Varhoma 12:1-21
12 Hikwalaho ndza mi kombela vamakwerhu, hi tintswalo ta Xikwembu leswaku mi nyikela mimiri ya n’wina+ yi va gandzelo leri hanyaka ro kwetsima+ leri amukelekaka eka Xikwembu, mi tirhisa matimba ya n’wina yo anakanya loko mi ri karhi mi endlela Xikwembu ntirho wo kwetsima.+
2 Tshikani ku titwananisa ni misava leyi, kambe mi hundzuka mi cinca ndlela leyi mi anakanyaka ha yona,+ leswaku mi ta tiyiseka+ hi ku rhandza ka Xikwembu loku nga kunene, loku amukelekaka ni loku hetisekeke.
3 Hikwalaho ka musa lowukulu lowu ndzi kombiweke wona hi Xikwembu, ndzi mi byela hinkwenu leswaku mi nga tiehleketeleli ku tlula mpimo lowu mi faneleke mi tiehleketelela ha wona,+ kambe mi ehleketa kahle hikuva Xikwembu xi nyike un’wana ni un’wana wa n’wina ripfumelo ro karhi.+
4 Hikuva hambi leswi hi nga ni swirho swo tala eka miri wun’we+ kambe swirho sweswo hinkwaswo a swi na ntirho lowu fanaka,
5 hikwalaho, hambileswi hi nga tala, hi miri wun’we hikuva hi hlanganisiwa hi Kreste, un’wana ni un’wana wa hina i xirho xa un’wana.+
6 Kutani, leswi hi nga ni tinyiko leti hambaneke hi ku ya hi musa lowukulu lowu hi kombiweke wona,+ loko hi ri ni nyiko ya ku profeta, a hi profeteni hi ku ya hi ripfumelo ra hina;
7 loko hi ri ni nyiko yo tirhela van’wana, a hi va tirheleni; loyi a dyondzisaka, a a dyondzise;+
8 loyi a khongotelaka, a a khongotele;+ loyi a nyikaka, a a nyike hi mbilu yo basa;+ loyi a rhangelaka, a a rhangele hi ku tiyimisela;+ loyi a kombisaka tintswalo, a a ti kombise hi mbilu leyi tsakeke.+
9 Rirhandzu ra n’wina ri nga vi na vukanganyisi.+ Vengani swilo swo homboloka;+ mi namarhela swo lulama.
10 Rhandzanani tanihi vamakwavo, mi va vanghana. Vanani lavo rhanga eku xiximaneni.+
11 Gingiritekani, mi nga lolohi.+ Mi hiseka hi ku pfuniwa hi moya lowo kwetsima.+ Tirhelani Yehovha.*+
12 Tsakani hikwalaho ka ntshembo. Mi tiyisela nhlomulo.+ Mi phikelela exikhongelweni.+
13 Avelani vakwetsimi leswi va swi pfumalaka.+ Titoloveteni ku kombisa malwandla.+
14 Yanani emahlweni mi va kombelela mikateko lava mi xanisaka;+ va kombeleleni mi nga va rhukani.+
15 Tsakani ni lava tsakaka; mi rila ni lava rilaka.
16 Khathalani hi van’wana hi ndlela leyi mi khathalaka ha yona hi n’wina. Mi nga veki miehleketo ya n’wina eka swilo leswi tlakukeke kambe titsongahateni.+ Mi nga titeki mi tlharihile.+
17 Mi nga tlheriseli swo biha hi swo biha eka van’wana.+ Endlani swilo leswi vanhu hinkwavo va swi tekaka swi ri swinene.
18 Loko swi koteka, vanani ni ku rhula ni vanhu hinkwavo.+
19 Varhandziwa, mi nga rihiseli, kambe swi tshikeleni vukarhi bya Xikwembu;+ hikuva ku tsariwile: “‘Hi mina ndzi nga ta rihisela; ndzi ta va xupula,’ ku vula Yehovha.”*+
20 Kambe “loko nala wa wena a twa ndlala, n’wi phamele; loko a twa torha, n’wi nyike swakunwa; loko u endla tano u ta va u hlengeleta makala lama pfurhaka enhlokweni yakwe.”*+
21 U nga pfumeli ku hluriwa hi swo biha kambe yana emahlweni u hlula swo biha hi leswinene.+
Tinhlamuselo ta le hansi
^ Vona Xiengetelo A5.
^ Vona Xiengetelo A5.
^ Ku nga ku endla leswaku munhu a cinca langutelo rakwe ro biha.
