Tipisalema 69:1-36
Eka mufambisi; hi mayimbelelelo ya risimu leri nge, “Makhon’wa.” Pisalema ya Davhida.
69 Ndzi ponise, Xikwembu xanga, hikuva mati ma lava ku ndzi dlaya.+
2 Ndzi mbombomele endzhopeni wo enta, laha ku nga riki na ndhawu yo yima eka yona.+
Ndzi le matini yo enta,Xinambyana lexi khulukaka xi ndzi khukhurile.+
3 Ndzi karhele hikwalaho ko huwelela;+Nkolo wa mina wu omile.
Ndzi rindze Xikwembu kukondza matihlo ya mina ma karhala.+
4 Lava ndzi vengaka ku nga ri na xivangelo+Va tele ku tlula misisi ya nhloko ya mina.
Lava lavaka ku ndzi dlaya,Valala va mina lava kanganyisaka va tele.
Ndzi sindzisiwe ku humesa leswi ndzi nga swi yivangiki.
5 Xikwembu xanga, wa byi tiva vuphukuphuku bya mina,Ni xidyoho xa mina wa xi vona.
6 Onge lava ku tshembaka va nga ka va nga khomisiwi tingana hikwalaho ka mina,Wena Hosi Leyi Tlakukeke, Yehovha wa mavuthu.
Onge lava ku lavaka va nga ka va nga nyumisiwi hikwalaho ka mina,Wena Xikwembu xa Israyele.
7 Ndza rhuketeriwa hikwalaho ka wena;+Xikandza xa mina xi tele hi tingana.+
8 Vamakwerhu va endla onge a va ndzi tivi,Vana va manana va ndzi fularherile.+
9 Ku hisekela yindlu ya wena ku ndzi dyile,+Ni mindzhukano ya lava ku rhukanaka yi wele ehenhla ka mina.+
10 Loko ndzi titsongahata ndzi titsona swakudya,*Va ndzi rhukanile.
11 Loko ndzi ambala swiambalo swo khwaxa,Va ndzi hlekile.
12 Lava tshamaka egedeni ya muti va vulavula hi mina,Ni swidakwa swi yimbelela hi mina.
13 Kambe onge xikhongelo xa mina xi nga ta eka wena,Yehovha, hi nkarhi lowu faneleke.+
Ndzi hlamule hi ku ndzi ponisa wena Xikwembu xanga,Hikwalaho ka rirhandzu ra wena lerikulu.+
14 Ndzi ponise endzhopeni;U nga ndzi tshiki ndzi mbombomela.
Ndzi ponise eka lava ndzi vengakaNi le ka mati yo enta.+
15 U nga ndzi tshiki ndzi khukhuriwa hi mati,+Kumbe ndzi mitiwa hi xidziva,Kumbe ndzi dyiwa hi mati ya xihlovo.*+
16 Ndzi hlamule Yehovha, hikuva rirhandzu ra wena i rinene.+
Ndzi pfune hikuva u ni musa swinene,+
17 U nga tumbeteli nandza wa wena xikandza xa wena.+
Hatla u ndzi hlamula hikuva ndzi le maxangwini.+
18 Tshinela u ta ndzi ponisa;Ndzi kutsule hikwalaho ka valala va mina.
19 U tiva ku rhukaniwa ka mina ni ku chichiwa ka mina xindzhuti.+
U vona valala va mina hinkwavo.
20 Ndzhukano wu tshove mbilu ya mina naswona xilondza xa kona a xi tshunguleki.*
A ndzi lava ku tshandzisiwa, kambe ko fana ni kwala,+A ndzi lava vachaveleri, kambe a ndzi kumanga munhu.+
21 Kambe va ndzi nyike chefu* leswaku yi va swakudya swa mina,+Naswona loko ndzi twa torha va ndzi nyike vhiniga.+
22 Tafula ra vona a ri ve xirimbana eka vona,Ni ku humelela ka vona a ku ve ntlhamu.+
23 Matihlo ya vona a ma ve ni munyama leswaku va nga voni,Endla leswaku tinyonga ta vona ti tshamela ku rhurhumela.
24 Va chululele vukarhi bya wena,Naswona onge va nga fikeriwa hi ku hlundzuka ka wena loku pfurhaka.+
25 Nxaxa* wa vona a wu hundzuke rhumbi;Ku nga ha tshami munhu ematendeni ya vona.+
26 Hikuva va hlongorisa loyi u nga n’wi ba,Naswona va tshamela ku vulavula hi timbanga ta lava u va vaviseke.
27 A va xupuriwe hilaha ku heleleke hikwalaho ka milandzu ya vona,Naswona u nga va nyiki ku lulama ka wena.
28 A va suriwe ebukwini ya lava hanyaka,*+Naswona va nga tsariwi ni lavo lulama.+
29 Kambe ndza xaniseka naswona ndzi twa ku vava.+
Onge u nga ndzi sirhelela, Xikwembu xanga, hi matimba ya wena yo ponisa.
30 Ndzi ta dzunisa vito ra Xikwembu hi tinsimu,Naswona ndzi ta xi dzunisa ndzi xi khensa.
31 Leswi swi ta n’wi tsakisa Yehovha ku tlula nkuzi,Ku tlula xinkuzana lexi nga ni timhondzo ni masondzo.*+
32 Lavo rhula va ta swi vona kutani va tsaka.
Timbilu ta n’wina a ti hanye n’wina lava lavaka Xikwembu.
33 Hikuva Yehovha u yingisa swisiwana,+A nge va rivali vanhu vakwe lava khomiweke.+
34 Tilo ni misava a swi n’wi dzunise,+Malwandle ni hinkwaswo leswi hanyaka eka wona.
35 Hikuva Xikwembu xi ta ponisa Siyoni+Xi ta pfuxa miti ya Yuda,Va ta tshama kona.*
36 Vana va malandza yakwe va ta tshama kona,+Ni lava rhandzaka vito+ ra xona va ta tshama kona.
Tinhlamuselo ta le hansi
^ Kumbexana “Loko ndzi rila ndzi titsona swakudya.”
^ Kumbe “mugodi.”
^ Kumbe “lerova ndzi hela matimba.”
^ Kumbe “ximilana xa chefu.”
^ Kumbe “Nxaxa lowu biyeriweke hi khumbi.”
^ Kumbe “ebukwini ya vutomi.”
^ Kumbe “swinyondzwana.”
^ Ku nga etikweni.
