Vaheveru 5:1-14
5 Hikuva muprista un’wana ni un’wana lonkulu loyi a hlawuriweke exikarhi ka vanhu u hlawuleriwe ku va tirhela eka swilo leswi fambisanaka ni ku gandzela Xikwembu,+ leswaku a ta nyikela tinyiko ni magandzelo ya swidyoho.+
2 Wa swi kota ku kombisa ntwelavusiwana eka lava nga riki na vutivi ni lava dyohaka tanihi leswi na yena a tsaneke,
3 naswona hikwalaho ka sweswo u fanele a endla magandzelo ya swidyoho swakwe hilaha a endlaka ya vanhu hakona.+
4 Munhu a nge vi muprista lonkulu hi ku rhandza kakwe kambe i Xikwembu ntsena lexi n’wi hlawulaka, hilaha xi hlawuleke Aroni hakona.+
5 Hilaha ku fanaka, Kreste a nga tivangamisanga+ hi ku tiendla muprista lonkulu kambe u vangamisiwe hi Loyi a n’wi byeleke a ku: “U n’wana wa mina; namuntlha ndzi tata wa wena.”+
6 Kasi kun’wana u te, “U muprista hilaha ku nga heriki ku fana na Melkisedeke.”+
7 Loko a ha ri laha misaveni, Kreste u endle swikombelo ni swikhongelo hi swirilo swa matimba ni mihloti+ eka Loyi a a swi kota ku n’wi ponisa eku feni naswona u twiwile hikwalaho ka leswi a a chava Xikwembu.
8 Hambileswi a a ri n’wana, u dyondze ku yingisa hikwalaho ka ku xaniseka kakwe.+
9 Endzhaku ka loko a hetisekile+ u ve ni vutihlamuleri bya ku ponisa hinkwavo lava n’wi yingisaka hilaha ku nga heriki,+
10 hikuva Xikwembu xi n’wi hlawule leswaku a va muprista lonkulu ku fana na Melkisedeke.+
11 Hi ni swo tala swo swi vula ha yena naswona swa tika ku swi hlamusela, hikuva a mi twisisi hi ku olova.
12 Hikuva hambileswi sweswi a mi fanele mi va vadyondzisi kambe ma ha lava ku tlhela mi dyondzisiwa swilo swo sungula leswi mi swi dyondzeke+ eritweni ra Xikwembu, mi lava ntswamba ku nga ri swakudya leswi tiyeke.
13 Hikuva un’wana ni un’wana loyi a yaka emahlweni a dya ntswamba a nga ri tivi rito ra ku lulama hikuva i xihlangi.+
14 Kambe swakudya leswi tiyeke i swa vanhu lava wupfeke, lava letelaka matimba ya vona ya ku twisisa hi ku ma tirhisa leswaku va hambanisa leswi lulameke ni leswi nga lulamangiki.
