Vaheveru 9:1-28
9 Ntwanano wo sungula a wu ri ni milawu ya ntirho wo kwetsima ni ndhawu ya wona yo kwetsima+ emisaveni.
2 Hikuva ku akiwe kamara ro sungula ra tabernakela leri a ri ri ni xo tlhoma timboni+ ni tafula ni swinkwa swa magandzelo;*+ naswona ri vuriwa Kamara Ro Kwetsima.+
3 Kambe endzhaku ka khetheni+ ra vumbirhi a ku ri ni kamara ra tabernakela leri vuriwaka Kamara Ro Kwetsima Ngopfu.+
4 A ri ri ni xibya xa nsuku+ xo hisela mirhi yo nun’hwela ni areka ya ntwanano+ leyi namekiweke nsuku+ matlhelo hinkwawo, endzeni ka yona a ku ri ni khuwana ra nsuku leri nga ni manna+ ni nhonga ya Aroni leyi hlukeke+ ni maribye ya swiphepherhele+ lawa a ma tsariwe milawu ya Xikwembu;*
5 naswona ehenhla ka yona a ku ri ni makerubu lama vangamaka ehenhla ka xifunengeto+ lexi vanhu va rivaleriwaka swidyoho eka xona. Kambe sweswi a hi nkarhi wo vula swo tala hi swilo leswi.
6 Endzhaku ka loko swilo leswi swi akiwile hi ndlela yoleyo, vaprista va nghena eka kamara ro sungula ra tabernakela nkarhi ni nkarhi leswaku va endla mitirho yo kwetsima;+
7 kambe muprista lonkulu u nghena a ri yexe ekamareni ra vumbirhi ra tabernakela kan’we hi lembe,+ a nghena a ri ni ngati+ leyi a yi nyikela yi va gandzelo rakwe+ ni ra swidyoho leswi vanhu+ va nga swi endlangiki hi vomu.
8 Kutani moya lowo kwetsima wu swi veka erivaleni leswaku a nga kona loyi a kombiweke ndlela leyi yaka endhawini yo kwetsima loko tabernakela yo sungula ya ha ri kona.+
9 Tabernakela leyi yi yimela nkarhi wa sweswi+ naswona hi ku ya hi matirhelo lawa, ku nyikeriwa tinyiko ni magandzelo.+ Hambiswiritano, leswi a swi swi koti ku endla ripfalo ra munhu loyi a endlaka ntirho wo kwetsima ri va leri hetisekeke.+
10 Swi fambisana ntsena ni swakudya, swakunwa ni tindlela to hambanahambana to basisa vanhu ni swilo.*+ A ku ri leswi a swi laveka hi ku ya hi nawu loko swi ta eka miri+ naswona swi ve kona ku fikela hi nkarhi lowu vekiweke wo lulamisa swilo.
11 Hambiswiritano, Kreste u tile a ri muprista lonkulu leswaku a tisa swilo leswinene leswi se hi nga na swona naswona u nghene etabernakeleni leyi nga ya nkoka swinene leyi hetisekeke, leyi nga endliwangiki hi mavoko ya munhu naswona a yi kona laha misaveni.
12 A nga nghenanga ni ngati ya timbuti ni ya swinkuzana endhawini yo kwetsima kambe u nghene ni ngati yakwe+ kan’we swi helela kwalaho, kutani a hi ponisa* hilaha ku nga heriki.+
13 Loko ku ri leswaku ngati ya timbuti ni ya tinkuzi+ ni nkuma wa thokazi* lowu a wu n’wan’waseriwa lava nyameke a swi kwetsimisa miri ni ku wu basisa,+
14 kutani ngati ya Kreste+ yi ta endla swo tlula sweswo, loyi hi moya lowu nga heriki a tinyikeleke eka Xikwembu a nga ri na xisolo, a basisa mapfalo ya hina eka mitirho leyi feke+ leswaku hi ta endlela Xikwembu lexi hanyaka ntirho wo kwetsima.+
15 Hi yona mhaka leyi a nga muhlanganisi wa ntwanano lowuntshwa,+ hikuva u file leswaku a ta tshunxa vanhu hi nkutsulo+ eka swidyoho leswi va swi endleke loko va ha ri ehansi ka ntwanano wo sungula, leswaku lava vitaniweke va ta amukela xitshembiso xa ndzhaka leyi nga heriki.+
16 Hikuva laha ku nga ni ntwanano, ku fanele ku va ni rifu ra munhu loyi a endleke ntwanano,
17 hikuva ntwanano wu tirha endzhaku ka rifu, tanihi leswi wu nga tirhiki loko munhu loyi a endleke ntwanano a ha hanya.
18 Hikwalaho, hambi ku ri ntwanano wo sungula a wu tirhanga* handle ka ngati.
19 Hikuva loko Muxe a vule swileriso hinkwaswo swa Nawu eka vanhu hinkwavo, u teke ngati ya swinkuzana ni ya timbuti ni mati ni voya byo tshwuka ni hisopa kutani a n’wan’wasela buku* ni vanhu hinkwavo,
20 a ku: “Leyi i ngati ya ntwanano lowu Xikwembu xi mi leriseke leswaku mi wu hlayisa.”+
21 Hilaha ku fanaka, u n’wan’wasele tabernakela ni swibya hinkwaswo swa ntirho wo kwetsima hi ngati.+
22 Ina, hi ku ya hi Nawu swilo swo tala swi basisiwa hi ngati+ naswona loko ngati yi nga halatiwi a ku na ku rivaleriwa.+
23 Hikwalaho a swi fanela leswaku swikombiso+ swa swilo swa le matilweni swi basisiwa hi tindlela leti,+ kambe swilo swa le matilweni swi basisiwa hi magandzelo yo antswa ku tlula lawa.
24 Hikuva Kreste a nga nghenanga endhawini yo kwetsima leyi endliweke hi mavoko ya vanhu,+ leyi nga xifaniso xa ndhawu yo kwetsima ya ntiyiso+ kambe u nghene etilweni hi koxe,+ kutani a humelela emahlweni ka Xikwembu hikwalaho ka hina.+
25 Leswi a swi nga endleriwi leswaku a tinyikela ko tala, ku fana ni loko muprista lonkulu a nghena endhawini yo kwetsima lembe ni lembe+ a ri ni ngati leyi nga riki ya yena.
26 Loko swi nga ri tano, a a ta boheka ku xaniseka ko tala ku sukela loko misava yi ve kona. Kambe sweswi u humelele kan’we swi helela kwalaho emasikwini ya makumu leswaku a susa xidyoho hi ku tiendla gandzelo.+
27 Tanihi leswi swi bohaka leswaku vanhu va fa kan’we swi helela kwalaho, kambe endzhaku ka swona ku va ni ku avanyisiwa,
28 kutani Kreste na yena u nyikeriwe kan’we swi helela kwalaho leswaku a rhwala swidyoho swa vo tala;+ naswona ra vumbirhi loko a humelela ku ta va ku nga ha ri hikwalaho ka xidyoho naswona u ta voniwa hi lava n’wi languteleke hi mbilu hinkwayo leswaku va ponisiwa.+
Tinhlamuselo ta le hansi
^ Ku nga swinkwa swo kwetsima.
^ Hi Xigriki, “ya ntwanano.”
^ Hi Xigriki, “minkhuvulo yo hambanahambana.”
^ Hi Xigriki, “kutsula.”
^ Ku nga homu ya xisati leyitsongo leyi nga si vaka ni marhole.
^ Hi Xigriki, “khanguriwanga.”
^ Kumbe “buku ya xikhale leyi a yo songiwa kunene.”
