Vagalatiya 1:1-24
1 Mina Pawulo, muapostola loyi a nga rhumiwangiki hi vanhu naswona a nga vekiwangiki hi munhu, kambe loyi a vekiweke hi Yesu Kreste+ ni Xikwembu Tata wa hina,+ lexi n’wi pfuxeke eka lava feke,
2 ni vamakwerhu hinkwavo lava nga na mina, eka mavandlha ya le Galatiya:
3 Onge mi nga va ni musa lowukulu ni ku rhula leswi humaka eka Xikwembu Tata wa hina ni le ka Hosi Yesu Kreste.
4 U tinyiketile hikwalaho ka swidyoho swa hina+ leswaku a hi kutsula eka misava leyi yo homboloka+ hi ku ya hi ku rhandza ka Xikwembu tlhelo Tata wa hina,+
5 loyi a vangamaka hilaha ku nga heriki. Amen.
6 Ma ndzi hlamarisa leswi mi hatlaka mi fularhela* Loyi a mi vitaneke hi musa lowukulu wa Kreste mi ya eka muxaka wun’wana wa mahungu lamanene.+
7 A ku na mahungu man’wana lamanene; kambe ku ni van’wana lava mi karhataka+ naswona va lava ku soholota mahungu lamanene hi Kreste.
8 Loko un’wana eka hina kumbe ntsumi ya le tilweni o mi chumayela leswi fanaka ni mahungu lamanene kambe ku nga ri mahungu lamanene lawa hi mi chumayeleke wona, a a rhukaniwe.
9 Hilaha hi vuleke hakona, sweswi ndzi tlhela ndzi vula ndzi ku, Loyi a mi chumayelaka leswi fanaka ni mahungu lamanene ku nga ri lawa mi ma amukeleke, a a rhukaniwe.
10 Kahlekahle, xana sweswi ndzi ringeta ku khorwisa vanhu kumbe Xikwembu? Kumbe, xana ndzi ringeta ku tsakisa vanhu? Loko a ndza ha tsakisa vanhu, a ndzi nga ta va hlonga ra Kreste.
11 Hikuva ndzi lava mi swi tiva, vamakwerhu, leswaku mahungu lamanene lawa ndzi ma chumayeleke eka n’wina a ma humi eka vanhu;+
12 hikuva a ndzi ma kumanga eka munhu, kumbe ku dyondzisiwa hi munhu kambe ndzi kombiwe wona hi Yesu Kreste.
13 A swi kanakanisi leswaku mi twile hi ta mahanyelo ya mina loko ndza ha ri eka vukhongeri bya Vayuda,+ leswaku a ndzi tshamela ku xanisa vandlha ra Xikwembu hi tihanyi hi xikongomelo xo ri herisa;+
14 naswona a ndzi tlula vanhu vo tala va rixaka ra ka hina lava nga tintangha ta mina hi ndlela leyi a ndzi gandzela hi yona eka vukhongeri bya Xiyuda, tanihi leswi a ndzi rhandza mindhavuko ya vatatana.+
15 Kambe loko Xikwembu, lexi endleke leswaku ndzi velekiwa, xi ndzi vitana hi musa wa xona lowukulu,+ xi swi vone swi fanerile
16 ku kombisa N’wana wa xona hi ku tirhisa mina leswaku ndzi chumayela mahungu lamanene ha yena eka matiko,+ a ndzi lavanga xitsundzuxo eka munhu* hi nkarhi wolowo;
17 naswona a ndzi yanga eYerusalema eka lava a va ri vaapostola mina ndzi nga si va yena, kambe ndzi ye eArabiya kutani ndzi tlhelela eDamaska.+
18 Endzhaku ka malembe manharhu, ndzi endzele Khefasi*+ eYerusalema,+ ndzi fika ndzi tshama na yena masiku ya 15.
19 Kambe a ndzi va vonanga vaapostola lavan’wana, handle ka Yakobo+ makwavo wa Hosi.
20 Kutani loko swi ta eka timhaka leti ndzi mi tsalelaka ha tona, ndza mi tiyisekisa emahlweni ka Xikwembu leswaku a ndzi hembi.
21 Endzhaku ka sweswo ndzi ye etindhawini to hambanahambana eSiriya ni le Kilikiya.+
22 Kambe valandzeri va Kreste emavandlheni ya le Yudiya a va nga si tshama va ndzi vona.
23 A va tshamela ku twa leswi ntsena: “Munhu loyi a a lava ku herisa vukhongeri bya hina naswona a nga tshama a hi xanisa,+ sweswi u chumayela mahungu lamanene.”+
24 Hiloko va sungula ku dzunisa Xikwembu hikwalaho ka mina.
Tinhlamuselo ta le hansi
^ Kumbe “hatlaka mi susiwa eka.”
^ Hi Xigriki, “eka nyama ni ngati.”
^ Vito ra yena rin’wana i Petro.
