Vagalatiya 2:1-21
2 Endzhaku ka malembe ya 14 ndzi tlhele ndzi ya eYerusalema ndzi ri na Barnaba+ naswona ndzi fambe na Tito.+
2 Ndzi ye hikwalaho ka leswi ndzi kombiweke leswaku ndzi fanele ndzi ya kona, ndzi fike ndzi va byela mahungu lamanene lawa ndzi ma chumayelaka eka matiko. Hambiswiritano, ndzi hlangane ntsena ni vamakwerhu lava xiximiwaka swinene, ku tiyiseka leswaku ntirho lowu a ndzi wu endla ni lowu ndzi wu endleke a wu nga ri wa hava.
3 Nilokoswiritano, hambi ku ri Tito+ loyi a a ri na mina, a nga bohekanga ku yimbisiwa+ hambileswi a a ri Mugriki.
4 Kambe sweswo swi vange swiphiqo hikwalaho ka vamakwerhu va mavunwa lava ngheneke hi ku ngungumela,+ va nghene hi vukanganyisi ku fana ni tinhlorhi leswaku va ta kambela ntshunxeko+ wa hina lowu hi tiphinaka ha wona hileswi hi nga vadyondzisiwa va Kreste Yesu, leswaku va hi endla mahlonga;+
5 a hi va yingiselanga,+ hambi ku ri swa nkarhinyana,* leswaku mi ta tshama mi tiyile eka ntiyiso wa mahungu lamanene.
6 Kambe loko ku ri lava a va vonaka va ri va nkoka,+ vavanuna volavo lava xiximiwaka swinene a va ndzi dyondzisanga nchumu lowuntshwa. A ndzi na mhaka ni leswaku a va ri yini eku sunguleni, hikuva Xikwembu a xi yi hi nghohe.
7 Ematshan’weni ya sweswo, loko va vona leswaku ndzi nyikiwe mahungu lamanene leswaku ndzi ya ma chumayela eka lava nga yimbangiki,+ hilaha Petro a a nyikiwe wona leswaku a ma chumayela eka lava yimbeke,
8 hikuva loyi a nyikeke Petro matimba ya ku va muapostola eka lava yimbeke, na mina u ndzi nyike matimba ya ku va muapostola eka vamatiko,+
9 naswona loko Yakobo+ na Khefasi* na Yohane, lava a va vonaka va ri tiphuphu, va vone musa lowukulu lowu ndzi kombiweke wona,+ va qhavule Barnaba na mina+ ku kombisa leswaku va pfumelelana na swona leswaku hi fanele ku ya eka vamatiko, kambe vona va ya eka lava va yimbeke.
10 Va hi kombele leswaku hi tsundzuka swisiwana, naswona ndzi tiyimisele ku endla tano hi mbilu hinkwayo.+
11 Hambiswiritano, loko Khefasi*+ a ta eAntiyoka,+ ndzi n’wi tshinyile hi ku kongoma hikuva a a hoxisile.
12 Hikuva loko ku nga si fika vavanuna van’wana lava humaka eka Yakobo,+ a a dya ni vanhu va matiko;+ kambe loko va fika, u tshike ku dya na vona kutani a tihambanisa hi ku chava va ntlawa lowu yimbeke.+
13 Vayuda lavan’wana hinkwavo na vona va n’wi seketerile eka vukanganyisi lebyi, lerova hambi ku ri Barnaba va n’wi kuceterile a yima na vona eka vukanganyisi bya vona.
14 Kambe loko ndzi vona leswaku a va nga fambi hi ku pfumelelana ni ntiyiso wa mahungu lamanene,+ ndzi byele Khefasi* emahlweni ka vona hinkwavo ndzi ku: “Loko wena, loyi a nga Muyuda u tikhoma ku fana ni vanhu vamatiko ku nga ri hilaha Vayuda va hanyaka hakona, hikwalaho ka yini u lava leswaku vanhu vamatiko va hanya hi mikhuva ya Vayuda?”+
15 Hina lava hi nga Vayuda hi ntumbuluko naswona hi nga riki vadyohi lava humaka eka vamatiko,
16 ha swi xiya leswaku munhu u vuriwa loyi a lulameke ku nga ri hikwalaho ka ku landzela nawu, kambe hi ku va ni ripfumelo+ ntsena eka Yesu Kreste.+ Hikwalaho hi ni ripfumelo eka Kreste Yesu, leswaku hi vuriwa lava lulameke hikwalaho ka ripfumelo eka Kreste, ku nga ri hikwalaho ka ku landzela nawu, hikuva a nga kona loyi a nga ta vuriwa loyi a lulameke hikwalaho ka ku landzela nawu.+
17 Kutani loko na hina hi kumiwe hi ri vadyohi, hi ku lava ku vuriwa lava lulameke hikwalaho ka Kreste, xana sweswo swi vula leswaku Kreste u hi khutaza ku dyoha? Nikatsongo!
18 Loko ndzi tlhela ndzi aka swilo leswi ndzi tshameke ndzi swi wisa, ndzi kombisa leswaku ndzi tlula nawu.
19 Hikuva ndzi file hikwalaho ka nawu,+ hikwalaho ka swona ndzi hanyela Xikwembu.
20 Ndzi beleriwe emhandzini swin’we na Kreste.+ A ka ha ri mina loyi a hanyaka+ kambe i Kreste loyi a hanyaka naswona a nga ni vun’we na mina. Hakunene, vutomi lebyi ndzi byi hanyaka sweswi ndzi ri wa nyama ndzi byi hanya hi ripfumelo eka N’wana wa Xikwembu,+ loyi a ndzi rhandzeke kutani a tinyiketa hikwalaho ka mina.+
21 A ndzi wu ali* musa lowukulu wa Xikwembu,+ hikuva loko ku lulama ku va kona hikwalaho ko landzela nawu, swi ta vula leswaku Kreste u fele swa hava.+
Tinhlamuselo ta le hansi
^ Hi Xigriki, “awara.”
^ Vito ra yena rin’wana i Petro.
^ Vito ra yena rin’wana i Petro.
^ Vito ra yena rin’wana i Petro.
^ Kumbe “bakanyi.”
