Vaheveru 1:1-14
1 Emikarhini leyi nga hundza, Xikwembu hi mikarhi yo tala ni hi tindlela to tala xi vulavule ni vakokwa wa hina xi tirhisa vaprofeta.+
2 Kutani emasikwini lawa yo hetelela xi vulavule na hina hi N’wana,+ loyi xi n’wi vekeke ku va mudyandzhaka wa swilo hinkwaswo,+ loyi ha yena xi endleke misava.*+
3 Hi yena xikombiso xa ku vangama ka Xikwembu+ ni xifaniso xa xona xa xiviri,+ u seketela swilo hinkwaswo hi rito ra xona ra matimba. Naswona endzhaku ka loko a basise swidyoho swa hina+ u tshame evokweni ra xinene ra Xikwembu etilweni.+
4 Kutani u tlakuke ku tlula tintsumi+ lerova u kume vito leri tlulaka mavito ya tona.+
5 Hi xikombiso, hi yihi ntsumi leyi Xikwembu xi tshameke xi ku eka yona: “U n’wana wa mina; namuntlha ndzi tata wa wena”?+ Xi tlhela xi ku: “Ndzi ta va tata wa yena, yena u ta va n’wana wa mina”?+
6 Kambe loko xi tlhela xi tisa Mativula+ ya xona emisaveni xi ri: “Naswona tintsumi hinkwato ta Xikwembu a ti n’wi khinsamele.”
7 Nakambe xi vula leswi hi tintsumi: “U endla tintsumi takwe ti va mimoya ni malandza yakwe+ ma va malangavi ya ndzilo.”+
8 Kambe mayelana na N’wana xi ri: “Xikwembu i xiluvelo xa wena+ hilaha ku nga heriki naswona nhonga ya vuhosi ya Mfumo wa wena i nhonga ya vuhosi ya vululami.
9 U rhandze ku lulama naswona u venge vuhomboloki. Hi yona mhaka leyi Xikwembu, Xikwembu xa wena xi ku toteke+ hi mafurha ya ku khana ku tlula tihosi tin’wana.”+
10 Naswona u ri: “Eku sunguleni wena Hosi, u endle masungulo ya misava, u endle matilo hi mavoko ya wena.
11 Ma ta lova kambe wena u ta tshama u ri kona; ma ta hlakala hinkwawo ku fana ni xiambalo,
12 u ta ma petsa ku fana ni nguvu kutani u ta ma cinca ku fana ni swiambalo. Kambe wena a wu cinci naswona malembe ya wena a ma nge heli.”+
13 Kambe hi yihi ntsumi leyi xi tshameke xi ku eka yona: “Tshama evokweni ra mina ra xinene ku fikela loko ndzi veka valala va wena va va vunavelo bya mikondzo ya wena”?+
14 Xana hinkwato a hi mimoya leyi endlaka ntirho wo kwetsima,+ leyi rhumiweke ku ya tirhela lava nga ta dya ndzhaka ya ku ponisiwa?
Tinhlamuselo ta le hansi
^ Vona Tinhlamuselo.
