Tipisalema 94:1-23
94 Yehovha, Xikwembu lexi rihiselaka,+Yana emahlweni u vangama, wena Xikwembu xa ku rihisela!
2 Suka u yima, wena Muavanyisi wa misava.+
Tirihisele eka lava titlakusaka.+
3 Yehovha Xikwembu xanga, xana lavo homboloka va ta ya emahlweni va khana ku fikela rini,Ku fikela rini?+
4 Va vulavula handle ko anakanya naswona va tivona;Hinkwavo lava endlaka swo biha va tibuma.
5 Yehovha Xikwembu xanga, va xanisa vanhu va wena,+Va tshikilela ndzhaka ya wena.
6 Va dlaya noni ni muluveri,Va tlhela va dlaya vana lava nga riki na tatana.
7 Va ri: “Yehovha a nga swi voni;+Xikwembu xa Yakobo a xi voni nchumu.”+
8 Twisisani leswi, n’wina lava nga anakanyiki;N’wina swihunguki, xana mi ta tlhariha rini?+
9 Xana Loyi a endleke* ndleve a nge twi?
Xana Loyi a vumbeke tihlo a nge voni?+
10 Loyi a lulamisaka matiko, xana a nge mi tshinyi?+
Hi yena Loyi a nyikaka vanhu vutivi!+
11 Yehovha wa yi tiva miehleketo ya vanhu,Leswaku yo va moya ntsena.+
12 Wa tsaka munhu loyi u n’wi lulamisaka, wena Yehovha,+Loyi u n’wi dyondzisaka nawu wa wena,+
13 Leswaku u n’wi nyika ku rhula hi masiku ya khombo,Ku fikela loko lowo homboloka a celeriwa mugodi.+
14 Hikuva Yehovha a nge va fularheli vanhu vakwe,+Kumbe ku lahla ndzhaka yakwe.+
15 Hikuva vuavanyisi byi ta tlhela byi va lebyinene,Hinkwavo lava nga ni timbilu letinene va ta byi seketela.
16 I mani la nga ta ndzi lwela ni lavo homboloka?
I mani la nga ta ndzi lwela ni lava endlaka swo biha?
17 Loko Yehovha a a nga ndzi pfunanga,A ndzi ta va se ndzi file.+
18 Loko ndzi ku: “Nenge wa mina wa rheta,”U ye emahlweni u ndzi seketela hi rirhandzu, Yehovha Xikwembu xanga.+
19 Loko ndzi karhateka swinene,U ndzi chavelerile u tlhela u ndzi endla ndzi tsaka.+
20 Xana u nga tirhisana ni vafumi* lavo hombolokaKasi va kunguhata ku endla swo biha hi ku tirhisa nawu?+
21 Va hlasela lowo lulama hi tihanyi+
Kasi la nga riki na nandzu va n’wi gweva rifu.*+
22 Kambe Yehovha u ta va vutumbelo bya mina lebyi sirhelelekeke,Xikwembu xanga i ribye ra mina leri ndzi tumbelaka eka rona.+
23 U ta va xupula hikwalaho ka mitirho ya vona leyo biha.+
U ta va lovisa* hi ku tirhisa vubihi bya vona.
Yehovha Xikwembu xa hina u ta va lovisa.*+
Tinhlamuselo ta le hansi
^ Hi Xiheveru, “byaleke.”
^ Kumbe “vaavanyisi.” Hi Xiheveru, “xiluvelo.”
^ Hi Xiheveru, “Naswona ngati ya loyi a nga riki na nandzu va vula leswaku yi ni nandzu (hombolokile).”
^ Hi Xiheveru, “miyeta.”
^ Hi Xiheveru, “miyeta.”
