Varhoma 10:1-21
10 Vamakwerhu, leswi ndzi swi khongelelaka eka Xikwembu ni leswi mbilu ya mina yi swi navelaka, hileswaku va ponisiwa.+
2 Ndzi mbhoni ya leswaku va xi hisekela Xikwembu+ kambe a va na vutivi lebyi kongomeke.
3 Leswi va nga swi tiviki kahle leswi Xikwembu xi swi lavaka leswaku munhu a va la lulameke,+ va tivekela milawu ya vona.+ Hikwalaho ka sweswo a va yi yingisanga milawu ya Xikwembu yo lulama.+
4 Hikuva Kreste i makumu ya Nawu,+ leswaku un’wana ni un’wana loyi a kombisaka ripfumelo a ta tekiwa a ri la lulameke.+
5 Hikuva Muxe u tsale hi munhu loyi a lulameke hi ku ya hi Nawu a ku: “Loyi a endlaka swilo leswi u ta hanya hikwalaho ka swona.”+
6 Kambe, Rito ra Xikwembu ri vula leswaku ku laveka ripfumelo leswaku munhu a va la lulameke, ri ri: “U nga vuli embilwini ya wena+ u ku, ‘I mani loyi a nga ta tlhandlukela etilweni?’+ leswaku a ta vuya na Kreste,
7 kumbe, ‘I mani loyi a nga ta rhelela ekheleni ro enta?’+ leswaku a ya humesa Kreste eka lava feke.”
8 Kambe tsalwa ri ri yini? “Rito ri le kusuhi na wena, ri le non’wini wa wena ni le mbilwini ya wena”;+ ku nga “rito” ra ripfumelo leri hi ri chumayelaka.
9 Hikuva loko u vula hi nomu wa wena erivaleni leswaku Yesu i Hosi,+ u tlhela u pfumela embilwini ya wena leswaku Xikwembu xi n’wi pfuxile eka lava feke, u ta ponisiwa.
10 Hikuva munhu u kombisa ripfumelo hi mbilu leswaku a va la lulameke, kambe u vula erivaleni hi nomu wakwe+ leswaku a ponisiwa.
11 Hikuva tsalwa ri ri: “Loyi a pfumelaka eka yena a nge khomisiwi tingana.”+
12 Hikuva a ku na ku hambana exikarhi ka Muyuda ni Mugriki.+ Hinkwavo va ni Hosi yin’we, leyi hananaka eka hinkwavo lava va yi vitanaka.
13 Hikuva “un’wana ni un’wana loyi a vitanaka vito ra Yehovha* u ta ponisiwa.”+
14 Hambiswiritano, va ta n’wi vitanisa ku yini loko va nga pfumelanga eka yena? Va ta pfumerisa ku yini eka loyi va nga twangiki nchumu hi ta yena? Va ta swi twisa ku yini loko ku nga ri na loyi a chumayelaka?
15 Hilaha ku fanaka, va ta chumayerisa ku yini va nga rhumiwanga?+ Hilaha ku tsariweke hakona: “Yi sasekile milenge ya lava vulaka mahungu lamanene ya swilo leswinene!”+
16 Nilokoswiritano, van’wana a va ma yingisanga mahungu lamanene. Hikuva Esaya u ri: “Yehovha,* i mani loyi a veke ni ripfumelo eka swilo leswi a swi tweke eka hina?”*+
17 Kutani ripfumelo ri va kona loko ku ri ni leswi twiweke.+ Leswi twiweke i rito leri vulavulaka hi Kreste.
18 Kambe ndza vutisa, Xana a va ri twanga? Phela, kahlekahle “mpfumawulo wa vona wu twakale emisaveni hinkwayo ni rungula ra vona ri fike hinkwako emisaveni.”+
19 Kambe ndza vutisa, xana Vaisrayele a va swi twisisanga?+ Xo sungula, Muxe u ri: “Ndzi ta endla leswaku mi va ni mavondzo hi ku tirhisa lexi nga riki tiko; ndzi ta mi endla mi hlundzuka ngopfu hi ku tirhisa tiko ro hunguka.”+
20 Esaya u ve ni xivindzi a ku: “Ndzi kumiwe hi lava a va nga ri eku ndzi laveni;+ ndzi tiviwe hi lava a va nga vutisi ha mina.”+
21 Kambe u vule leswi mayelana ni Vaisrayele: “Ndzi yimise mavoko siku hinkwaro ndzi yimisela vanhu lava nga yingisiki ni lava omeke tinhloko.”+
