Varhoma 14:1-23
14 Amukelani munhu loyi a nga ni ripfumelo+ leri tsaneke kambe mi nga avanyisi munhu hikwalaho ko va a ri ni mavonelo lama hambaneke ni ya n’wina.
2 Munhu loyi a nga ni ripfumelo leri tiyeke u dya xin’wana ni xin’wana kambe loyi a nga ni ripfumelo ro tsana u dya matsavu ntsena.
3 Loyi a dyaka a nga n’wi tekeli ehansi loyi a nga dyiki, ni loyi a nga dyiki a nga n’wi avanyisi loyi a dyaka,+ hikuva Xikwembu xi n’wi amukerile.
4 U mani wena lerova u nga avanyisa nandza wa un’wana?+ N’wini wakwe hi yena a vulaka leswaku u lulamile kumbe u hoxile.*+ Leswi Yehovha* a n’wi pfunaka swi ta n’wi fambela kahle.
5 Un’wana u ehleketa leswaku siku ro karhi ri tlula rin’wana;+ kasi un’wana u ehleketa leswaku masiku hinkwawo ma fana;+ un’wana ni un’wana a a tiyiseke hileswi a swi tshembaka.
6 Loyi a tekaka siku ro karhi ri ri ro hlawuleka u swi endlela Yehovha.* Nakambe, munhu loyi a dyaka u swi endlela Yehovha* hikuva u khensa Xikwembu;+ ni loyi a nga dyiki u swi endlela Yehovha,* kutani a khensa Xikwembu.+
7 A nga kona exikarhi ka hina loyi a tihanyelaka+ naswona a nga kona loyi a tifelaka.
8 Hikuva loko hi hanya hi hanyela Yehovha*+ ni loko hi fa, hi fela Yehovha.* Kutani loko hi hanya ni loko hi fa, hi va Yehovha.*+
9 Hikwalaho ka sweswo Kreste u file a tlhela a hanya, leswaku a ta va Hosi ya lava feke ni lava hanyaka.+
10 Kambe hikwalaho ka yini u avanyisa makwenu?+ Kumbe hikwalaho ka yini u tekela makwenu ehansi? Hikuva hinkwerhu hi ta yima emahlweni ka xiluvelo xa Xikwembu xa vuavanyisi.+
11 Hikuva ku tsariwile: “‘Leswi ndzi hanyaka,’+ ku vula Yehovha,* ‘vanhu hinkwavo va ta ndzi khinsamela naswona hinkwavo va ta swi vula erivaleni leswaku ndzi Xikwembu xa vona.’”+
12 Kutani un’wana ni un’wana u ta tihlamulela eka Xikwembu.+
13 Hikwalaho, a hi tshikeni ku avanyisa van’wana,+ ku ri na sweswo tivoneleni leswaku mi nga veki xikhunguvanyiso kumbe nchumu lowu nga wisaka makwenu.+
14 Ndza swi tiva naswona ndza kholwa hikwalaho ka Hosi Yesu leswaku a ku na nchumu lowu nga basangiki;+ kambe loko munhu a ehleketa leswaku nchumu wo karhi a wu basanga, a wu basanga eka yena.
15 Hikuva loko u khunguvanyisa makwenu hikwalaho ka swakudya leswi u swi dyaka, a wa ha kombisi rirhandzu.+ U nga dlayi ripfumelo ra munhu loyi Kreste a n’wi feleke hikwalaho ka swakudya swa wena.+
16 Hikwalaho, mi nga pfumeli leswaku swilo leswinene leswi mi swi endlaka ku vulavuriwa ku biha ha swona.
17 Munhu a nge ngheni eMfun’weni wa Xikwembu hikwalaho ka leswi a swi dyaka kumbe leswi a swi nwaka,+ kambe u fanele a va lowo lulama, a va ni ku rhula ni ku va ni ntsako hikwalaho ko pfuniwa hi moya lowo kwetsima.
18 Loko munhu a tirhela Kreste ku fana ni hlonga hi ndlela leyi, wa amukeleka eka Xikwembu ni le ka vanhu.
19 Hikwalaho, a hi lavisiseni swilo leswi endlaka leswaku ku va ni ku rhula+ ni swilo leswi akaka van’wana.+
20 Tshikani ku onha ntirho wa Xikwembu hikwalaho ka swakudya.+ I ntiyiso, swilo hinkwaswo swi basile kambe swi hoxile loko munhu a dya swilo leswi nga ta khunguvanyisa van’wana.+
21 Swa antswa u nga dyi nyama kumbe ku nwa vhinyo kumbe ku endla nchumu lowu nga ta khunguvanyisa makwenu.+
22 Leswi u swi pfumelaka a swi ve mhaka ya wena ni Xikwembu. Wa tsaka munhu loyi a nga titwiki nandzu hileswi a vonaka swi ri swinene eka yena.
23 Kambe loko a dya a ri karhi a kanakana, se u gweviwile, hikuva a nga dyi hi ripfumelo. Kahlekahle, xin’wana ni xin’wana lexi nga endliwiki hi ripfumelo i xidyoho.
Tinhlamuselo ta le hansi
^ Hi Xigriki, “tivaka ku yima kumbe ku wa kakwe.”
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
^ Vona Xiengetelo A5.
