Tito 1:1-16
1 Hi mina Pawulo, nandza wa Xikwembu tlhelo muapostola wa Yesu Kreste hi ku ya hi ripfumelo ra vanhu lava hlawuriweke hi Xikwembu ni vutivi bya ntiyiso lowu fambisanaka ni ku tinyiketela eka Xikwembu.
2 Swilo leswi swi titshege hi ntshembo wa vutomi lebyi nga heriki+ lebyi Xikwembu lexi nga hembiki+ xi byi tshembiseke khale swinene;
3 kambe hi nkarhi wa xona lowu faneleke xi endle leswaku rito ra xona ri tiviwa hi ku tirhisa ntirho wo chumayela lowu xi ndzi nyikeke wona+ hi ku ya hi xileriso xa Muponisi wa hina, ku nga Xikwembu;
4 eka Tito, loyi a fanaka ni n’wana eka mina hikwalaho ka ripfumelo leri hi nga na rona:
Onge u nga va ni musa lowukulu ni ku rhula leswi humaka eka Xikwembu Tatana na Kreste Yesu Muponisi wa hina.
5 Ndzi ku siye eKreta leswaku u lulamisa swilo leswi a swi hoxile ni ku hlawula vakulu emutini wun’wana ni wun’wana, hilaha ndzi ku leriseke hakona:
6 loko ku ri ni wanuna loyi a nga riki na xisolo, a ri ni nsati wun’we, a ri ni vana lava nga vapfumeri lava nga hehliwiki hi mahanyelo yo biha kumbe ku nga yingisi.+
7 Hikuva mulanguteri u fanele a nga vi na xisolo hileswi a tirhelaka Xikwembu, a nga sihalali,+ a nga hatliseli ku hlundzuka,+ a nga vi xidakwa, a nga vi munhu loyi a rhandzaka ku lwa, a nga vi ni makwanga yo lava ku vuyeriwa hi ndlela ya vukanganyisi,
8 kambe a va ni malwandla,+ a rhandza leswi lulameke, a ehleketa kahle,+ a va loyi a lulameke, a tshembeka,+ a tikhoma,+
9 ndlela leyi a dyondzisaka ha yona yi fanele yi namarhela rito ro tshembeka,+ leswaku a ta kota ku khutaza hi dyondzo leyinene+ ni ku tshinya+ lava kanetaka.
10 Hikuva ku ni vavanuna vo tala lava xandzukeke, lava vulavulaka swilo leswi nga pfuniki nchumu ni vakanganyisi, ngopfungopfu lava vulaka leswaku swa boha ku yimba.+
11 Va miyete vanhu volavo hikuva va onha mindyangu hi ku dyondzisa swilo leswi nga fanelangiki, hikwalaho ko lava ku vuyeriwa hi ku va kanganyisa.
12 Un’wana wa vona loyi a nga muprofeta wa vona u te: “Vakreta va tshamela ku hemba, i swiharhi leswi nga ni khombo, vanhu lava nga ni makolo ni ku loloha.”
13 Mhaka leyi i ntiyiso. Hikwalaho ka sweswo, yana emahlweni u va tshinya swinene leswaku va ta tiya* eripfumelweni,
14 va nga yingiseli mitsheketo ya Vayuda ni swileriso swa vanhu lava tshikaka ntiyiso.
15 Swilo hinkwaswo swi basile eka vanhu lava baseke;+ kambe a wu kona nchumu lowu baseke eka vanhu lava thyakeke ni lava nga riki na ripfumelo, hikuva mianakanyo ni mapfalo ya vona swi thyakile.+
16 Va vula leswaku va tiva Xikwembu kambe va xi landzula hi mitirho ya vona,+ hikuva va nyenyetsa naswona a va yingisi, a va faneleki ku endla ntirho ni wun’we lowunene.
Tinhlamuselo ta le hansi
^ Hi Xigriki, “hanya.”
