Vagalatiya 6:1-18
6 Vamakwerhu, loko munhu a teka goza leri hoxeke a nga swi xiyi, n’wina lava kongomisiwaka hi moya wa Xikwembu ringetani ku n’wi pfuna hi moya wo rhula.+ Kambe na n’wina mi tivonela+ hi ku chava leswaku mi nga ringiwa.+
2 Yanani emahlweni mi rhwalelana mindzhwalo+ naswona loko mi endla tano mi ta va mi yingisa nawu wa Kreste.+
3 Hikuva loko munhu a ehleketa leswaku i wa nkoka kasi a hi wa nkoka,+ wa tixisa.
4 Kambe un’wana ni un’wana a a kambele swiendlo swakwe,+ kutani u ta va ni xivangelo xo tibuma naswona a nga tiringanisi ni munhu un’wana.+
5 Hikuva un’wana ni un’wana u ta rhwala ndzhwalo wakwe.+
6 Ku tlula kwalaho, loyi a dyondzisiwaka* rito a a avelane swilo leswinene hinkwaswo ni loyi a n’wi dyondzisaka.+
7 Mi nga xisiwi: Xikwembu a xi vungunyiwi. Hikuva xin’wana ni xin’wana lexi munhu a xi byalaka, u ta tlhela a tshovela xona;+
8 hikuva loyi a hanyelaka ku tsakisa miri wakwe u ta tshovela rifu, kambe loyi a landzelaka moya wa Xikwembu u ta tshovela vutomi lebyi nga heriki.+
9 Kutani hi nga tshiki ku endla leswinene, hikuva hi ta tshovela hi nkarhi lowu faneleke loko hi nga karhali.*+
10 Kutani loko ntsena hi ri ni nkarhi, a hi endleleni hinkwavo leswinene, kambe ngopfungopfu lava nga swin’we na hina eripfumelweni.
11 Vonani marito lamakulu lawa ndzi mi tsaleleke wona hi voko ra mina.
12 Hinkwavo lava lavaka ku tsakisa vanhu* hi vona lava ringetaka ku mi sindzisa leswaku mi yimbisiwa, va endla tano ntsena leswaku va nga xanisiwi hikwalaho ka mhandzi ya nxaniso* ya Kreste.
13 Hikuva hambi ku ri lava yimbisiwaka a va wu hlayisi Nawu,+ kambe va lava leswaku n’wina mi yimbisiwa leswaku va ta tibuma hi leswi endliweke emirini wa n’wina.
14 Kambe ndzi nga tshuki ndzi tibuma, loko ku nga ri hi Hosi ya hina Yesu Kreste+ loyi a feleke emhandzini ya nxaniso.* Eka mina, misava yi gweviwe rifu* hikwalaho ka yena kambe eka misava ndzi gweviwe rifu hikwalaho ka yena.
15 Hikuva ku yimba ni ku nga yimbi a hi swa nkoka,+ lexi nga xa nkoka hi leswaku Xikwembu xi endla munhu a va lontshwa.+
16 Onge hinkwavo lava hanyaka hi ku pfumelelana ni nawu lowu wa mahanyelo, ku nga Israyele wa Xikwembu,+ va nga va ni ku rhula ni tintswalo.
17 Ku sukela sweswi ku nga tshuki ku va ni munhu loyi a ndzi karhataka, hikuva emirini wa mina ndzi ni swivati leswi kombisaka leswaku ndzi hlonga ra Yesu.+
18 Vamakwerhu, musa lowukulu wa Hosi ya hina Yesu Kreste a wu ve ni moya lowu mi wu kombisaka. Amen.
Tinhlamuselo ta le hansi
^ Kumbe “dyondzisiwaka hi nomu.”
^ Kumbe “tshiki.”
^ Kumbe “lava lavaka ku languteka kahle.”
^ Vona Tinhlamuselo.
^ Vona Tinhlamuselo.
^ Kumbe “beleriwe emhandzini.”
