Vaavanyisi 14:1-20
14 Kutani Samsoni a ya eTimna, a fika a vona wansati wa Mufilista kwalaho.
2 Hiloko a ya eka vatswari vakwe a fika a ku: “Ndzi vone wansati wa Mufilista eTimna, ndzi lava mi ya ndzi tekela yena leswaku a ta va nsati wa mina.”
3 Kambe vatswari vakwe va ku eka yena: “Xana a nga kona wansati loyi u nga n’wi tekaka exikarhi ka maxaka ya wena ni le xikarhi ka vanhu va ka hina?+ Xana u fanele u teka nsati exikarhi ka Vafilista lava nga yimbangiki?” Kambe Samsoni a byela tata wakwe a ku: “Ndzi tekele yena hikuva ndzi tsakela yena.”
4 Vatswari vakwe a va nga swi xiyi leswaku lexi a ku ri xikongomelo xa Yehovha, hikuva A a lava ndlela yo lwa ni Vafilista, tanihi leswi hi nkarhi wolowo a va fuma Vaisrayele.+
5 Kutani Samsoni a famba ni vatswari vakwe eTimna. Loko a fika emasin’wini ya madiriva eTimna, ku humelela nghala yi n’wi mpfhumpfhela yi ri karhi yi bonga.
6 Hiloko moya wa Yehovha wu tirha eka yena,+ a yi handzula hi le xikarhi ku fana niloko munhu a handzula ximbutana hi le xikarhi hi mavoko. Kambe a nga va byelanga vatswari vakwe leswi a swi endleke.
7 Samsoni a famba a ya eTimna kutani a fika a vulavula ni wansati loyi naswona a a ha n’wi tsakela.+
8 Loko a tlhelela eTimna leswaku a ya teka wansati loyi a muka na yena,+ a hambuka a ya kamba ntsumbu wa nghala, a fika a kuma ku ri ni tinyoxi to tala ni vulombe endzeni ka wona.
9 Kutani a hakula vulombe hi mavoko a byi dya a ri karhi a famba. Loko a tlhela a hlangana ni vatswari vakwe, a va nyika byin’wana leswaku va dya. Kambe a nga va byelanga leswaku vulombe lebyi u byi hakule eka nghala leyi a yi dlayeke.
10 Tata wa Samsoni a ya eka wansati loyi, kutani Samsoni a endla nkhuvo kwalaho, hikuva leyi hi yona ndlela leyi majaha a ma tolovele ku endla ha yona.
11 Loko va n’wi vona hiloko va n’wi tisela tinxangwana* ta 30 leswaku ti ta tshama na yena.
12 Kutani Samsoni a ku eka tona: “Ndzi kombela ku mi byela mawetana.* Loko mo ndzi byela nhlamuselo ya wona emasikwini lawa ya nkombo ya nkhuvo, ndzi ta mi nyika tinguvu ta 30 ni swiambalo swa 30.
13 Kambe loko mo tsandzeka ku ndzi byela wona, mi fanele mi ndzi nyika tinguvu ta 30 ni swiambalo swa 30.” Hiloko tinxangwana* ti ku: “Hi byele mawetana ya wena; hi lava ku ma twa.”
14 Kutani a ku eka tona:
“Eka lexi dyaka ku hume lexi dyiwaka,Naswona eka lexi nga ni matimba ku hume nchumu wo tsokombela.”+
Tinxangwana* ti tsandzekile ku hlamusela mawetana ku ringana masiku manharhu.
15 Hi siku ra vumune ti byela nsati wa Samsoni ti ku: “Yenga nuna wa wena+ leswaku a hi byela nhlamuselo ya mawetana lawa. Loko swi nga ri tano hi ta ku hisa hi ndzilo wena ni vandyangu wa tata wa wena. Xana mi hi rhambele ku ta hi tekela swilo swa hina?”
16 Kutani nsati wa Samsoni a tshamela ku n’wi rilela a ku: “Wena wa ndzi venga; a wu ndzi rhandzi.+ U byela vanhu va ka hina mawetana kambe a wu ndzi byelanga nhlamuselo ya wona.” Hiloko Samsoni a ku: “Phela, ni vatswari va mina a ndzi va byelanga! Hikwalaho ka yini ndzi fanele ndzi ku byela wona?”
17 Kambe a tshamela ku n’wi rilela emasikwini ya nkombo ya nkhuvo. Samsoni a hetelela a n’wi byerile hi siku ra vunkombo hikuva a a n’wi sindzisa. Hiloko wansati loyi a ya byela vanhu va ka vona nhlamuselo ya mawetana lawa.+
18 Hi siku ra vunkombo loko dyambu ri nga si pela, vavanuna va muti va ku eka yena:
“I yini lexi tsokombelaka ku tlula vulombe,Naswona i yini lexi nga ni matimba ku tlula nghala?”+
A ku eka vona:
“Loko a mi nga rimanga hi xihon’wana xa mina,+A mi nga ta yi tiva nhlamuselo ya mawetana ya mina.”
19 Hiloko moya wa Yehovha wu sungula ku tirha eka yena,+ kutani a ya eAxikeloni+ a fika a dlaya vavanuna va 30 va kwalaho, a teka swiambalo swa vona a swi nyika lava va hlamuseleke mawetana yakwe.+ A a hlundzuke ngopfu loko a ri karhi a tlhelela endlwini ya tata wakwe.
20 Kutani va teka nsati wa Samsoni+ va n’wi nyika nxangwana* yakwe.+
Tinhlamuselo ta le hansi
^ Ku nga vaheleketi va muteki.
^ Kumbe “ntshayito.”
^ Ku nga vaheleketi va muteki.
^ Ku nga vaheleketi va muteki.
^ Ku nga muheleketi wa muteki.
