle i rikulu swinene ri tlhela ri anama,Ri ni swilo swo tala ngopfu leswi hanyaka, leswitsongo ni leswikulu.+
26 Swikepe swi famba kwalaho,Na Levhiyathani*+ leyi u yi vumbeke leswaku yi ta tlanga eka rona.
27 Hinkwaswo swi tshembe wenaLeswaku swi kuma swakudya hi nguva ya kona.+
28 Swi hlengeleta leswi u swi nyikaka swona.+
Loko u pfula voko ra wena, swi kuma swilo swo tala leswinene.+
29 Loko u swi fularhela, swa karhateka.
Loko u susa moya lowu swi wu hefemulaka, swa fa swi tlhelela entshurini.+
30 Loko u rhumela moya wa wena, swa tumbuluxiwa,+Naswona u endla leswaku misava yi va leyintshwa.
31 Ku vangama ka Yehovha ku ta tshama hilaha ku nga heriki.
Yehovha u ta tsakela mitirho yakwe.+
32 U languta emisaveni, kutani yi rhurhumela;U khumba tintshava, kutani ti tuvika musi.+
33 Ndzi ta yimbelelela Yehovha+ vutomi bya mina hinkwabyo;Ndzi ta yimbelelela Xikwembu xanga tinsimu ndzi xi dzunisa loko ntsena ndza ha hanya.+
34 Leswi ndzi swi anakanyaka a swi n’wi tsakise.*
Ndzi ta tsaka eka Yehovha.
35 Vadyohi va ta herisiwa emisaveni,Lavo homboloka a va nge he vi kona.+
Ndzi ta dzunisa Yehovha. Dzunisani Yehovha!*
Tinhlamuselo ta le hansi
^ Kumbe “matsefu.”
^ Kumbe “yi nge tsekatsekisiwi.”
^ Hi Xiheveru, “hlayisaka mbilu ya munhu.”
^ Ku nga muxaka wo karhi wa xinyenyana.
^ Vona Tinhlamuselo.
^ Kumbexana “Ku anakanyisisa ka mina hi yena a ku n’wi tsakise.”
^ Kumbe “Haleluya,” leswi vulaka “Dzunisani Yah.” Yah i nkomiso wa vito leri nge Yehovha.
