Vaefesa 6:1-24
6 Vana, yingisani vatswari+ va n’wina hi ku pfumelelana ni ku rhandza ka Xikwembu, hikuva leswi swi lulamile.
2 “Xixima tata wa wena ni mana wa wena,”+ lexi i xileriso xo sungula lexi nga ni xitshembiso:
3 “Leswaku swi ta ku fambela kahle ni leswaku u ta hanya nkarhi wo leha emisaveni.”
4 Vatatana, mi nga karhati vana va n’wina+ kambe va kuriseni hi ku va tshinya+ ni hi swileriso swa Yehovha.*+
5 N’wina mahlonga, yingisani vini va n’wina+ hi ku chava ni ku rhurhumela hi timbilu ta n’wina hinkwato, hilaha mi endlaka hakona eka Kreste,
6 ku nga ri loko mi langutiwile ntsena leswaku mi tsakisa vanhu,+ kambe ku fana ni malandza ya Kreste lama endlaka ku rhandza ka Xikwembu hi timbilu hinkwato.+
7 Tirhelani vini va n’wina hi ku swi rhandza ku fana ni loko mi tirhela Yehovha*+ ku nga ri vanhu,
8 hikuva ma swi tiva leswaku swilo leswinene leswi un’wana ni un’wana a swi endlaka, Yehovha*+ u ta n’wi hakela hikwalaho ka swona, hambi a ri hlonga kumbe a nga ri hlonga.
9 Na n’wina vini va mahlonga, ma khomeni kahle hi ndlela leyi fanaka, mi nga ma chavisi hikuva ma swi tiva leswaku N’wini wa wona swin’we na n’wina u le tilweni+ naswona a nga na xihlawuhlawu.
10 Xo hetelela, kumani matimba+ eHosini hikuva ntamu wa yona i wukulu.
11 Ambalani swiambalo hinkwaswo swa nyimpi swo tisirhelela+ leswi humaka eka Xikwembu leswaku mi kota ku yima mi tiyile, mi lwa ni miringo ya Diyavulosi;
12 hikuva a hi lwi*+ ni vanhu kambe hi lwa ni mifumo, ni valawuri, ni vafumi va misava va munyama lowu, ni madimona+ etindhawini ta le tilweni.
13 Hikwalaho ambalani swiambalo swa nyimpi hinkwaswo swo tisirhelela leswi humaka eka Xikwembu,+ leswaku mi kota ku tilwela hi siku ro homboloka naswona endzhaku ko endla swilo hinkwaswo, mi yima mi tiyile.
14 Hikwalaho, yimani mi tiyile mi tibohe masenge hi bandhi ra ntiyiso,+ mi ambale xisirhelelo xa xifuva xa ku lulama,+
15 naswona emilengeni ya n’wina mi ambala maphaxani yo chumayela mahungu lamanene ya ku rhula.+
16 Ku engetela eka leswi hinkwaswo, rhwalani xitlhangu lexikulu xa ripfumelo,+ lexi mi nga ta kota ku timela ha xona miseve hinkwayo leyi pfurhaka ya lowo homboloka.+
17 Nakambe, amukelani xihuku* xa ku ponisa+ ni banga ra moya, ku nga rito ra Xikwembu,+
18 kasi hi swikhongelo swa mixaka hinkwayo+ ni xikombelo mi hamba mi khongela nkarhi hinkwawo hi moya.+ Hikwalaho ka sweswo tshamani mi xalamukile, mi tshama mi khongelela vakwetsimi hinkwavo.
19 Na mina mi ndzi khongelela, leswaku ndzi nyikiwa marito yo ma vula loko ndzi pfula nomu, leswaku ndzi kota ku vulavula hi xivindzi loko ndzi twarisa xihundla xo kwetsima xa mahungu lamanene,+
20 hikuva ndzi rhumiwe hi Xikwembu+ leswaku ndzi chumayela mahungu lamanene naswona ndzi khotsiwile, ndzi khongeleleni leswaku ndzi vulavula hi wona hi xivindzi hilaha ndzi faneleke ndzi vulavula hakona.
21 Kutani leswaku na n’wina mi ta tiva leswi ndzi swi endlaka ni leswaku ndzi pfuke njhani, Tixiko+ makwerhu loyi a rhandzekaka ni nandza wo tshembeka eHosini, u ta mi byela hinkwaswo.+
22 Ndzi n’wi rhumela eka n’wina hi xikongomelo lexi, leswaku mi ta tiva leswaku hi pfuke njhani ni leswaku a ta chavelela timbilu ta n’wina.
23 Onge vamakwerhu va nga va ni ku rhula ni rirhandzu hi ripfumelo eka Xikwembu Tatana ni le ka Hosi Yesu Kreste.
24 Onge musa lowukulu wu nga va ni hinkwavo lava rhandzaka Hosi ya hina Yesu Kreste hi rirhandzu leri nga heriki.
Tinhlamuselo ta le hansi
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Hi Xigriki, “dodombisani.”
^ Ku nga xigqoko xo sirhelela nhloko.
