Vakolosa 1:1-29
1 Mina Pawulo, muapostola wa Kreste Yesu hi ku rhandza ka Xikwembu na Timotiya+ makwerhu,
2 eka vakwetsimi ni vamakwerhu vo tshembeka lava nga vadyondzisiwa va Kreste eKolosa:
Onge mi nga va ni musa lowukulu ni ku rhula leswi humaka eka Xikwembu Tata wa hina.
3 Hi tshama hi ri karhi hi khensa Xikwembu Tata wa Hosi ya hina Yesu Kreste loko hi mi khongelela,
4 tanihi leswi hi tweke hi ta ripfumelo ra n’wina eka Kreste Yesu ni rirhandzu leri mi rhandzaka vakwetsimi hinkwavo ha rona
5 hikwalaho ka ntshembo lowu mi vekeriweke wona ematilweni.+ Ntshembo lowu mi wu twe hi rito ra ntiyiso ku nga mahungu lamanene
6 lama teke eka n’wina. Tanihi leswi mahungu lamanene ma andzaka ni ku fikelela vanhu hinkwavo,+ ma endla tano ni le xikarhi ka n’wina, ku sukela esikwini leri mi tweke ni ku twisisa leswi musa lowukulu wa Xikwembu wu nga swona.
7 Sweswo hi leswi mi swi dyondzeke eka Epafrasi+ nandzakulorhi loyi a rhandzekaka, loyi a tirhelaka Kreste hi ku tshembeka ematshan’weni ya hina.
8 U tlhele a hi byela hi rirhandzu ra n’wina leri fambisanaka ni moya wa Xikwembu.*
9 Hi yona mhaka leyi ku sukela esikwini leri hi tweke hi rirhandzu ni hi ripfumelo ra n’wina, hi nga tshikangiki ku mi khongelela+ ni ku kombela leswaku mi va ni vutivi bya ntiyiso+ bya ku rhandza ka Xikwembu hi vutlhari hinkwabyo ni ku twisisa loku humaka eka moya wa xona.+
10 Leswaku mi famba hi mukhuva lowu fanelaka eka Yehovha,* mi n’wi tsakisa hilaha ku heleleke mi tlhela mi endla leswinene naswona mi ya emahlweni mi va ni vutivi bya ntiyiso hi Xikwembu;+
11 nakambe onge Xikwembu xi nga tirhisa matimba ya xona lama vangamaka leswaku xi mi nyika matimba+ lama engetelekeke mi ta kota ku tiyisela hilaha ku heleleke mi nga heli mbilu naswona mi tsakile,
12 loko mi khensa Tatana loyi a endleke leswaku mi fanelekela ku kuma ndzhaka ya vakwetsimi+ lava nga eku vonakaleni.
13 U hi kutsule ematimbeni ya munyama+ kutani a hi hundzisela emfun’weni wa N’wana wakwe loyi a n’wi rhandzaka.
14 Kutani hikwalaho ka yena hi tshunxiwile hi nkutsulo hi tlhela hi rivaleriwa swidyoho swa hina.+
15 I xifaniso xa Xikwembu+ lexi nga vonakiki, mativula ya ntumbuluko hinkwawo.+
16 Hikuva Xikwembu xi tirhise yena ku tumbuluxa swilo leswin’wana hinkwaswo ematilweni ni la misaveni, swilo leswi vonakaka ni swilo leswi nga vonakiki,+ hambi i swiluvelo kumbe vuhosi kumbe mifumo kumbe valawuri. Xikwembu xi tirhise yena ku tumbuluxa swilo leswin’wana hinkwaswo+ naswona swi tumbuluxeriwe yena.
17 Nakambe, u ve kona swilo leswin’wana hinkwaswo swi nga si va kona+ naswona swilo leswin’wana hinkwaswo swi ve kona hikwalaho ka yena,
18 i nhloko ya miri, ku nga vandlha.+ I masungulo ya swilo hinkwaswo, mativula eka lava feke,+ leswaku a va wo sungula eka swilo hinkwaswo;
19 hikuva Xikwembu a xi lava leswaku Kreste a hetiseka eka swilo hinkwaswo.+
20 Hi ku tirhisa ngati+ leyi Kreste a yi halateke emhandzini ya nxaniso,* Xikwembu xi vuyetela swilo leswin’wana hinkwaswo+ eka xona, swilo leswi nga emisaveni ni leswi nga etilweni.
21 Hakunene, n’wina lava mi tshameke mi va valala va Xikwembu ni ku tlhela mi hambanisiwa na xona hikwalaho ka leswi a mi anakanya mitirho yo biha.
22 Kambe sweswi xi vuyelelane na n’wina hi miri wa nyama wa munhu yoloye hikwalaho ka rifu rakwe, leswaku xi mi endla mi va lava kwetsimaka ni lava nga solekiki ni ku pfumala xihehlo emahlweni ka xona.+
23 Ntsena loko mi hanya hi ku pfumelelana ni ripfumelo+ leri mi nga na rona eka Xikwembu, mi simekiwa emasungulweni+ mi tlhela mi tiya.+ Mi nga hambukisiwi eka ntshembo wa mahungu wolawo lamanene lawa mi ma tweke, lawa ma chumayeriweke eka vanhu hinkwavo.+ Mina Pawulo, ndzi hlawuriwe ku chumayela mahungu lawa lamanene.+
24 Sweswi ndza tsaka hileswi ndzi xanisekaka hikwalaho ka n’wina,+ naswona ndza xaniseka ku fana na Kreste kambe ndza ha fanele ndzi ya emahlweni ndzi xaniseka hikwalaho ka miri wakwe,+ ku nga vandlha.+
25 Ndzi hlawuriwe ku tirhela vandlha leri, hi ku ya hi ntirho lowu faneleke wu endliwa+ lowu Xikwembu xi ndzi nyikeke wona, leswaku ndzi ta chumayela rito ra xona hi mbilu hinkwayo hikwalaho ka n’wina.
26 Rito leri katsaka xihundla xo kwetsima+ lexi a xi nga tiviwi emisaveni+ ni le ka vanhu lava hanyeke enkarhini lowu hundzeke. Kambe sweswi xihundla xexo xi paluxeriwe vakwetsimi,+
27 lava Xikwembu xi tsakeleke ku va tivisa rifuwo ro vangama ra xihundla lexi xo kwetsima+ exikarhi ka matiko, ku nga Kreste loyi a nga ni vun’we na n’wina, ntshembo wa ku vangama kakwe.+
28 Hi yena loyi hi chumayelaka ha yena, hi tsundzuxa ni ku dyondzisa munhu un’wana ni un’wana hi vutlhari hinkwabyo, leswaku hi ta nyikela munhu un’wana ni un’wana eka Xikwembu tanihi mudyondzisiwa wa Kreste loyi a wupfeke.+
29 Hikwalaho ka leswi ndzi tirha hi matimba, ndza tikarhata hikwalaho ka matimba yakwe lama tirhaka eka mina.+
Tinhlamuselo ta le hansi
^ Hi Xigriki, “rirhandzu ra n’wina hi moya.”
^ Vona Xiengetelo A5.
^ Vona Tinhlamuselo.
