Varhoma 1:1-32
1 Hi mina Pawulo, hlonga ra Kreste Yesu leri vitaneriweke ku va muapostola ni leri hlawuriweke ku chumayela mahungu lamanene ya Xikwembu,+
2 lawa xi ma tshembiseke khale eMatsalweni yo kwetsima hi ku tirhisa vaprofeta va xona.
3 Mahungu lawa, ma vulavula hi N’wana wa xona loyi a humaka eka rixaka ra Davhida,+
4 loyi a vuriweke N’wana wa Xikwembu+ hi ku tirhisa matimba ya moya wa xona lowo kwetsima ku n’wi pfuxa eka lava feke,+ yena Yesu Kreste Hosi ya hina.
5 Ha yena hi kombiwe musa lowukulu naswona ndzi hlawuriwe ku va muapostola+ leswaku ndzi ta pfuna vanhu va matiko hinkwawo va va ni ripfumelo ni ku yingisa,+ va tlhela va xixima vito rakwe.
6 Na n’wina mi hlayiwa exikarhi ka vona hikuva mi vitaniwile leswaku mi va va Yesu Kreste—
7 eka hinkwavo lava nga eRhoma lava rhandziwaka hi Xikwembu, lava hlawuriweke ku va vakwetsimi:
Onge mi nga va ni musa lowukulu ni ku rhula leswi humaka eka Xikwembu Tata wa hina ni le ka Hosi Yesu Kreste.
8 Xo sungula, ndzi khensa Xikwembu xa mina ha Yesu Kreste hikwalaho ka n’wina hinkwenu, hikuva ripfumelo ra n’wina ku vulavuriwa ha rona emisaveni hinkwayo.
9 Xikwembu lexi ndzi xi endlelaka ntirho wo kwetsima hi mbilu ya mina hinkwayo hi ku chumayela mahungu lamanene hi N’wana wa xona, i mbhoni ya mina leswaku ndzi tshama ndzi ri karhi ndzi mi katsa eswikhongelweni swa mina,+
10 ndzi kombela leswaku loko swi koteka naswona ku ri ku rhandza ka Xikwembu ndzi kota ku mi endzela.
11 Hikuva ndzi navela ku mi vona leswaku ndzi ta mi nyika nyiko yo karhi ya moya leswaku ndzi mi tiyisa;
12 kumbe, leswaku hi ta khutazana,+ hi ripfumelo ra n’wina ni ra mina.
13 Kambe vamakwerhu, ndzi lava mi swi tiva leswaku i ko tala ndzi lava ku ta eka n’wina kambe ku ta fikela sweswi ndzi siveriwile, a ndzi lava ku ta vona vuyelo bya ku chumayela ka mina kwalaho ku fana ni le matikweni man’wana.
14 Ndzi ni nandzu eka Magriki ni le ka vanhu va matiko man’wana,* eka tintlhari ni le ka swihunguki;
15 hikwalaho ndzi tiyimisele ku chumayela mahungu lamanene ni le ka n’wina kwalaho eRhoma.+
16 Hikuva a ndzi khomiwi hi tingana hikwalaho ka mahungu lamanene;+ entiyisweni i matimba ya Xikwembu yo ponisa vanhu hinkwavo lava nga ni ripfumelo,+ ku sungula hi Vayuda+ ku ya ni le ka Magriki.+
17 Hikuva hikwalaho ka wona ku lulama ka Xikwembu ku paluxeriwa lava nga ni ripfumelo leswaku ripfumelo ra vona ri tiya,+ hilaha swi tsariweke hakona: “Kambe lowo lulama u ta hanya hikwalaho ka ripfumelo.”+
18 Hikuva vukarhi bya Xikwembu+ byi hlavuteriwa ku suka etilweni ku lwa ni vanhu lava nga xi yingisiki Xikwembu ni lava nga lulamangiki, lava hi ndlela leyi nga lulamangiki va sivelaka vanhu ku tiva ntiyiso,+
19 leswi vanhu lava va faneleke va swi tiva hi Xikwembu swi le rivaleni, Xikwembu xi va tivise swona.+
20 Hambileswi Xikwembu xi nga vonakiki, vumunhu bya xona bya vonaka ku sukela loko misava yi tumbuluxiwile ku ya emahlweni, hikuva byi vonaka eka swilo leswi xi swi tumbuluxeke+ hambi ku ri matimba ya xona lama nga heriki+ ni leswaku hi xona Xikwembu,+ lerova a va swi koti ku tiyimelela.
21 Hambileswi a va xi tiva Xikwembu a va xi dzunisanga tanihi Xikwembu naswona a va xi khensanga, kambe va anakanye swilo leswi nga pfuniki nchumu naswona timbilu ta vona leti nga tlharihangiki a ti twisisi nchumu.*+
22 Hambiloko va vula leswaku va tlharihile, va ve swiphukuphuku.
23 Ematshan’weni yo xixima Xikwembu lexi nga fiki, va xixima swifaniso swa vanhu lava faka, swifaniso swa swinyenyana, swivumbiwa leswi nga ni milenge ya mune ni swikokovi.+
24 Hikwalaho, hi ku pfumelelana ni ku navela ka vona Xikwembu xi va tshike va endla swilo leswi thyakeke, leswaku va nyamisa mimiri ya vona.
25 Va tshike ntiyiso wa Xikwembu hikwalaho ka mavunwa, kutani va gandzela ni ku tirhela swilo leswi vumbiweke ematshan’weni ya Muvumbi loyi a dzunisiwaka hilaha ku nga heriki. Amen.
26 Hi yona mhaka leyi Xikwembu xi va tshikeke va navela timhaka ta masangu hi ndlela leyi khomisaka tingana,+ hikuva vaxisati lava nga exikarhi ka vona va tshike ndlela ya vona ya ntumbuluko va tikhoma hi ndlela leyi nga riki ya ntumbuluko;+
27 hilaha ku fanaka ni vaxinuna va tshike ku etlela ni vaxisati hi ndlela ya ntumbuluko kutani va hisiwa hi ku navelana loku nga riki ka ntumbuluko, vaxinuna va etlela ni vaxinunakulobye,+ va endla manyala yo chavisa, naswona va xupuriwa hi ku helela hi ku ya hi xidyoho xa vona.+
28 Tanihi leswi va voneke swi nga fanelanga ku tiva Xikwembu, xi va tshike va anakanya swilo leswi nga pfuniki nchumu, va endla swilo leswi nga fanelangiki.+
29 Va tele hi swilo hinkwaswo leswi nga lulamangiki,+ vuhomboloki, makwanga,+ vubihi, va tele mavondzo,+ ku dlaya,+ madzolonga, vukanganyisi,+ nsele,+ i vahlevi,*
30 i vahehli,+ lava vengaka Xikwembu, varhukani, lava titlakusaka, lava tikukumuxaka, lava kunguhataka swilo leswi nga ni khombo, lava nga yingisiki vatswari,+
31 lava nga twisisiki,+ lava nga endliki leswi va swi tshembiseke, lava nga riki na rirhandzu ra ntumbuluko naswona a va na tintswalo.
32 Hambileswi va wu tivaka kahle nawu wo lulama wa Xikwembu wa leswaku vanhu lava endlaka swilo swo tano va faneriwa hi rifu,+ kambe va ya emahlweni va swi endla, va tlhela va seketela ni lava va swi endlaka.
Tinhlamuselo ta le hansi
^ Kumbe “lava nga riki Magriki.” Hi Xigriki, “vabarbara.”
^ Hi Xigriki, “ti ve ta ntima.”
^ Kumbe “vahleveteri.”
